Yesuí Ang coqcv́nrì svng hí zá:lò we (Luka 13:1-15)

Shvngbe mvdvm Gvray mongzøl lòng laqtuqdaq. Shvngbe svng Pàmvrà. Vpø’ íwe pèmè vnvmchvngmaq Dèni Shànshér we Nár vbi ni íē. Yesuí Ang coqcv́nrì svng hí zá:lò we angni gø íe. Dvdvm vjáng nø nònggùn lùshì lvm Gvray móngkà nø, (John 13:1-15) vdòng taqkèní íē.

Vpø’ íwe pèmè vnvmchvngmaq, Vkangpè Yesu shini mvshì vzàng tiqni ra dvgvp Nár vbi yaq taqø coqcvn pè la svng shøn lvm Kà rì, Shvngbe lapmòe, shønòe. Íni gø Vkangpè Yesuò lap Kà rì nø Kà taqkèní wā mø-í chaqdvp vjang laqya Hang Dvla kèní shvngøt dvtú nø dvtáòe, dvdvmòe.

Mvdøng Vkangpè àng lap Kà (3) lòng vlē. Nvmlat tiqlòng nø; Vkangpè Kàgvp nóngpà lòng nvng Kàgvp Sacramentu svng vrvngò lòng íe. V-ní taq; Ang svng tiqlvpat dvdvm màná lvm, Vm-aq lvm bóy me tiqlòng svng dvgø’ dvzvròe. Vshøm; Yalòng svng lvngdøm Vm-aq bóy wā tø’shìe. Dvgá tiqlòng nø Shvrúngshú vya tvleò lòng íe. Wè yaq, Vm-aq bóy taq Vkangpè àngò Kà rì, dvnúngshì lòng nvng tiqdø àng Nønt mvsøn vdòng kèní shóngnønt svng dvtanshì lòng íe.

Vpø’ íwe vnvmchvngmaq, Kristu Gvrayò cúnshì we lvpat mvshøl tvrà yv’nggùng taqø angí wàò we dvshá zā bvnlì, shóngnøntní dvshvngò we móngkà rì, Cìpshì we Shóngnøntní vpnóngshì lòng yarì nø, dvdvm màná mvshvlpvra gømlā rì íe.Vkangpè Yesuí wàò lòng nø shangshang wace íe. Jùqnám paqzit í dvchvt shì nø coqcvn rìò Hí svng zá:lòe. Hí zá:l shìe walòng nø Cìpshì we gømlā mvshvlpvra tiqlòng íe.

Vkangpè Yesuí nø, Cìpshì taqsórí vpnóngshì nø mvkok dvdí shóngnønt svng chaqdvp dvtan yangà pàdø, nøngmaq gø Tiqdvng vsvngrì kaq svng Cìpshì Nøntní, mvkok dvdí shóngnøntní vpnóngshì nø lvpat taq Cúnshì taqsórí shagóng Pvlàcè kvmnønt nònggùn kūnga lùshì laqlúnì wvng dvshat nø nònggùn zí mvyøngè. Shvngbeí Vkangpè Yesuò Mongzøl lòng vtōshì laqlúnì. Shvngbe svng oqā.