Dølòng kèní svmi gwìn cè
Vsvng tiqgǿ yv́ngø vne 2 lòng vle wae. Welòng nø nøngmaqí yv́ng lúnì we vne nvng rvwvl nøt vne wawe nøt vgo mv́rcì vne lòng íe wae. Nøng maqí yv́nglúnì we vne lòng nø vdè shvnvng gùr gùr høm taqø vlwe dvrè rì svng wa yv́nglúnì we ínø̀ rvwvl nøt vgo mv́rcì vne lòng taqkèní nø yv́ngshì we vne lòngí mvyv̀ng kéò we dangrì shvngbe svng we vne lòngí yv́ngshì nø dvdøp lúnòe.
Yv́ngshì we nøngmaqò vne lòngí mv́ng mv́ng wa yv̀ng lú:ngì nø mamvshv́l shì lòng dvgvp we rvwvl nøt vne lòng taqkèní welòng nø kapà íe wawe svng àngí zvngwa yv̀ngò nø dvdøpa lúnwe íe.
Yv́ngshì we vne lòng svng àngpv̀n pv̀n vlíng dvzv́r lún longwe ínìgø rvwvl nøt vne lòng svng nø dvløt gvzv̀m we àngdang dang svng gø vgv́m lúnwe íe. Rvcángcèrì taq nø kv́mnøt wawe vne tiqlòng vrá mvzv́n vlwe íe. Yv́ng lúnwe vne lòngí gø mvyv́ngshì, rvwvl nøt wawe vgo mv́rcì vne lòngí gø mvyv́ng bøwe kvt kv́mnøt wawe vne lòng kèní yvng shàì we ie.
Tiqkvt kvt nøngmaq lvpat tvrà taq shìwvt àngpv̀n pv̀n vkǿn ranø̀ shvlawe, mashvla we dvdøp rvwvl gø mvlún shì, pàgø mvyv́ng shì rawe rvtø̀ rì vl long we kvt kv́mnøt wawe vne lòngí yv̀ng lú:ngì wekvt wa gálòng svng vtoshì lúnì we íe.
Cún shàì we lvpat ni vrv̀mò tvrà taq vdè shvnvng gùr gùr taqø vl we dvrè rì nvng vzø̀m nø, vtoq vtip lún yv́ng lún we nø yv́ng shì we vne lòng kèní ílonge. Vdè shvnvng taq mǿí nø vneí mvyv́ng shìwe tiq dang dang svng yv́ng shá dvdøp lúnlv́m dvpvt rvtnø rvwvl nøt, zitnøt wawe vne lòng kèní dvjaq nø yv́ngrà long we íe.
Kv́mnøt wawe vne lòng mv̀ng nø we mvdàm téwa zìdang vhángvm we íe. Vdè taqkèní gø dvdam dvdøp mvdáng lúnshì, yv́ng gø mvyv́ng shìwe tvrà tiqlòng svng kv́mnøt wawe vneí dvjaqì nø vtoshàìe.
Vdè kaqsvng shóngwám shì we vsv̀ngrì kaq vrá shóngshì we tvrà nø yùl longe. Ínìgø vdè yv́ng svng mvshóng wv́mshì we vdèò ngàshà gǿ svng shóngnøt zílv́m walòng nø kadøgø yùl we tvrà mǿí long. Kv́mnøt wawe Gvray yv́ngkèní tuqlong we ìshøt jejú kèní mǿí nìnø kadøgø bǿn daq longwe mǿí.
Wervtnø kv́mnøt vne wawe lòng nø vdè lvpat døwe tvrà taq gáwe svmi gwin cè tiqlòng ku vdè lvpat tvrà svng tvrà shølā we írvt kv́mnøt vne kadvgvp gø shvmv́ng shì mvdaq we íe.
