Vatican, 23 May 2025 ni taq Dynasty kèní dvkang we, synod ò dvtú dang rì svng vtv’nà we bvnlì svng shá dvzvr mvyø’e.
Yalòng bvnlì nø Digital gurwang taq sasvna bvnlìrì svng téwa gwà dø dvnúng lúnlvm rvt mvnggá gvlshì lòng íe. Lvngdøm dvtøm dvtán we Kàru taq dvtanshì dø tiqdvchá, Digital gurwang nø kàdvtut lòng nvng Shvngkà dvkang we shvra í lúnlvm dvpvt kūnga vzàm rì í dvzaq dvkvngshì lvm rvt ra vchvkngè. Mvring rvgaq taq Digital taqkèní Gvray Sasvna bvnlì dvshér shi we taq nònggùn zí tùbùm lúnlvm gø gvzà vchvkngè. Yalòng dynasty ínø Digital Sasvna bvnlì wà rì nvng Catholic Vsvng mvmè shvrúng rìò Vsher Jubilee bóy svng 2025 July 28,29 ni taqø wàlvm rvt dvkang bø’à.
Yalòng Bóy nø Zilangré rìò Vsher Jubilee bóy mvmè te dø wàlvm í nø, Digital gurwang taqø Sasvna bvnlì wà rì lúmlvm ínø, rvzvngcerìo Kvmnønt tvrà taq mvdøng mvtūa we vpø’ shvring Shvngkà dvshér rì dvpvt mvnggá gvlshì lòng íe.
Bóyò tvyø rì taq, Paqzi zí we, vjúrøt we, v-rvm vrá we, Shvkse wáshì lòng nvng tāsvng tālè dvtit tvle lvm rì vbá nø, Bóy svng v-ní høq wàlvm í bø’ì. Nvmlat (1)ni taq Paqzi zi we nvng Pvlàcè tvrà dvgø’ā lvm rvt mvnggá gvlshìe. V-ní (2)ni wàni taq, Vsher Jubilee bóy wàlvm, mvkø’m mvdø’p rì dvtit tvle we wàlvm nvng Sasvna bvnlì wàlvm Nønt mvsøn svng vrá kūnga vzàm zi we wàlvm rvt mvnggá gvlshì dvdu shì bø’ì.
Bøng cv’ngshì lvm rvt vkvt kèní cv’ng lúnshì bø’ì dang shá dvzvr mvyø’e. Ang tvyø rì svng Kømzøp dø shá mèyø’ ni yalòng websites https://www.digitalismissio.org/ yv’ng yv’nglúnshìe.
Yalòng bvnlì nø denila bat Tong laqya angdvja taqø shvngømré ínø téwa Sasvna bvnlì wálún lvm rvt tùbùm dvbvng vlún lúngè, wā vlømshìe. Svrabín Koqkvm Leo XIV shø’n we taq,
” Shànshér Pvlàcèo Gá lòng nvng kūnga í, Gvray gvsangò mvkok dvdí shóngnønt mvdvm mvtú nø v-rvm vrá lòngò gømlā í we Mònggvn yachang svng tá:nà we cúnshì we Gvray gvsang móngkà svng dvshvng we Nønt vjvng shì dvzvr we vlún vkvng Sasvna bvnlì wáshì lòng svng vrvngì.”
Yalòng bvnlì tvyø svng nònggùn zí ínø denilaò vbat Digital gurwang mvr taq tiqdvshaqí tvlíng lún lòng svng vtá:nshì ku vyvngroqshú bvnlì nvng singdø mvkok lúnlvm dvpvt oqa wa bø’ì. Gvray gvsangò shóngnøntní, vpø’nønt kèní Dynasty shvngkà dø vrùa lvm røtnímshìe.
