St. Ireneus
St. Ireneus nø Catholic shvngø̀mré vdòng Gvray paqzí vdè tiqgǿ íyv̀ngì. Àng kaqsvng Asia Mina vdòng Christian rìò àngcè pè wanø bø̀ng shvng yv̀ngì. St. Ireneus nø shvrúng shú tiqgǿ bø̀n ráì mèpvng Lyon myuq wamà svng dvbùshvng bv̀nlì wàlv́m dìyv̀:ngì. We shvrà taqø Bishop Pontinus ò bv̀nlì shvnāp tiqgǿ ku dvzaq shì yv̀:ngì.
AD 177 nǿng svng tuq ráì wekvt Gv̀mzø̀ koqkv́mpè Orelius nø Lyon myuq wamà vdòng taq vsvngrì kaq shvnip shvnvr we, vré shì we wáshì ráì. Wedø íwe dvjà svng Svrabín koqkv́mpè Eleutherius kaq shvngkà dvtá lv́m dvpvt St. Ireneus nø Roma kaq dì yv̀ngì. St. Ireneus àng Roma kèní vtáng ráì wekvt Bishop Pontinus nvng shvrúng shúrì nø rvcángcè kámnøt rvt shvt vhǿm yv̀:ngà. We mèpvng St. Ireneus nø Bishop vya rúng tàng taq rúng vdu yv̀:ngì we íe.
St. Ireneus nø àng vsvk (24) nǿng taqni Lyon myuq wamàò Svrado tiqgǿ bø̀n ráì. We rvtø̀ taq St. Ireneus taqkèní Gaul wamà taqø gø noqngø̀m chø̀m rì mvme vrang yv̀:ngà nø rvcángcè kám vsvngrì gø luqmvn shìráì.
St. Ireneus àngnø Gvray shv̀nshér kàru dang paqzí vdè tiqgǿ íwe taq shvngø̀mré kaq svng vtù gvsat rawe vsvngrì kaq shá dvzit nø shǿn vtàn we kàru bok rì gø gvzà vru yv̀:ngà. Àngí vruò we kàru bok rì nø Greek dvcì kà, Latin dvcì kà nvng dvgá kàpv̀ng rì mvme pv̀n kèní tvlíng nø vru ráà we íe.
St. Ireneus nø Gvray tvrà mòngkà kàru bok rì vru nø shvngøt dvtú we nv̀mlaq svra tiqgǿ gø íe. Dvzv́r rìò shvngøt dvtú we shvkse kàru bok rì nø kám vsvngrì dvpvt kámnøt zǿm shvngáng shì shvrà tiqlòng íráì.
AD 190 nøng taq St. Ireneus nø Svrabín koqkv́mpè Vitor (1) yv́ng svng Asia Svrado mvdò kaq shvngømré kèní shvmv́ng we mvwà lv́m røt ním yv̀:ngà wegø íe. Welòng nø Roma vtóng dvrá nvng sing we íe. Téwa zun bóy wáshì we àngni nvng sing nø zip tiqlòng gø íyv̀:ngì.
St. Jerome shø̀ng yv̀:ngì we taq St. Ireneus nø AD 202 Septimius Severus ò vbat taq kámnøt tvrà dvrá vdòngø shvt vhǿm yv̀:ngà wanø vtàn ráà we íe.
