Yesuí vjúrø:tnò we
Yh 17:1-11
Mòngkà ètashìnøngwe pè, mè, vnvm, vchvng maq dèni tálúnì we Gvray dvbùshvng mòngkà taq Shvrúng shú rì shvngbeò shvrúng shú vgo íwe Yesuí vjúrø:tnò we mòngkà svng tálúnì wegø íe. Dvzv́r Polo í dèkám ráshàwe kà taq nàmaqí èwànøng we bv̀nlìrì shvngbe nø Gvray àng ngø̀r dvgùng dvpvt wa laqí wanø nònggùn zikà kèní dèkám ráshà wegø íe.
Dèniò Yohan dvbùshvng mòngkà taqgø Yesu nø Kàngpè Gvray àng ngø̀r dvgùng shvring lv́m dvpvt dì ráì we nvng Yesu nø Gvray àngcè pè vjǿng ni íwe dang kámwe vsvngrì nø dvciq lvpat gønshaq lúnlv́m íwe dang kàciq gv̀l ráà we íe.
Kàngpè Gvray nø lòngzàpè kaq rvgaq mvdàm svng dvzv́rvtnà we àng mvtú nø Kàngpè Gvray nø vsvngrì kaq vzíshaq íwe døngmvn we dvsháza shóngnøt svng lòngzàpè Yesu rvt bashà vsvngrì shvngbe taqkèní síngshá nø lòngzàpè Yesu kaq kadvgvp gø dvgùng shvring, kám lúnlv́m dvpvt ni íe.
Yesu krístu nø àngcǿ àngcèrì kaq svng àngò jàng, nøt laqyà shvlá rì kaq svng jøng jǿng ni cv́n dvgøm dvzaq shìlv́m, tiqgǿ nvng tiqgø tasvng vzø̀m vzvp nø mòngzø̀l dø v́l lún lv́m dvpvt Kàngpè Gvray kaq vjúrøtā wegø íe.
Nøngmaq shvnbe gø Yesuò nøt laqyà wáshì wedø dang vrv̀m taq Gvray kaq kám vlǿm shàì we taqsórí àngò móngdàn dvpvt dvzaq dvkáng shìlv́m wàì.
