“Happy Easter ” Vkangpè Yesu shì yv’ngkèní Zuná:mì we Zun Bóyò

Shvngbe mvdvm “Happy Easter ” Vkangpè Yesu shì yv’ngkèní Zuná:mì we Zun Bóyò Mongzøl lòng” vtōshì laqlúnì.Shvngbe svng Pàmvrà.

“Vkangpè Hkristu dèni Zunámì, Alleluia, Alleluia!” Vpø’ íwe pèmè vnvmchvngmaq, Dèni nø Happy Easter Zunbóy svng nvmlat wá pvngshì lúngì tvrà mvshøl svng gø tiqdongce dvshvng lvm íe.

Rø vdu we Mongkà ciqrì:-
(1) Dvzvr 10:34a,37-43…. Dvzvr Piter í nø Vkangpè Yesu Kristu cúnshì lvpat mvshøl rì, vrá Shì yv’ngkèní Zun á:mì tvrà mvshøl rì svng dvshangòe.

(2) Koloshi 3:1-4…. Kristu vl we Muqlang móngdàn tvrà svng lá èmvnøng.Namaq svng nø, Kristu nvng tiqdø dvzunshaq èínøng rvtnø, muqlàng taqlap Gvray vbàng pa rung pè Kristu Ang taq vl rì svng nøt nàdǿnshìnø̀ng. Namaq nøt nø rvgaq tø̀mø vlrì svng màdǿnshishaq, muqlàng taqlap vlrì svng lè nàdǿnshìnø̀ng, wā Dvzvr Polo í shvngøt dvtúè. Shvkse wáshì taqsórí dvkv’mè.

(3) Yohan 20:1-9….. Maria Magdalena nø, Yesu kø’mpvtmà we, lóngdùng dvgv̀m yv́ng svng sháng mvgágá dìá:mì kvt, dvgv̀m shø̄ lóng gø̀m vlúshaq í da we svng yangòe. Wervt, Simon Piter nvng Yesu shóngshì we coqcv́n pè ní yv́ng svng vchér á:mi nø dvtáòe, wàe.

Yesu vgo møqò we paqzit dùng gø, laqtun rì nvng tiqyv́ngø mø̀í dø, rvdulshaq shènv̀ng zin we svng à:ngí , àngmaqí yà:ngòe. Vkangpè Yesu Hkristu nø shì yv’ngkèní Zuná:mì lòng Àngmaq Kv’m bø’ì. wàe.

Vpø’ íwe pèmè vnvmchvngmaq Dèni nø, Dvgùng gùngshàng we dvbùlvm Paska Zun Bóy ” Nár lvban ni svng gòng bø’shà. Vkangpè Yesu shì yv’ngkèní zun á:mì lòng nø nøngmaq Ká:mì we kvmnøntnò mvpvng angké nvng chutchvng lòngò mvpvng jór pòngbang gømlā lòng gø íe.

Mongkà taq,..”Vkangpè Yesuò vnàng mà-vl ” dvgvm” svng dvzvrì í yv’nglúnò lòng nø, Vkangpè Yesu zun á:mì tvrà svng Nvmlat yv’ngkèní, dvzvr rì àngmaqí shvláwā mvsíng mv-ràlò lòng svng yv’nglún shìe. Dvbùshang Mongkà (4) lòngø, wè vnàng mà-vl we “dvgvm ” ( empty tomb) svng Svmaré rì í vzàng yv’ng lúnò nø dvshvngòe. Vkangpè Yesu Hkristu shì yv’ngkèní Zuná:mì lòng nøngmaq ká:mì lòng nø dālvm jór pòngbang jèjú gømlā ni íē.

“Nár Té Vtv’ng Angni “

Vpø’ íwe pèmè vnvmchvngmaq, Dèni nø “Nár Té Vtv’ng Nár lvban Angni” tiqni gø íe. Dvgá Nár ni v-rvm nø zunbóy Nárnice rì íē, walòng svng gø shø’n mvyøngè. Vkangpè Yesu Zun á:mì lòng í, Shì lvm lòng svng jór lúnshì bø’ì, jór lún bø’shà. Kristu nø Gvray í lòng svng dvtanò lòng gø íē. Vkangpè nø jór pòngbang taqkèní zun á:mì. Àng zun á:mì lòng í, nøngmaq kaq svng vløm ra èzí bø’shà. Ang tiqgóng shvngbe vpnóngshì nø, àngò mvkok dvdí shóngnøntní nøngmaq kaq svng Mvra dòngjø’:pm kèní èchut èchvng bø’shà. Nøngmaq gø àng Vkangpè dø zun lúngì nø, jèjú gønshaq lvpat taq cúnshì lúnlvm í vmè. Cúnshì dezá:r bø’shà walòng svng yv’nglúnshìe, Shálúnshìe.

Vrá nø, “Zunbóy Nø Nvmlat Vzàng wáshì we Bóy ” gø íe, wà Kà svng gø shø’n mvyøngè.

Shvngømré taq wáshì we Kvmnønt Tvrào Bóy rì shvngbe taq, yalòng Zun Bóy nø Nvmlat Vzàng wáshì we bóy tiqlòng gø íe. Shvngbe mvdvmø ring vtv’ng gø, ya Zun Bóy lòng íe. English Kà taqkèní yalòng Zun Bóy svng “Easter ” wā tø shìe. Latin Kà taqkèní nø ” Pascha” wā tøò lòng svng shálún shìe. Vkangpè Yesu Hkristu shì yv’ngkèní Zuná:mì we Bóy svng nø (2) Yamvzùq bé lúngì lvptaq ” Zun Bóy” svng wá pv’shì yangì. AD 325 nøng (Council of Nicea) lìpong me mèpvng kèní wā Ka yv’ng màyv’ng Zun Bóy svng wáshì yangì dang yv’nglúnshìe, shálúnshìe. Yuda vsvngrì ínø ” Shvle Bóy” wā shønò lòng svng shálún shìe ( Bung 12:13). Hkristan rì dvpvt Shvle Bóy, Zun á:mì we Yesu nvng vzø’m lòng svng dvzvr Polo ínø dvshvngòe ( 1Kor5:7).Jø̀ngjǿng èshø̀:nò nìnø namaq nø butdvshi màshú pv̀n èínøng dø tiqdvchá, zidòngsér angshv́r ílv́m rvt butdvshi anglí svng chut ègurnø̀ng. Pàwálv́m wani nøngmaq Shvlē Bóy núnglv́m vyv̀ngcè í pè Kristu gø̄, nøngmaq dvpvt shvrúnglv́m shvt yà:ngà wàe.

“Gvzà Vchvk We Dang” Vpø’ íwe vnvmchvngmaq , Yesu Hkristu Zun á:mì lòng nø, gvzà ni vchvk ngè.” Vrá Kristu Ang svng màdvzūn yà:ngò pà í nìnø, nøngmaqí dvshā:ngì lòng gø vshø̀ng í nø, namaq èkv́mnøng we gø vshø̀ng íe, wā (1Kor 15:14) Dvzvr Polo í shøn yangà.
Shvdømè, dvkv’mè.

Wervt Vpø’ íwe pèmè vnvmchvngmaq, nøngmaq Ká:mì lòng nø Kristu Zun á:mì lòng, dvciq lvpat gønshaq èzí bø’shà lòng íē. Shvngømré me taqkèní shvngøt dvtú we Dvrá Mongkà rì vdòngø Kvmnønt shvdik shì, cvndvgømì lòng gø Vkangpè Yesu kristu shvngøt dvtú lvpkà me rì svng ká:mì long, dvgùng shvring nø dvciq lvpat gønshaq Pvlàcè kvmnønt nònggùn kūnga lùshàì lòng íe.

Wervt Vpø’ íwe pèmè vnvmchvngmaq, kūnga shaq vnø’n nø vléshàì we Mvra rì svng tiqdvshaqí vroqshi nø Vkangpè Yesu Zuná:mì Zun Bóy taq Nønt mvsøn àngshvr,dvbù Nøntní, Kvmnøntní mongzøl dø lúm nø Pvlàcè shagóng Kvmnønt ìshøt jèjú vtōshì laqlúnì, góng laqlúni wvng dvshat sórí nònggùn zí mvyøngè.

Shvngbe í Zun Bóyò Gvray mongzøl lòng vtoshì laqlúnì. Shvngbe svng oqā.