(Angwa Nár (15), C nøng (Sunday Homily, Year C)
Shvngbe mvdvm Gvray mongzøl lòng laqtuqdaq. Shvngbe svng Pamvra. Yalvban nø Angwa Nár (15) lvban wà lvban svng gòng bø’shà.
Rø vdu we Gvray móngkà ciqrì nø, Jøm mongkà ciqrì….
(1) Dvrá dvshat 30:10-14
(2) Koloshi 1:15-20
(3) Luka 10:25-37
Vpø’ íwe pèmè vnvmchvngmaq, yalvban nø, Vkangpè Yesu í shvlá we Samari vsvng tiqgø’ò ” Kà shvbóng lvpat mvshøl” taqkèní shvngøt dètú í we lvban angni tiqni gø íe.
Dvrá dvshat 30:10-14 ……
Moshi i shiwa vsvngrì kaq dvshat nø shvdøm we taq,
Gvray gvsangí øpkang we dvrá rì nø vrúm vcar yv’ng vl we mø-í; Na nvng tvpwa vlē, Nào nonggup taq gø, nào dòngnønt taqgø vlē, wā shvdømè.
Koloshi 1:15-20… Shvngømré nø Kristuò ang góng íe. Ang góng ni Shvngømréò vgo gø í nø, angké dvbúng pè gø í nø, shì rì kèní gv̀l daqà we vlatpè íe, wàe.
Luka 10:25-37 …… Yesu í nø shvlá we Samari vsvng tiqgø’ò ” Kà shvbóng mvshøl” kèní shvngøt dvtú dang yv’nglúnshìe.
Vpø’ íwe pèmè vnvmchvngmaq, Mongkà taq nøngmaq shvngbe svng gø Vkangpè í røtkà taqkèní røt nø shvdømè. Vkvtdø shvdøm we taq (3) Kà taqkèní dvshat nø nònggùn zí mvyøng we taq;-
(1) Nà, Ngào Tiqdvng vsvng nø Kagø’ í mà? wàe.
Yalòng røt Kà nø Dvrá Svra vji tiqpè i Yesu svng vløtlvm rvt røtnò kà tiqlòng íe. Dvrá svra pe nø ang Dìngman lòng svng dvtan mvyø’ rvt røtnò lòng íe. Wè kvt, Vkangpè Yesuí nø shvlá we Samari vsvng tiqpèo Kà shvbóng mvshøl svng shø’naòe. Yalòng Kà shvbóng mvshøl nø jø’ngjøngni bø’n yangì lòng íe.
Angnøng (2000) nøng rvzé vle a:mì nigø, kádvgvp gø àngshvr dø wā vlē. Vsvng mvmè kaq svng vlíng vpo dvzvr nø, tiqdvng vsvng kaq dvshá zā tùbùm dvbvng dvzvrè. Ngào Tiqdvng vsvng nø, Ra vchvk we Kagø’ kaq íni gø, dvshá zā tùbùm dvbvng shì gø íe.
(2) “Kà shvbóng taq vbá vsvngrì “
Kàshvbóng yalòng taq vbá we tiqgø’ nvng tiqgø kaq svng èyvng lúngò dvgvp, téwa rvnaq dø síngràl lúnlvm lòng svng vlømshìe. Yericho mvring kaq svng dì we tvrà nø nøngmaq taqø kádvgvp gø vlē. Vbá we vsvngrì nø:- (1) Dvrá vji Svra (2) Tølv’m vhø’mò vsvng (3) Shvrúngshú tiqpè (4) Lewi vsvng tiqgø’ (5) Samari vsvng tiqgø’ (Samaritan); yarì íē. Tølv’m vhø’mò vsvng kadv’ngte dvshà mvhøt vhø’mò lòng svng mvdøng gvl nø mvshøn. Vrá Samari vsvng wepè í Tølv’m vhø’mò pè kaq svng kadv’ngte mvkok dvdí shóngnøntní cì lvjvngà bø’à lòng svng gø mvdøng gvl nø shøn bø’à lòng gø mø-í. Àngde nvng nitvp gø’ nø Kagø’ íe? wàwe røtkà svng, mvdøng lá lúnlvm rvt vchvk mvdøng íe. Dvshà mvhøt, yvklvm vhø’mò gø’ svng dvshá zā gø’ nø, wè gø’ dvpvt tiqdvng vsvng íe, wà Kà íē.
(3) ” Dvciq lvpat gønshaq cúnshì lúnlvm rvt Ngàí pa wá ràe mà?” wā røtkà svng vrá pø’nàoe we taq..
Yalòng nø, Dvrá Svra vji pè taqkèní nvmlat ‘røtkà’ gø íe. Yesuí nø wè Dvrá Svra vji pè svng, Dvrá Kàru bok ( Law) taq kadø vrù shaq í dang, Na í kadøwā rø èlúnòe mà? a:lòe.
Wepèí vtà:ngò nø, “‘Nà nø nà tiq nøt shvngbeí gø, nà dòngnøt shvngbeí gø, nà nònggùn kùngà shvngbeí gø, nà shánøt shvngbeí gø, Vkàngpè nà Gvray kaq shóngshì ràe.’ Vrá, ‘Nà vdè góng svng èshóngshi dø, nà tiqdv́ng vsvng kaq svng gø shóngshì ràe,’ wa vrūe,” a:lòe.
Yesuí ang svng, “Nà natv́nshi kà vdūe; nà yadøni èwáshì kvtnø gø̀nshaq cúnshi èlún lú:ngòe,” a:lòe. Iwe dvrá vjì wepè nø, ang nø døngman pè í we dvtanshi mvyǿ rvtnø Yesu svng, “Wedø í nìnø, ngà tiqdv́ng vsvng nø kagǿ íe ma?” wa rø:tnòe.
Vkvtdø røtnímshì rvt, Yesu angí
” Bø’ngshang we Kà shvbóng, shvla we, Samari pèo tvrà svng shø’naòe. Yesu angí shø’na dv’ng bø’à mèpvng, Dvrá vji pè svng Nàí dèda:mò, we vshø̀m gǿ kèní tø̄lv́m rìí dvlá bǿà we vsvng yapè ang tiqdv́ng vsvng nø kagǿ íe ma?” a:lòe. Dvrá vjì pèí, “Ang svng dvsházāò pè mv̀ng íe,” a:lòe. Wekvt Yesuí ang svng, “Nàí gø welòng dø tiqdvchá èwàá:mò,” a:lò tvrà svng yv’ngshìe.
Vpø’ íwe pèmè vnvmchvngmaq, “Nà i gø welòng dø tiqdvchá èwàá:mò,” wa Kà nø nøngmaq shvngbe svng gø bvnlì tvle we, dvzvr we, vpnóngshì dvzvr we shvkse wáshì dvzvr we móngkà gø íe.
