Vshøm gø’ Tiqgóng Gvray Trinity Bóy lvban (Nár) ni
Yalvban Rø vdu we Gvray móngkà ciqrì nø;-
Kàshvgøp 8:22-31
Roma 5:1-5
Yohan 16:12-15
Kàshvgøp 8:22-31 ……Rvgaq shini v́l mvpv́ngshì dvgvp kèníni,
Shìgùngrì shini màshvrú:ngò dvgvp, mvrùlri shini mvtà:mò dvgvp kèní Paqzi Bønyà svng Gvray gvsangí gvsat vjø’n yangà.
Roma 5:1-5 …… Dvzvr Polo í Roma shvngømré rì kaq svng shvngøt dvtú we taq, nøngmaq nø Gvray ngø̀rdvgùng mvngú lúnlv́m vlǿmshàì sórí dvbú mvnshàìe, wā shvngøt dvtú nø shø’nè. Yadø wa mvtaq, dvshà mvhø:tnìrì taq gø nøngmaq nø shaqshaqwa dvbùìe; pàwálv́m wani dvshà mvhøt lù:ngí nø tønzánnøt svng dvbung lú:ngòe, wā dvkv’mè.
Yawhan 16:12-15 ….. Vpè vdá dv́ngte shvngbe nø Ngàò èǿngange. Wedø í rvtnø, Pvlàcèí nø Ngà kàrì lá:ngò nø namaq svng dètá daqnø̀ng èshøl daqnøngè wàe.
Vpø’ íwe pèmè vnvmchvngmaq, Gvray tiqgóng taq Vshøm gø’ vl (TRINITY)Trinita tvrà dang dvshvng mvyø’ we taq,
Mvdvm kaq tálúnì we Trinita wàwe “Kà” nø Latin Kàru chang “Trinitas” wā Kàru chang taqkèní íē. English Kà taqkèní nø Trinity wā shø’n shìe. Nøngmaq rvzvngcerìo Kvmnønt angké mvpvng Dìngman lòng (fundamental truth)nø, Gvray tiqpè taq Vshøm gø’ (Trinity)vl lòng íe. Yalòng nø Ring vtv’ng gømlā lòng íe.Trinity nø Bāsha svngzacè ang dvja taqkèní tiqdvtàng(transcendent) vl lòng íe. Bāsha rìò síngràl Nyan Bvnya í síngràl lúnlvm rvzaqè. Vkangpè Yesu Kristu í shvngøt dvtú cv’na yv’ngkèní wā, yalòng ring vtv’ng gømlā me svng tá lúnì lòng íe. Yalòng gømlā taq, Vpè, Angcè pè, Shànshér Pvlàcè wàwe vshøm gø’ vl lòng íe.
“Gvray tiqpè tiqlòng wa”
Gvray tiqpè(Divine Nature) tiqlòng taq Ang gø’ (Persons) ku vshøm gø’ vlē. Íni gø, Gvray gvsang nø tiqlòng wā (One God) íe, wà Kà íē. Tiqkvtkvt “tiqpè ” nvng “ang gø” wà Kà chang shøni we taq vlé sháìe. Wervt Gvray tiqgø’, pè vshøm gø’, wā vlé nø shø’n sháìe. Wervt vbóng vtuk dø láng ràe. Vlé mvdaq we “Kàru” í we svng dvdvm vshat ràe.
Trinity (mø-í ni) Trinita nø tiqlòng wā íwe Gvrayò gømlā lòng svng vta:nàe. Hkristan Kvmnønt tvrà taqø Gvray vshøm gø’ kaq svng laq mvnoq ì. Ang gø’ ku vshøm gø’ vl ni gø, tiqpè taq wa bongzøp íe, wà Kà íē. Yalòng nø Bāsha síngràl Nyan Bvnya taqkèní mvsíng mv-ràlshi we rvnaq vtv’ng gømlā me íē. Catholic shvngømré Dvrá kàru bokme mvr rø gøm CCC 253-255 taq Trinity tvrà mvmè vbø’nshaq dvtanshaq íe. Trinity tvrà nø nøngmaqò “Kv’m ra tvrà”(Doctrine) tiqlòng gø íe. Trinita taq vl we vshøm gø’ nø tiqgø’ nvng tiqgø màbóng. Ang gø’ ku màbóng we íni gø, Ngø’r dvgùng gùngshàng we taq dvchá íe. Vpè, Angcè pè, Shànshér Pvlàcè vshøm gø’ nø tāsvng tālè vzø’m vzàpmè.
“TRINITA mvshøl “
Yalòng Nár Angni nø, Shànshér we TRINITY (TRINITA) svng angni tiqni ku mvsatshì nø Noqngøm shvgùn i we, Vpø’ shvring shvta i we Nár(lvban) wànø, nøngmaqò shvngømré me angké taqkèní mvsat yangà we angni íe.Trinity svng Noqngøm shvgùn shvring shvta i lòng nø, Vpè, Angcè pè, Shànshér Pvlàcè svng tiqdø dvchá Noqngøm shvgùn shvring shvta i lòng íe.
Trinity tvrà svng èshøn lúngò dvgvp, Trinity í wáshì bvnlìrì svng vtv’nà we wáshì kvtwa téwa síngràl lúnlvm vlē. Ang dùngce ku èshøn lúngò dvgvp…
(1)Vpè Gvray gvsangí Muqlang rvgaq ídv’ngte pvn vrvm shvngbe svng mvnòe.
(2)Angcè pè nø, Bāsha svngzacè wáshì taqsórí wurgvng mvdvm shì bø’ì, Zuná:mì nø, Mònggvn Bāsha rvzvngcerì kaq svng shiwvt Mvra vdòng kèní chut èchvng bø’shà.
(3)Shànshér Pvlàcè nø, Mònggvn rvgaqtøm kaq svng dí dvzv’r we vhø’mò gø’ í nø, dvshàn dvshér, gønshaq jèjú zi ,. Nønt shvløm lún gø’ wā, shønì nø shvgùn shvring, shvta i lòng íe.
“Jøm mongkà taq Vshøm gø’ Tiqgóng Gvray ( Trinity) Tvrà Dang ” yv’nglúnshìe.
- Nvmlat nvmpang 1:26.. Gvrayí “Nøngmaq shø̀ngmang í dv̀ngwa cà:nì nø nøngmaq mv̀rshv̀m dø sv́ngzàcè má:nì.”
- Nvmlat nvmpang 11:7.. Có, nøngmaq lāshìá:mì nø, angmaq nø angmaq kà màzakélv́m dvpvt, angmaq tagǿ tākà shǿn dvzv́rá:mì,*” wae.
- Luka 1:26-38…. Muqlàng dvzv́r Gabriel ínø Maria svng Shvngkà shvlá dvtáò nø, Shànshér Pvlàcèo Ngø’r dvgùng pòngbang kūnga vzàm tvrà rì vbáè.
- Mati 3:16-17….Yesu Tìløp ka:mshì dvgvp, Shànshér Pvlàcè làshì daqì.
- Yohan dvbùshang Mongkà 15:18: tut vdòng taq, Yesu angí ni Shànshér Pvlàcèo tvrà dang svng shøn yangà.
- Mati 28:19…. Vkangpè Yesu ínø Dvzvr pè la svng Vpè, Angcè pè, Shànshér Pvlàcè bøng taqkèní Tìløp Sacramentu svng zí lúnlvm dvkv’m yangà.
Vpø’ íwe pèmè vnvmchvngmaq, nøngmaq shvngømré rvzvngcerì gø’ vrvm taqkèní (Trinity) Vshøm gø’ Tiqgóng Gvray tvrà svng shvngømréme kèní shvngøt dvtú we vdòng taq síngràl nø Pvlàcè jèjú gømlā, chutchvng we gønshaq Kvmnønt vtoshì lún bø’shà. Wervt Vpø’ íwe pèmè vnvmchvngmaq cúnshàì we lvpat taq nøngmaqí vtōshì lún bø’shà we Pvlàcè gønshaq jèjú (Sacramentu) jèjú rì svng vpø’ shvring taqsórí Vpè, Angcè pè, Shànshér Pvlàcè Vshøm gø’ Tiqgóng Gvray(Trinity) Trinita
svng shvgùn shvring dvgùngmuq Noqngømì nø Kvmnønt jór nònggùn kūnga lùshàì.. wvng dvshat nø nònggùn zí mvyøngè.
Shvngbe mvdvm, (Trinity) Vshøm gø’ Tiqgóng Gvray mongzøl lòng vtoshì laqlúnì. Shvngbe svng oqā.
