Vkangpè Yesuí síngràl yórlvm rvt Kàshvbóng mvshøl anngpvn pvn taqkèní shvngøt dvtúè.
Vpø’ íwe pèmè vnvmchvngmaq Vkangpè Yesuí síngràl yórlvm rvt Kàshvbóng mvshøl anngpvn pvn taqkèní shvngøt dvtúè.
Kàshvbóng (Parable) wàwe nø, Muqlàng nvng sing ang lvjøm vl nø, Mònggvn nvng sing dø gø lvjøm vl Kà íe.” An earthly story with a heavenly definition” wàwe Kà vlē . Shø’n mvyø’ we taq Rvgaqtømø Toni angwa dø bø’n búng we mvbøn rì, mvshøl cerì svng lvng nø Muqlàng móngdàn nvng sing we móngkà gømlā rì svng dvtánshì lòng íe. Wervt Dvzvr pè la í nø ” Pàrvt Kàshvbóng mvshøl kèní dvshvngòe mà?” røt Kà taqkèní røtshì dvgvp Kristu Gvray ínø ” Namaq ínø Muqlang móngdànò Mongkà gømlā rì svng shá lúnlvm ìshøt vtōshì èlúnøngè. Àngmaq í mvng nø shámvyø’ nigø shá mvlúnò ” wā vtánshìe.
Vrá nø, tiqlvp kèní gø Muqlang móngdàn nvng sing we móngkà gømlā rì svng síngràl lún dø pø’nàe wàwe mvdvm, cv’na we tvrà rì taqø Nønt øp mvdv’ngshì rì Nønt øp dv’ngshì lúnlvm dvpvt angmaq nvng nitvp nø síngràl yor tvrà mvshøl rì svng lvngò nø dvshvngòe. Wervt Kristu Gvray í ” Angmaq kaq Kàshvbóng mvshøl taqkèní Ngàí shvngøtnò tvrà rì svng àngmaqí dvjào nigø yv’ng mvlúnò, Táò taqsórí mvtáò, mvsíng mv-ràlò,” wā shø’nè. Mongkà dvshvng gø’ dvpvt tvlú dvgø’shì lvm tiqlòng nø, angí dvshvngò lòng shiwa vsvngrì í síngràl lúnò mà? Mv-síng mv-ràlò mà? wà Kà íē. Shønò lòng, dvshvngò lòng svng Táò nigø mvsíng mv-ràl shi lú:ngdvgvp dvshvng shì lòng màqhúng íe. Tiqkvt la kvt nøngmaq vsvngrì nø àngde tá mvyø’ lòng svng wa tá mvyø’ í nø, dvgá dø pàdang svng gø pàti mvlv’nì. Nøngmaq gø’ vrvm taq gø tiqkvt kvt àngde yv’ng mvyø’ í lòng , àngde tá mvyø’ í lòng, àngde í síngràl lúnì lòng svng wā yvng íe, tá íe, síngràl lúnì we íe. Íni gø, angdèo lvpat chutchvng lúnlvm dvpvt Muqlang móngdàn nvng sing we Cúnshì we Gvray móngkà gømlā rì, Dvciq lvpat nvng sing we Dvrá Mongkà rì nøngmaqí yv’ng lúnlvm, Tá lúnlvm, síngràl lúnlvm dvpvt nø jø’ngjøngni nøngmaq taq v-tiqlvm ra mà-vl Kv’m jø’ng Kv’m lvm mvdøng vchvk íe. Yadang rvt, Kristu Gvray ínø Kàshvbóng mvshøl rì mvmè taqkèní lvngò nø nøngmaqí síngràl lúnlvm dvpvt shvngøt dvtú nø cv’nàe.
Wervt Vpø’ íwe pèmè vnvmchvngmaq, Vkangpè Yesu àng tiqgóng tiqlvpat taqkèní cv’na we mvshøl rì svng nøngmaqí vpø’ shvring, cvndvgøm vtoshì taqsórí shvkse wáshì laqlúni, Kvmnønt Pvlàcè nònggùn kūnga lùshì laqlúnì wvng dvshat nø nònggùn zí mvyøngè, shvngbe svng oqā.
