“Svrabín Koqkvm Leo (XIV)Ukraine Dàmmvdaq nvng v-ní baq wà baq vhø’m we”
Svrabín Koqkvm pè Leo (XIV) nø Ukraine Dàmmvdaq Volodymyr Zelensky nvng may shvlá (18) ni Angò Svrabín Koqkvmò bvnlì svng Dvrá shang bvnlì wà we Missa Kàgvp nóng we angni taq Vatican yv’ngø nvmlat baq vtō nø vhøm bø’ì. Vkvt tiqbaq vhø’m we taq Svrabín Koqkvmò Rvngtúng narshì chøm me íwe Castel Gandolfo yv’ngø ya lvban Nár v-ní ni dørøm tut taq lvksan vhø’m bø’ì.
Vhø’m bø’ì mvtú tvrarì mvdvmø zvndvtut bø’nbung we Russia Ukraine mvdvmø gòng we mvzvn tvràrì nø mvdøng àng mvtúrì ínø, v-ní lvp vhø’m mv-ngushì lòng í, mongzøl we tvrà svng vrvng lvm rvt íē. Dvtut bøn Mvzvn rì rvt gønshaq mvmè cø’m á:mì rì dvpvt Svrabín Koqkvm pè taqkèní gø gvzà Nønt mvbyō lvm vhø’m bø’à tvrà, Ukraine mongzøngcerì dvpvt vjúrøt dvbvng lvm dang, àngmaq nvng nitvp dø vl dang, mvdìng mvman dø tvpm vhø’mò dūngrùng vsvngrì nvng Døngku vsvng nvng vrúm vcar rvgaq vl Cvmrérì tiqdvshaqí Døngku vsvngrì nvng vhø’m lúnlvm rvt, Vatican chè:pm ku Ukraine nvng Russia móngdànò kønmvng rì kèní Vatican yv’ng V-maqká:mshì nø mongzøl lvm tvra dvpvt vrashì lvm vtō we dang vkvtdø íwe tvrà rì, vrashì bø’ì tvrà rì svng Vatican Shvngkà dvkangdvp kèní shá dvzvr dvtanshì bø’ì.
Ukraine Dàmmvdaq nø Svrabín Koqkvm pè Leo (XIV) nvng vhø’m bø’ì mèpvng, Shvngkà tvp rìo røtkà rì svng vrá vtv’nà we taq Svrabín Koqkvm Leo XIV nvng vhø’m mv-ngushì lòng, Vaticanò dvbù Nøntní vtōshì lòng, téwa nø Mvzvn vdòng Ukraine Cvmrérì kaq Russia cildvp kèní tvp bø’à bvnlì nvng singdø gø shvdømà taqsórí nònggùn kūnga zí a lvm dvpvt àng taqkèní gvzà Nøntshøm dvbù lún we dang, Mvzvn vdòng Cvmrérì kaq svng tvp bø’à lòng nø gvzàni mvnggá gvlo tvrà i dang, tvp vhø’m bø’à we Cvmrérì angpè angmèmaq rì, àngnvm angchvngrì kaq svng vrá shvlángà nø vtv’nga lvm dvpvt røtnímshì bø’ì dang, Ukraine taqkèní Mongzøl lvm lòng svng mvlún lunhøq dvnúng lvm dang, nøngmaq ínø Mongzøl lòng svng vlømshàì dang, Cilmvzvn lòng svng dvdv’ng mvyø dang, Wervt móngdàn Mongzøl lvm lòng svng vtoshì lúnlvm dvpvt Svrabín Koqkvm nvng Vatican kèní Ukraine nvng Russia v-ní móngdànò móng øp shølshú vgo rì vhø’m lúnlvm dvpvt dvzaqshì nø, Cilmvzvn tiqdvshaqí nar lúnlvm rvt dvnúng dvbvngà lvm dvpvt gø téwa vlømshì dang vtánshì bø’ì.
