“Sasvna Rvmá taq Dvzømshú bvnlì wà vsvngrì wáshì lúnlvm dvpvt Svrabín Koqkvm í dvkv’m”
Nár ni vrvm vsvng mvngpòngò vhø’m mv-ngushì we nvng v-yáng mvlung ( Angelu) vjúrøt we taqø Svrabín Koqkvm Leo XIV í kømngøm rá ì we Vjúrøt mvdò kaq svng nøngmaq shvngbe nø dvbùshang Sasvna bvnlì wà we taqø go lòng vtoshì lú:nì rì íe, walòng mvtú svng mvtushì nø Angwa Kv’mì we zidvng kèní angdèo ni v-rvm lvpat taq Shvkse wáshì taqsórí vpnóngshì vsvngrì ílúnlvm rvt dvkv’m bø’ì.
July shvlá ( 6 ) ni Nár ni, vsvng mvngpòng nvng vhø’m we taq Dvzvr Luka dvbùshvng mongkà svng mvtu nø Sasvna me nø dvbùshang Sasvna bvnlì wà we lvpat í dang dvdvm vjáng taqsórí dvtit tvle bø’à.
Dvzvr Mongkà taq vbá we Dvzvr (72) pè svng Kristu í dvzvr we àng dvkv’m Kà mvturì svng mvtu nø dvbùshang Mongkà dvráò vlømshì ra nø vsvng dvci pvn vrvm dvpvt dvdvmshi we mvnggá i dang, dvkø’m lvm ra mvmè vlē. Bvnlì wà vsvngrì mvng mvluq wàwe Mongkà ciqrì svng bø’na we taq, Mònggvn yachang nø tin gvyaq we vhaq vjángshì we shaqrì í øp we vhø’m v-du nigø denialò àngmaqò Nønt mvsøn vdòng taqø mashvla naqciq riq lòng svng mvrøt we, Dìngman lòng svng lá mvn we dvnúng nø wá lúnòe. Yarì nø dvciq lvpat gønshaq svng vlømshìe wàwe mvtú lòng íe.
Gvray gvsang nø dvshá zā mvkok dvdí shóngnønt dvnzøng we dvyø wun pè íe. Dvciq lvpat gønshaq chutchvng we, Kømzøp we lvpat, tiqlvpat Dø’ngvng lòng svng vlømshì we Nønt rì svng vsvngrìo mvsøn nvrøm vdòng taqø dvpø madá wùnàe. Íni gø, Vkangpèo ne taqkèní yv’nglúngò dvgvp shvla we dvyø rì tiqhvncè wā dvkøm lvm dvtán lúnìe.
Kvmnøntnò bvnlì wà Vsvngrì ewáshìnøng. Nàmaqò Kvmnønt nø vtvnglvp dvcaq we dvzik tiqlòng mø-í lvm rvt vyáshì ràe. Mònggvn nvng Sasvna me í nø rvtø lún kvtwā lúm we Kvmnønt lòng svng nònggùn mvzí. Shvra v-rvm taqø Muqlang móngdàn tvrà shvkse wáshì lún we, Shvrúng we shóngnøntní lúm rì, Sasvna meò Rvmá hvng taqø Nønt mvsøn kūnga vzàm taqkèní bvnlì wà we dvzømshú rvzvngcerì kaq svng Shvrúngè. shú:ngwvm shìe.
Shvngømré chè:pm ku angpoq angpoq shaqcvm vhø’mò sórí lúm rì, shvngømré Bóy rì taq tiqkvt lakvt wā lúm vsvngrì luqmvnshì nø, Gvray gvsangò Sasvna Rvmá taqø ni vrvm dvkøm vsvngrì, dvzømshú bvnlì wà vsvngrì mvluq wàdang svng vtoshì lún ràe.
Sasvna me svng kadø wā øp kang lúnlvm, kadøwā dvnúng lúnlvm wàwe Deory dvdvm Nønt rì gvzà luq mvra. Jø’ngjøng ra vchvk lòng nø Gvray gvsang nvng vzø’m vzàp lúnò rì, Vjúrøt lòng yv’ngkèní Gvray gvsangò jèjú ìshøt svng lá lúnò rì luqmvnshì lvm rvt nøngmaqí vjúrøt lvm dvpvt vchvkngè.
Sasvna Rvmá taqø Muqlang móngdàn nvng sing dø Shvkse wáshì lúnlvm dvpvt dvzvr lvm rvt tvlú dvgø’shì lún bø’à rì, Sasvna Kona taqø Dìngman we bvnlì wà vsvngrì í lúnlvm vlún vkvng rì zí lúnlvm yarì vchvkngè.
Vmè Maria nø nøngmaq shvngbèo chutchvng we tvrà taqø lúm lúnlvm rvt dvbù Nøntní (Yes) wā vtánshì yangì pàdø Àng taqkèní vp tvle a nø vjúrøt dvbvng lòng svng røtnímshì nø nøngmaq shvngbe gø Gvray gvsangò Muqlang móngdàn dvpvt Mongzøl byō we dvzømshú bvnlì wà vsvngrì wáshì laqlúnì wā lvngdøm taq vjúrøt dvtøm bø’à.
