“Svrabín Koqkvm Leo (XIV) Roma Sasvna vdòng bvnlì wà Shvrúngshú rì kaq vto nø vhø’m we “

Svrabín Koqkvm Leo (XIV) nø Angò Sasvna í we Roma Sasvna vdòng bvnlì wà Shvrúngshú rì, Brother rì, Shvrúngshú zong mang rì nvng vhø’m we i Muqlang móngdàn dvpvt namaq rvtø vrvm vpnóng dvzømshì we, gvzà luqwe dvbùshang bvnlìrì taqø nàmaqò shvrúng we, Gvray dvkv’m Kà Dvrá rì svng vsvng í mvdø’m mvshá dø cvndvgøm nø cúnshì we, lvpat taq dvshà mvhøt yvklvm rì, mvdøng mvman dø v-tu v-re we Kà rì vdòng kèní Dø’ngvng dø cúnshì è lúnøng rvt namaq svng gvzà oqā íe, wā dvdvm taqsórí dvkv’m bø’à.
Svrabín Koqkvm í nø Angò Mongkà svng shini mvpvngò dvgvp Shvrúngshú rì, Brother rì svng shvgùn shvring sórí táshì dø Wur v-pèt ā nø dvgùng zí lvm røtnímshì bø’ì. Gvray gvsang mvrdvng yv’ngø gvzà dvbùlvm ra íe.

Svrabín Koqkvm í nø Shvrúngshú rì, Brother rì svng vpø’ shvring nø Pamvra wā taqsórí v-toq v-tìp dvman bø’ì nø
Vkvtdø vhø’m dvman lòng nø àngmaq nvng téwa nitvp lúnlvm ínø, tiqnønt tiqyung dí lúnlvm rvt i dang, àngmaq gø’ vrvm dvzømshì we bvnlìrì dang vrvm nø Gvray mvrdvng taqgø, Gvray gvsat vjø’n nønt vdòng taqgø gvzà vpø’ nø ring dang dvkv’m bø’ì. Nøngmaqò Pvlàcè lvpat svng kupgār nø øpshì lún ràe.
Roma Sasvna nø dvgá Sasvna nvng màbóng nø shvrlvwvr íe. Sasvna vdòng bvnlì wà Shvrúngshú rì nø Mònggvn Dø’ngtáng móngdàn vrvm yv’ngkèní rì íē. Vkvtdø í rvt Svrabín Koqkvm í nø mvtú (3) dang taqkèní vrashì nø dvkv’m bø’à.

Nvmlat (1) mvtú nø Gvray gvsangò shóngnønt mvsøn nvng nitvp dø vl lúnlvm, Gvray gvsang nvng Gvray gvsang nvng vzø’m lvm rvt íē. Shvrúngshú rì nø Ang nvng vzø’m we íe, màzøm dang svng gø shvlá wā síngràl shálúnshìe.
Sasvna bvnlì wà rì tāsvng tālè vzø’m ra we íni gø chaqdvp taqø Tong laqya màbóng we í rvt Sasvna bvnlì wà dvzømshú rì vdòng taq tiqni tiqhvncè yvklvm rì nø vhø’m shìe.

Sasvna bvnlì wà vsvngrì gø Pvlàcè lvpat svng vgám we ang dvja rì taqkèní lutshì vcar dø vl rì mø-í. Yadang svng mvtushì nø Svrabín Koqkvm í nø Angò Sasvna bvnlì wà vdòng dvzømshú rì nvng tiqdø dí lúnlvm rvt dvzaqshì dang íe. Vkvtdø í kvtwa Shvrúngshú rì vrvm nø angdèo bvnlìrì svng dvnúng shì we taq vpø’ nø dvnúng lúnlvm íē. Vkvtdø wá lúnlvm rvt Vkangpè Yesuò Mongkà svng Tá ràe wàwe Pvlàcè lvpat taqø Àng rø wáshì we Shvrúngshú rìò angnvm angchvng jø’nggvp lvpat svng vrá dvtøp lún ràe. Muqhøm vzø’mè wàwe taq Angde bvnlì wà we Sasvna nvng muqhøm wáshì we, tiqdø dvnúngshì nø dì lòng svng wàe. Vkvtdø wáshì nìnø dvbùshang bvnlìrì mvdvmø bongzùp dø vl lúnlvm rvt mvnggá gvlshì lòng íe.

(2) Shvbóng shvmvtshì lvm nvng Kv’mvm vrvm we lvpat í ràe.

Svrabín Koqkvm vrashì mvyø’ we (2) Kà wà Kà nø Shvbóng shvmvtshì ra í lvm dvpvt íe. Svrabín Koqkvm Leo (XIV)í nø May (31) ni taq Brother gvba rì svng Shvrúngshú vyá tiqkvt ká:mào Missa Noqngøm vdòng taq shangshang wā í lúnlvm dvpvt gvzà vchvk we dang, dvzvr Poloò Mongkà taq ‘ Ngà kadø Cúnshì lòng svng Namaqí èshánøngè’ wā mongkà kèní dvtánàe. Angpè tiqgø’ ku íni gø, vyvngroqshú tiqpèo Nønt mvsøn kèní wè rì kaq svng Kv’m nø vpø’ò rì, shvbóng shvmvtshì lvm laqya shvlá dvtanò rì í lúnlvm dvpvt vpnóng dvzaqshì lúnlvm rvt dvkv’m bø’ì.

Vsvng vrvm taqø zidvng rì vlē. Vkangpè Yesu í gø shvlá wā síngà lúnè. Íni gø nøngmaqí nø shø’n mvtømshì we jèjú ìshøt vtōshì lún bø’shà. Nøngmaq kaq svng gvzà ring we pøhaqm tvle shaq íe. Wè jèjú ìshøt, pøhaqm rì svng roqgār rì lòng nø Gvray Sasvna bvnlì taqø shvlá vtv’ng dø dvzømshàì lòng íe. Dvzømshú nø Kà shvdiq dø’ngvng ra we íe. Vkangpè Yesu í gō lòng svng vrá tiqkvt nàtōshì

Vkangpè Yesu í gō lòng svng vrá tiqkvt nàtōshì. Vkvtdø Na kaq nvmlat go dvgvp vl we shóngnønt pvn svng vrá nàtōshì nø debù. Wè shóngnønt vzaqshi lòng í rvcvngshì lún we bvnlìrì svng wáshìe. Rvgaqtømò tvràrì Shvlángshì lòng svng gø vzaqshi we í wáshìe. Cìpshì we lvpat svng cúnshì taqsórí nònggùn kūnga lùshì lúnì vsvng vrvm dvpvt, Svmaré, lvngaré, àngshvra mà rvweng gvlshì we Gvray dvbùshang Mongkà Dvrá svng téwa dvtan lúnlvm íē.

(3) Vzaqshi lvm lòng svng yilshi lvm rvt mèdezàqshìni.

Svrabín Koqkvm vrashì we (3) Kà wà Kà nø Shvrúngshú rì nø rvtø lvngcha nvng bø’nbung we banchvk rì svng svrelvm rì mø-í. Kà dvtutshú rìò Nyan Bvnya taqkèní pvranà lvm rì íē. Denial Mònggvn vdòng taq íni gø, nøngmaqò kurwang rì taq bø’nbung we banchvk rì rvt nøngmaq svreshì ràe, shóngshì ràe. Dvmmá rì svng vtoshì ràe. Mvdìng mvman we Upvdi, vlún vkvng, vsvng mvngpòng mvr taq rvweng vhø’m dang rì vkvtdø í we banchvk rì vhø’m lvm vlē. Wè angdvja rìò dvtut rì í we dvshà mvhøt yvklvm lvm rì vsvng vrvmì vhø’mìe. Kagø’ taq íni gø, Ka shvra taq i íni gø shvralvm mà-vl. Vkvtdø bø’nbung lòng nø Roma dø íwe Myoq rì vdòng taq i íni gø vhø’m v-duè.

Vkangpè Yesu í nø Shvrúngshú àngshvr rì kaq denial vpat taq bø’nbung sháò we banchvk rì svng vhø’m nø pvranà lúnlvm rvt go lòng íe. Vkvtdø bø’nbung rì nø nøngmaqò kūnga vzàm kèní wá lúnlvm mø-í. Shvrúngshú rì nø wè banchvk rì svng zø’m lúnlvm, dvbùshang Mongkà Dvrá nvng vbóng vtuk dø pvranà lúnlvm, dvbùshang móngkà taqkèní cúnshì nø chaqdvp dvtan we i shvkse wáshì lúnlvm shvlá vtv’ng vlún vkvng íe wā vtoshì ràe, wàe. Mè à:tshìnøngni. Dvzvr rìò vpnóngshì lvpat nø vsvng vrvm kaq Paqzi cv’na we Paqzi zong pàdø i ràe. Wè shvra taqø Gvray gvsangò móngdàn svng Nønt mv-gør, Nønt shuk lvm rì dvhø kadø wā vrvng lvm dang cvnshì lún ràe.

Svrabín Koqkvm Leo (XIV)ò mvnggá

Gvzà màlé dvgvp Àng yá mvzøq vdòng Shànshér we Shvrúngshú rì mvmè bø’nbung ráì. We rì nø dvshà mvhøt lvm rì svng dvbùshang Dvrá nvng kadø wā mv-ngu nø cúnshì lúnlvm lòng svng shálúnòe. Vzaqshi taqsórí dvnúng lúnlvm dvkv’mè. Vkvtdø dvnúng lúnlvm rvt kūnga svng vsvng í ni gø dvzaq dvkvngshì nø jór á:mì we Shànshér we vsvngrì í wun ráà we Sher we dvyø rì kèní kūnga vzàm svng lùshì laqlúnì. Shóngshøng we vnvmchvngmaq Namaq nvng nitvp dø vl lvm íe. Ngào shóngnønt, Namaq nvng tiqdø dí mvyøng nønt vdòng taq namaq nvng vl lvm íe wā dvkv’m taqsórí vkvtdø vhø’m mv-ngushì lòng svng dvtø’mshì bø’ì.