Mt 5:17-19
Dvrá dvgø:mò we
Dèni rø vduwe mòngkà taq Dvrá dvgø:mò we nvng Yesu Kristu tuqra we dang svng yv́nglún shìwe íe. Dvrá dvgøm we tvrà wawe nø vsvng tiqgǿ vrv̀m dvpvt vtoshì lún vdu we vko vkáng tiqlong svng gvrā we tvrà tiqlòng íe. Vránø tiqdv́ng vsvng rì mvdàm gv́lshì ràwe tvrà rì, dvrá rì mvdàm cv́n dvgømā we tvrà gø íe. Vsvng kaya vjú dvpvt vrangshì we cv́n dvgøm dvrá tiqlòng ni íe.
Wervtnø chø̀m dø̀ngku vdòng taq, paqzí zùng vdòng rì taq, róng rì nvng móngdàn vdòng taq cvn dvgøm ràwe dvrá rì gvlshì wenø vsvngrì shvngbe mòngzø̀l dø vrv́m vrá nø vl lúnlv́m dvpvt íe. Wervtnø nø nøngmaq shvngbe nø shvngbe dvpvt shvla we tvra nvng vdu vbóng we tvrà dvpvt wá dvzaq shì ràì wegø íe.
Gvrayò ang dvsháza shóøngnøt nø bashà vsvng rì shvngbe mvdàm shvla we, vdu vbóng we dvrá kèní wáshì we svng yv́nglún shìwe íe. Vránø Gvrayí nø nøngmaq kaqsvng téwa shvla we bv̀nlì tvrà rì taq riplún lv́m té wa àng shóngshì wegø íe.
Kàgvp ànglí vbatò dvrá uqbvdi rì svng gø shvdøng nø shvnvp ráà wegø íe. Nøngmaq rvcáng cèrì taq vdèò shvngø̀mré kèní shvngøt dvtú we Gvray àngò rvcángcè dvrá rì nvng vdèò móngdàn dvrá uqbvdi rì svng cvn dvgøm lv́m døngjá v̀:lì wegø íe.