“Vroqā lòng nvng Shvkse wáshì lòng yv’ngkèní Mongzøl lòng svng dvtánà leqlúnøng.”
Yalvban Narni taq, Dvzvr pè la í we Dvzvr Piter nvng Polo nío Bóy ni taqø Nár vrvm yv’ng vsvng mvngpòng nvng vhø’m mv-ngushì we nvng Angelus ( vyáng mvlùng) vjúrøt shì lòng nø Svrabín Koqkvm Leo XIV í Dvzvr Piter Noqngøm tømø kømngøm rá ì we Vjúrøt shì rì kaq Pamvra wànø, rvzvngcerìo v-rvm vrá lòng, Kvmnønt tvrà svng vtoshì nø vwángshì lòng nvng Gvray Dvrá Mongkà dvpvt gønshaq dvbø’mshì shvkse wáshì bø’ì lòng, Kømzøp we shvnìp shvnar vdòng yv’ngkèní Sasvname v-rvm vrá mongzøl lòng svng téwa dø’ngvng dvzvr dang, Roma Sasvna me nvmlat mvpvng vrvng shì lúngì we Dvzvrì í we St. Piter nvng St. Polo maqò Shvwi nvng Shvkse wáshì lòng mvdvmø vrvngshì Sasvna me svng dvdvm taqsórí, Dvzvrì taqkèní dèni høqshaq yàng màdvt ká:mì rvt dvshà mvhøt yvklvm angpvn pvn vhø’m shì, kvmnønt rvt gønshaq zíshì høqshaq dvshá Kvmshì bø’ì we rvzvngcerìo Kvmnønt zaqshøp svng dvgùng shvring dang dvkv’m bø’ì.
Ya mvtú nø, rvzvngcerì svng v-rvm vrá dvzvr we Shvwi wànø gø shøn shvlàe. Rvzvngcerì vrvm vrá lòng nø Gvray gvsang kaq dakdvdvm vjáng we taq nønt vrá lòng tiqmé wā mø-í, Kristu svng Kv’m dang shvkse wáshì lòng nø Kv’m vsvngrì í vtoshì lún we dvshà mvhøt lvm lòng rvt gø íe. Chaqdvp dvtan màlún, yv’ng màlún we íni gø rvzvngcerì dvhø taqø dø’ngvng we v-rvm vrá lòng vl we dang, yalòng nø rvzvngcerì v-rvm vrá lòngò angké mvsøn nvrøm í dang, Roma Myoq Sasvna me nø mvkok dvdí shóngnønt taqø rvzvngcerì shvngbe v-rvm vrá lvm dvpvt Dvzvr Piter nvng Polo nío Shvwi kèní mvsat dingsat shvdø’ngà we shvra gø íe.
Zvndvtut Svrabín Koqkvm Leo í dvbùshang Mongkà taqkèní dvtan we Sasvna meò mvpvng angké lóngtv’ng íwe Dvzvr Piterò tvrà dang svng dvdvm vjáng taqsórí Vkangpè Kristu nø Dìngman we lóngtv’ng vrvngò rì í gú:rò we lóng svng Gvray gvsang ínø Chøm wè Chøm køp svng zø’m øp lúnò we lóng ku lvngò dang mvshøl tiqlvpat taqø
Vsvng àng mvdòo vzàng lvp vl dønglvm, Dvzvr Piter nvng Polo nío Sun mvdv’ngshì we Svrabín Koqkvm rúng vrvngshì shvra nø vkvt rvzvngcerì shvngbèo v-rvm vrá i lòngò mvpvng angké shvra í á:mì.
Roma Myoq vtvnglvp yv’ngø àng vtóng vl dø rvzvngcerì í wáshì lòng nø, Roma Myoq vdòng yv’ngø wáshì lòng svng Shvkse dvtanshì lòng í dang Vkangpè mèpvng cvnìrì nø Kristu í dvtú we ìshøt vl Dvrá (
dang svng cvndvgøm sórí bø’nbung tvrà rì svng rvcvngshì ra íe.
Dvrá Rvpra lòng svng vlømshì we, Mvkok dvdí lòng nvng Nønt mvsøn kūnga vnø’n rì svng tiqlvng mà le v-tu v-re we nvng vhø’m v-du we dang, íni gø yarì nø Gvray gvsangò pòngbang svng háng lúnlvm rvt lvpat taq vl v-du lòng íwe dang, Gvray gvsangò pòngbang nø Angò tiqdvng vsvngrì taqø shór nø vlíng vpo lvm yv’ngkèní tvlíng shì lvm kaq dì we tvrà yv’nggúngø angmaq lvpat rì svng rvtø vrvm Háng dvtánòe. Shànshér vsvngrì lvpat nø vroqā lòng yv’ngkèní shøqā lòng íe.
Zvndvtut Shànshér vsvng tvrà rì dang nvng singdø Svrabín Koqkvm Leo XIV í Shànshér we vsvngrìo Kømzøp lòng yv’ngkèní shøq lúngà lòng íwe dang Mongkà taq nøngmaqí vpø’ shvring i Dvzvrìo tvrà rì svng dvtán we shvra taqø àngmaqò Mvjò lòng svng màā nø dvtánà we mà-vl. Àngmaqo ring vtv’ng lòng nø Cìpshì vpnóngshì yv’ngkèní dvtú we lúnshì lòng íe. Dvzvr Piter nvng Polo ní svng Vkangpè Yesuí nø tiqbaq wā go we mø-í àngmaq svng angbaq baq go yangà we íe. Yalòng nø, Vkangpè Yesu í nø nøngmaq svng tiqbaq mø-í angbaq baq ègo íe walòng svng vlømshì dvzvrè.
Lvngdøm dvtøm taqsórí Svrabyin Koqkvm í Namaq shvngbe nø Døngku vdòng taqkèní, angdèo rvgaq, vsvng mvngpòng vdòng taqkèní pvngshì nø v-rvm vrá lòng svng dvbung gø wáshì ràe . Vkangpè Yesu Hkristu nø nøngmaq kaq svng Kv’m dø, nøngmaq gø Vkangpè bøng vdòng taqø tāsvng tālè Kv’m ràe.
Shvngømré vdòng Kv’m lòng nvng rvzvngcerì dvhø tiqgø’ nvng tiqgø’ Kv’mì lòng nø tāsvng tālè vcíng ké ì lòng nvng vroqā lòng i tùbùm dvbvng rvt íē. Rvweng lòng nvng mvdìng mvman dvnzøng lòng nø Mònggvn yachang taqø Sasvna me nø bøbøløm we Chøm tiq Chøm nvng mongzøl lòng svng cv’na we shvra tiqlòng í lúnlvm rvt Dvzvr Piter nvng Polo, Vmè Maria i vjú vra røtním dvbvng lòng svng røtnímshì sórí v-yv’ng mvlung vjúrøt Noqngøm lòng svng dvtøp shì bø’ì.
