Queenship of Mary (August 22)
Vzàng kaq kám vsv̀ngrì nø Yesu àngmè Mari svng dvgùng shvring we zaywàrì, àngtaqkèní Gvray kaqsvng dvtit tvleā lv́m vzúrøt shìwe tvrà rì taq dvzaq shìráì. ( Ang nø rīng we í long nø, Ang svng nø vháng vtv̄ng pè Angcè Pè, v̄l lú:ngòe. Vrá, Vkàngpè Gvrayí angkop angkàng Dawi koqkv́m rúngtv̀ng gø Ang svng zí lú:ngòe. Luka 1:32)
Wedang nvng singnø̀ kám vsv̀ngrì tiqmaq taqkèni Yesu àngmè Mari nø vháng vtangwe Gvray àngcèpè Yaku chø̀m taqø vle wanø̀ dvdàm shìwe tvrà rìgø v̀l yv̀ngì we íe. Catholic shvngø̀mré vdòng taq shvngø̀mré mvshǿl dvtøp shúrì taqkèní vru ráà we nø St. Gregorina Zuzen nø Gv̀mzø̀ koqkám pèò àngmè íwe dø tiqdvchá móng vsv̀ngrì ò àngmè gø íe. Pàwálv́m wani àngtaqkèní Gv̀mzø̀ koqkámpè svng shvzvtā ráà wervt íe wae.
Gvray paqzí vdèrì taqkèní nø mvrà shèrwe chø̀myo vjø̀ng nø Yesu cvmré góng svng vtoshì shìwe Gvray àngmè íwervt pv́nmv́n dvrèrì, vsv̀ngrì shvngbe ò àngmè ni íe wanø̀ vru yv̀ngà. St. Alphonse shø̀nyv̀ngì we nø koqkám kayaò àngmè íwe Mari nø koqkám mè wawe dvgùng gùngshv̀ng nvng vpǿwe dang shvngø̀mré vdòng taq mvsvt ráà wegø íe.
Svrabín koqkámpè Pious (12) nø àngò dvtú kàru taq Ad Caeli Reginam koqkám mè Mari íwe dang vtàn yv̀ngà. Svrabín koqkámpè Pious (9) shø̀n yv̀ngì we taq Mari nø nøng kaqsvng chutcháng lv́m tvrà taq bashà vsv̀ng tiqgǿ taqkèní vsv̀ng dvcì shvngbe dvpvt dvzaq shì ráì we íe wanø̀ shvngøt dvtú ráà. Àngkaq svng nø rvgaq mvdàm nvng muqlàng taqlvp dvpvt koqkámmè tiqgǿ ku shv̀nshér vsv̀ngrì nvng muqlàng dvzv́r rì taqkèní dvgùng shvringò mè gø íe.
Àngtaqkèní Gvray kaqsvng dvtit tvleā we vjúrøt kàrì svng gø Gvrayí táā nø shvmv́n dvgǿnā wegø íe. Svrabín koqkámpè Pious (12) dvtut dvtú ráà we nø August 22 ni svng mvrà shèrwe chø̀myo vjø̀ngmè nø Kàngpè Yesu svng shøqlv́m cv̀mré góng svng vtoshì we Mari ò bóy wàlv́m dvtú ráà we íe. Àngnø kám vsv̀ngrì shvngbe ò nøt vlǿmrà nvng nøt shvlǿmshú tiqgǿ gø íe wae.
Wervtnø̀ nøngmaq lvpat tvrà rì taq nøt dvshàlv́m shìwvtrì vhǿm lú:ngì we rvtø̀ rì taq Gvray kaq vjúrøt kàrì Yesu àngmè Mari yv́ngkèní dvtit tvleā lv́m røtním shàì. Àng kaqsvng vpǿ shvring laqlúnì. Lòngzàpè Yesu yv́ngkèní mòngzø̀lwe jejú gømpaqrì vtoshì lúnlv́m rvt àngmè Mari yv́ngkèní dvtit tvle vjúrøt dvzaq shàì.
