Kàru svng shóngshì Lv́m Pope Francis taqkèní dvtú we
Shvlawe kàru rì taqkèní nøtcun dvdam we tvrà svng bv́ngkà tánā lúnwe íe. Nøt mvsø̀n svng vjángā nø nøngmaq ò lvpat tvrà rì kaq dvcøp shvnvpā we íe wanø ‘Letter to Future Priests’ Mèpvng tuqrawe shvrúngshú rì kaq shvri kàru wawe kà vgo taqkèní dvtú bǿà we íe.
Shvngø̀mré bv̀nlì taq dvzaq dvkángshì we vsv̀ngrì nvng rvcángcèrì shvngbe gø kàru, dvzáng rì shóngshìwe tvrà nø tiqgǿ vrv̀mò zitnøt rv́lnøt rì svng vrangā weni íe.
Mvngǿr zùngrì taqgø kàru rì svng mvdø̀ng shvngøt dvtú ràwe dang July 17 ni taq dvtú lèga kèní tvnùng bǿà we ínø̀ August 4 ni kèní dvsher bǿà wegø íe. Yalòng tvnùng kàru svng dvtú ráà we àng mvtú nø mèpvng kaq tuqrawe shvrúngshú àngshv́r rì nø kàru paqzí dang svng shóngshì nø mèpvng mvril lvpat kaqsvng vháng vlún lv́m dvpvt mvtú kèní dvtú bǿà we íe.
Kàru taqkèní shvrúngshú rìò mvsø̀n nvrø̀m rì kaqsvng shvnglut dvzv́rā lúnwe ínø̀ rvwvl nøt nvng døngmvnwe tvrà svng gø tóngā we íe. Wewa mvtaq dvcè kàpv̀nrì àngpv̀n pv̀n svng gø vjúzílún we íe. Vsv̀ng tiqgǿ ò nøtcun dvtøp nøt rì svng gwaqā dvzv́r lúnwe mvtaq pvlàcè tvrà taqgø bángkà tánā we íe. Shvrúngshú rì nvng kám vsv̀ng shvngø̀mré rìò Gvrayò gvsa bv̀nlì tvrà taq dèni vbatò vsv̀ngrì mvsø̀n nvrø̀mrì vtánā dvzv̄r we íe.
