Ngàí kàdøng v̄la:tnìni, Ngà kà cv́n dø̄ng we kagǿ í gø shìlòng nø dvciq lvpat mvyv̀ng lú:ngòe.

Ngàí kàdøng v̄la:tnìni, Ngà kà cv́n dø̄ng we kagǿ í gø shìlòng nø dvciq lvpat mvyv̀ng lú:ngò,” a:lòe. Yakà kèní Yuda vsvng rìí Ang svng, “Nà cáng èzv́ngshì we nø akvtni shá bǿshà. Abraham gø, kàdvtutshúri gø shì yà:ngì. Nàí nø, ‘Ngà kà cv́n dø̄ng we kagǿ í gø, shìlòng nø
dvciq lvpat mvtin lú:ngò,’ èwae.
Nà nø shi yà:ngì we nøngmaq vkop Abraham mvdv̀m té èrīng ma? Ang gø shi yà:ngì; kàdvtutshúri gø shì yà:ngì. Nà nø Nà pà ǿnge èlv́nshìe ma?” a:lòe.

Yesuí vtà:ngò nø, “Ngà nø Ngà vdè dvgùng shvringshø̀ng nøngnø, Ngà dvgùng nø pàgø mø̀í. Iwe namaqí, ‘Ang nø nøngmaq Gvray èíaìe,’ èwànø̀ng pè mv̀ng nø Ngà ngø̀r dvgùng shèringang pè Ngà Vpè ni íe.

Vpø’ íwe pèmè vnvmchvngmaq,
Dèniò Gvray gvsang mongkà taq Yuda dvci vsvngrì í téwa síngràl lúnlvm rvzaq lúngì. Abraham àng mvshøl svng Vkangpè Yesuí dvshvngòe. Abraham í gø Vkangpè svng yv’ng lúnò nø dvbù Nøntshømè, wā shøn Kà táò jang, Yuda dvcirì dā a:mì. Nønt vtøp á:mì. Kadø wā bøn laqdaqnì mà?. Vkvtwa Vkangpè nø lvpat (50) nøng gø mà høm. Abraham svng yv’nglún bø’:ngà walòng nø lvjøm mà-vl wàe.Jø’ngjøngni dvdvm vjáng we nvng Vkangpè í ni, àng bø’n mvyø’ lòng svng dvtanòe. dvnúngò lòng svng yv’nglún shìe. Shálún shìe.
Kagvp angli ban taq Gvray gvsang ínø, Kagø’ íe,? walòng svng shá mvyø’e, røtnò dvgvp Ngà nø Ngà øngàe, wā vtánshìe. Ngà vlē, Ngà øngàe wàwe, anglvjøm Kà taqkèní Vkangpè Yesu Hkristu gø vtánshì yangì. Abraham mà-vl dvgvp kèní Ngà nø a:tvleshaq øngàe wàe.

Vpø’ íwe pèmè vnvmchvngmaq, Yesu Kristu Gvray nø Vpè Gvray gvsang yv’ngkèní dì daqi. Vpè Gvray gvsangí dèzv:rà daqshà pè Gvray longzapè íwe dang dvtan nø shø’n lòng íe. Vrá nø, Vkangpè àng tiqgóng taqkèní shvkse wáshì dang gø íē. Wè dø tiqdvchá nøngmaq gø Vkangpè Gvray Dìngman lòng tvrà taq cúnshì nø Shvkse wáshì lúnlvm shvdømè, gō we móngkà gø íe. Shvngbe oqā.