“Vléshì We Svmaré”

Esaya 43:16-21

Kadvtutshú Esaya ang nonggup kèní shøn we taq, Eyv̀ngnøng, Ngàí angshv́r tiq pv̀n wv̀ng dakngòe, akvtni bōr lú:ngì we, namaqí mèdǿmnøng ma? Rvgaq mvgūng móng taq Ngàí tvrà wv̀ngò nø, rvgaq sérgàng taq rvmèrì shvyǿlv́m íe.
Ngàò rvcv́ngshaq rì svng shvaqlv́m dvpvt, rvgaq mvgūng yv́ng Ngàí tìrì shvyǿngò nø, rvgaq sérgàng yv́ng tìwàngrì bor dvzv́r lúngòe, wàe.

Mongkà (2) Ciq;
Filipi 3:8-14

Dvzvr Polo í Philip shvngømré rì svng shøn we móngkà taq,”
Kristu Yesu ngà Vkàngpè kaq shángò lòng nø, vpǿ vtv̄ng we í rvtnø, ngà vdáng dv́ngte pà ínìgø vjú màvl we wa dvdutnòe (Filipi 3:8) wàe.
Kristu kaq kv́m yv́ng kèní lún we nø døngman lòng mv̀ng íe. Døngman we yalòng nø kv́mnøt rvtnø Gvray kení lún we kømzøp lòng svng Ngà vtv’ngshà Shvrúngè, wàe.

(3) Yohan 8:1-11
Vkangpè Yesuí nø vléshì we Svmaré mè mvdvm Kà rvt we mv-wàlvm dvkv’m yangà dang yv’ng lún shìe.

“Vléshì We Svmaré”

Vpø’ íwe pèmè vnvmchvngmaq, Yuda dvcirìò vtong dvrá taq, vkvtdø vléshì gø’ svng lú:ngì wà:p nø shvt ràe, wànø vrù shaq íe. Yuda Du gamzø shaqrérì ínø vkvtdø vléshì we Svmaré tiqgø’ svng Vkangpè Yesu kaq shøla:tnà. Vkangpè Yesuí nø vkvtdø vléshì we Svmaré mè svng kadø wā Kà rvt lúngò mà? wā shá mvyø’e. Yv’ng mvyø’ e. Mvdøng nø Svmaré mè svng Kà rvt lvm Nønt lúm we mø-í; Yesuí kadø wā Kà rvt lúngò lòng svng gùn dvtøp nø, Mvra cìp lá lúnlvm rvt mvtú láò dang íe. Vkangpè Yesuí nø àngmaq Nønt vjang laqya mv-sher, Nønt dvkoq lòng svng sháò rvt, Kà vwawa dø mvshø’n,” Namaq vdòng taq mvra mà-vl gø’í vzàng ang svng lú:ngì laq wà:pmò, a:lòe.(Yh 8:7)

“Nà svng kagǿí gø kà mèrvt mà?”

Yesu shøn we kà, Namaq vdòng taq mvra mà-vl gø’í vzàng ang svng lú:ngì laq wà:pmò, a:lò kà rvt shaqré rì kèní pv́ngshi nø tiq gǿ mèpvng tiq gǿ loá:mì, wàe. Lv̀ngdø̀m nø Yesu wa làng ráà nø, svmaré mè gø to yv́ngø rip dv̀ng wae.Yesu nø vrá ngángshì lú:ngì nø ang svng, “Svmaré mèá, angmaq kayv́ng íá:mì? Nà svng kagǿí gø kà mèrvt ra ma?” a:lòe. A:ngí, “Vkàngpèá, kagǿí gø kà mèrvt rang,” a:lòe. Wervt Yesuí, “Ngàí gø nà svng kà mvrvt. èlov̄m; akvt kèní kukaq mv̀ng mvrà mèwani,” a:lòe.
(Yh 8:11) Yesuí nø Mvra wàò gø svng yòr yòrce chutnàò we mø-í. Nønt mvsøn vjang laqya vwángshì nø, Tv’n tiqkvt Mvra mv-wàlvm, màléshìlvm walòng svng Shvrúngè, dvkv’mè walòng svng yv’nglúnshìe, shálúnshìe.

Wervt Vpø’ íwe pèmè vnvmchvngmaq, Nøngmaq gø’ vrvm lvpat taq gø Gvray gvsang mvshóngshì we Mvra rì svng Nønt mvsøn vdòng kèní dvshér nø mvsøng shì weí Cúnshì nø Pvlàcè kvmnønt nònggùn kūnga lùshì laqlúnì. Shvngbeí Pvlàcè ìshøt Gvray mongzøl lòng vtoshì laqlúnì. Shvngbe svng oqā.