” Svrabín Koqkvm Leo (XIV) Rvngtung Vjúrøt Narshì lvm shvra Tøngnø Chøm me kaq dì we “
Svrabín Koqkvm Leo XIV nø Angí vzàng kaq dvnung lvm bvnlì taq shá dvzvr dø tiqdvchá July tiq shvlá vdòng taqø Svrabín Koqkvmò Rvngtung Vjúrøtshì lvm Tøngnø Chøm me íwe Castel Gandolfo kaq svng vle a:mì ni taq dì bø’ì we íe. Svrabín Koqkvm dì a:mi we taq vtō vsvngrì nvmgang we dvhø taq rvtø ang Nayi ku Vsvng mvngpòng dvkø’m shì támshì nø tvlú dvgø’shì bø’ì. Wè mvdvmø Castel Gandolfo Myoqnē Wunji pè gø wè ni dvcøp dvgø’ò yv’ng àng tiqgóng taqkèní lúm bø’ì.
Svrabín Koqkvm nø July (6) ni, Nár ni dørøm tut ang rvtø Nayi (5:00pm) taq shosho wace tuq bø’ì. Wè Rvngtung Tøngnø Chøm me nø Roma Myoq kèní (25) kilometers (23) míng dvngte wā vrúmè. Svrabín Koqkvm nø July (6) ni kèní (20) ni høq vjúrøtshì nø narshì bø’ì.
Svrabín Koqkvm dì lvm tvrà svng shá dvzv’r dang rvt gø pamvra wá mvyø’ we shvngømré rì mvdvm, roqgār vzúngshú yé rì, Svrabín Koqkvm kaq røt Kà taqkèní røtlvm shvngkà tvp rì, wè rvgaq vsvngrì, Køni móngdàn zaqle rì nø tiqgø’ ku íni gø, Døngku ku í ni gø tvlú wáshì nø tuq bø’ì. Wè rì mvdvm Shvrúng dvzømshú rì gø yv’ng lúnshìe.
Vsvng mvngpòng nø ‘ Svrabín Koqkvm kaq Vtō íe ‘ wā vrù we Kàru gøm rì lángshìe. Tvlú dvgø’shì we Shvrúng dvzømshú mvdò rì taqkèní gø Svrabín Koqkvm dìlvm lòng svng cāò taqsórí Rosary vjúrøtnòe.
Svrabín Koqkvmò Nvmlat dvnúngshì lòng nø angpè angmèmaqò putbøm taq vl Cvmré cerì kaq svng shvmv’naòe. Lvpat gø’ngzøl gø’ngyang rì kaq svng Pamvra wàe. Wè lvpat gø’ngzøl gø’ngyang me la mvdvmø Conchita wàwe Spain Svmaré tiqme vle. Ang nø Zaragoza kèní ínø Roma kaq Narshì zaqle wang búng lòng íe. Ang ínø Svrabín Koqkvmò Wur svng zø’m nø Pamvra wànø, ‘ Svrabín Koqkvm svng gvzà shóngshøngè’ wā Angí dvbù Nøntshøm lún bø’à tvrà shøn bø’à. Svrabín Koqkvm pè í gø vsvng mvngpòng kaq gvzà Nøntshøm dvbù we í Pamvra wa sórí í Tøngnø Chøm me vdòng kaq svng gòng bø’ì. Tøngnø Chøm me vdòng taqgø Svrabín Koqkvm svng vtō lvm rvt, wè Tøngnø Chøm meò dvtú shú bvnlì angkang Svrado pè Vincenzo Viva၊ Andrea Tamburelli၊ Myoqnē Wunji pè Alberto De Angelis maq í nø tvlú dvgø’shìe.
Svrabín Koqkvm pèo Rvngtung narshì lvm shvra nø Saint Vilanova Sasvna wamà vdòng taq vlē. Zong øp nø Poland dvci Shvrúngshú pè Don Tadeusz Rozmus vjúrøt shì nø narshìe. Wè Sasvna wamào Noqngøm tøngnø vdòng taqø tuqdaq we July (13) ni taq Svrabín Koqkvm í Missa Noqngøm lvm íe.
Wè lvngpvng yv’ngø dvzømshú (4) gø’ ripmè . Wè rì nø Sagrada Døngku vsvng Cvmrérìo àngmvdò taq vl ri íe. Yalòng mvdò svng Colombian móngdàn yv’ng shøq yangà nø, ang mvdòo angmè angké Tøngnø Chøm me nø Roma Myoq taqø vlē. Wè (4) gø’ nø Vatican taq Svrabín Koqkvm nvng tiqdø vyáng mvlùng vjúrøt shì bø’ì mèpvng Svrabín Koqkvm svng Pamvra wā wàlvm rvt wè shvra yv’ng di lúngì. Wè rì nø Svrabín Koqkvm Leo (XIV) nvng shvra mvmè yv’ng vjúrøt shì bø’ì nø vkvt boq wā nitvp dø pamvra wá lún dang, gvzà Nøntshøm dvbù lún dang, ya shvra yv’ng vtoshì dang, Svrabín Koqkvmò mvnggá rì dvpvt vjúrøt dvbvng dang, vzàng lvp wá ra we bvnlì mvtúrì rvtø mvmè lùshì ra we i rvt Svrabín Koqkvmò bvnlìrì dvpvt vjúrøt dvbvng we nvng tiqdø lúm lvm dang dvzømshú Sister me laò Dòngnønt mvsøn kèní dvbù Nøntshøm shvwéshì we í dvtán nø shøn bø’ì.
