“Na taq laqni mà shvlávtv’ng Nønt mvsøn la vl nìnø Gvray kaq Ngào Vpè wā shø’n mvdaq”
Nár vrvm vsvng mvngpòng nvng vhø’m mv-ngushì we, Angelus vjúrøt we taqø ” Muqlang taqlap è vl nøngmaqò Vpè” wàwe vjúrøt Kà lòng svng vchvk dang nvng vpø’ shvring lvm dang dvshvng bø’à.
Gvray gvsang nø nøngmaq nvng rvtø vrvm tvpwa vlē. Ang vl rvt nø nøngmaqò lvpat cúnshì lúnì lòng, shvla lòng nvng vháng vlúnlvm tvrà kaq dì lúnè.
Dèni tálúnì we dvbùshang Mongkà taq Vkangpè Yesu Hkristu í nø Ang mèpvng cvn we coqcvnri svng “Muqlang taqlap è vl nøngmaqò Vpè” vjúrøt Kà shvngøt dvtú cv’nào lòng svng tálún shìe.
Yalòng vjúrøt Kà ínø rvzvngcerì shvngbe kaq svng v-rvm vrá mongzøl vl dvzvrè, yalòng Vjúrøt Kà taqø Gvray gvsang ínø nøngmaq shvngbe svng àng kaq Vpè (Abba, Father) vpø’ we, angpè mvdvm Kvmnønt dvnzøng we, Shvre lvm lòng vcar we, angpèo shóngnønt mvdvmø dàq v-tu Kv’m we Cvmré ce tiqgø’ í angpè svng gōò pàdø Go lúnlvm rvt ègo íe.
Yalòng Vjúrøt Kà nø Gvray gvsang nø nøngmaq kaq Angò angcø angcè rì ku mèsatnì pàdø, àng kaq svng gø nøngmaqò angpè tiqgø’ ku dvtanòe walòng svng Sasvna mèo Gvray móngkà dvrá shvngøt dvtú we taqø dvtánòe
Vpè Gvray gvsang kaq Kvmnønt kūnga taqkèní téwa vjúrøt dvzaqshì dvshà shà, nøngmaq nø Gvray gvsangò vpø’ we Mvkok dvdí shóngnønt lòng svng téwa shá lúnì nø, àng shóngwàmshì we angcø angcè rì ku àngde ni àngde í síngràl shálúnshìe.
Dènio dvbùshang Mongkà taq Kà shvbóng v-ní lòng
(1) Mà dvdvmshì yaqdøng rvwe taq dì we zaqle svng vto lvm rvt nítvp we vsvngrì kaq Vm-aq lvm dvre røtshì we Kà shvbóng mvshøl nvng angpè angmèmaq shvngbe nø angdèo angcø angcè rì kaq svng shvlá vtv’ng lòng zí mvyø’ we Nønt cv’ngshì dang, Kà shvbóng mvshøl v-ní lòng kèní vkvtdø shvngøt dvtú we taq nào lvpat yv’ng kadø wā vl v-du we í nigø Gvray gvsang kaq vnvpshì vwángshì vjúrøt shì vsvng kaq svng Gvray gvsangí nø kádvgvp gø rvweng we, car shì we mà-vl dang.
Gvray gvsangí nø nøngmaqò vjúrøt kūnga shaq svng rvtø vrvm táāe. Nøngmaq Gvray gvsang kaq Vjúrøt shà i lòng svng Gvray gvsangí vtánà we hang Dvla nø tiqkvt kvt nøngmaq dvpvt síngràl lúnlvm rvzaq v-duè. Pàwàlvm wàni nøngmaq i síngràl lúnlvm nø, nøngmaq ra vchvk, zø’m tvng lòng, nøngmaq í shá lúnì mvdvmø Gvray gvsang ínø nøngmaq dvpvt téwa Kømzøp lòng zí mvyø’ rvt tiqkvt la kvt Gvray gvsangò té vtv’ng Nyan Bvnya taqkèní vtánà lòng svng nøngmaqí síngràl mvlúnì.
Nøngmaq i síngràl lúnlvm kadv’ngte rvzaq we íni gø Kvmnønt í rvtø vrvm vjúrøt ràe. Pàwàlvm wàni Gvray gvsangò jèjú rì taq nøngmaq dvpvt Gá lòng nvng kūnga vzàm vl rvt íē.
Gvray gvsangò angcø angcè rì wáshì lún we bóy wáshì we rvtø rì taq Gvray gvsang kaq svng Vpè wā shø’n nì rvtø rì taq nøngmaq gø àngde gø Kristuò àngnvm angchvngrì ku tiqgø’ nvng tiqgø tāsvng tālè vshú:ng ke we, Gvray gvsang i zí we shóngnønt Dvrá svng tiqgø’ nvng tiqgø’ dvtanshì lòng í Gvray gvsangò angcø angcè rì í dang dvtán ràe.
Zvndvtut Svrabín Koqkvm pè Leo XIV ínø Gadèq Myoq yv’ngkèní Shànshér pè. Cyprian í shøn yangà we mongkà ínø Gvray gvsang kaq nøngmaqò Vpè wā shø’n nìnø nøngmaq gø àngò angcø angcè rì ku cúnshì nø vl ra we íe.
Shànshér pè John Chrysostom ígø ” Nào Nønt mvsøn vdòng taqø Dvgoq mà:pmnønt lòng nvng Vsvng zi dvng mà-vl we Nønt mvsøn la vl nìnø Vpè Gvray ínø ídv’ngte shvngbe taqø dvshá zāe, wā naí shø’n mvdv’ngshì, wàwe mvtú svng gø Svrabín Koqkvm Leo XIV í dvtan nø dvshvng bø’à we íe.
Vsvngrì mvdvm taqø tvrà angpvn pvn nvng v-tu vre we, chvng gvlvng wáshì nø dvtán weí v-toq v-tìp nìnø, nøngmaq nø Gvray gvsang kaq svng Vpè wā shø’n nø vjúrøt we wá mvdaq.
Gvray gvsang kaq Vpè a wā vjúrøt mèyø nìnø Angò shvlá vtv’ng vpø’ vtv’ng dang rì, Nønt yv’ng, tønzv’n Nønt rì, dvshá zā mvkok dvdí shóngnønt rì í Nøngmaqò lvpat svng tvlíng shì nø, wè jèjú rì nøngmaq yv’ngkèní Tiqdvng vsvngrì kaq léshì dvtán ra we íe.
Gvray gvsang nø nøngmaq mvdvm yv’ngø Dvgoq nønt rì vcar we, tāsvng tālè dvshá zā mvkok dvdí shóngnønt gvl we, shóngnønt vjø’ng í shóng we, Kømzøp we shóngnøntní shú:ngshì pàdø nøngmaq í gø àngde nvng nitvp vsvngrì kaq svng Gvray gvsangí nøngmaq kaq shóngshì pàdø shóngshì ràe wā dvshvng bø’à.
