Shóngnøt wawe lòng nø tasvng kv́mvm kewe kèní bø̀n bung rawe
Dèni vbat taqnø tiqgǿ nvng tiqgǿ kv́mvm màshvla we lvpat vbat svng tuq ráì wegø íe. Téwa dèni bat Social Media mvdàmø vdè taqkèní pàgø wá mèlúnò we dvgvp kèní àngpv̀n pv̀n ku vhúvm we shìwvt àngpv̀n pv̀n dvbu:ngò we rì bø̀n ráì we vbat íráì wervt shømløm we shvrà mv-vl ráì wegø íe.
Vdèí kv́mnøt kèní dvzaqshì nø nàrvng bǿò we kv́mnøt kàciq tiq rì svng tiqdv́ng vsvng, rv̀mnvng rvmchvng rì kaq shǿn nàtàn bǿò we yv́ng kèní shìwvt rì yvklv́m, mvhøt lv́m tvrà rì vhǿ:mò we vsvng rì gø gvzà vlwe íe.
Kagǿ svng gø shǿn màtà:nò wanø dèkv́m shì bøwe mèpvng téwa shvngbe vhúvm we gø gvzàni yv́ng lúnshì we íe. Dèni bat vsvng mvlúngka taq shǿn vtán mvyǿ we kàciq rì gvzà vshøp we ínìgø kagǿ svng shǿn vtàn lv́m mv-vl, lá mvlúnò we vsv̀ng rì gvzà vlwe svng yv́nglún shìwe íe.
Vdèò kàrì shvng tiqsv̀ng mvtang kèní shóngnøt vnàí táā lv́m vsv̀ng rì mv-vl lú:ngì. Kàciq rì svng svdiq døng dø vshøpā lúnwe vsvng, rv̀m nvngrì mv-vl ráì.
Vsv̀ng tiqgǿò shǿn vtàn rawe kàrì svng shvlá wa táā lúnlv́m dvpat zitnøt vháng we vsvng í mvrà. Shvla we paqzí rì zílún, dvshvt lún we vsvng tiqgǿ ílv́m høqshaq bǿn ràwe gø mø-í. Tiqgǿ nvng tiqgǿ vpǿ kewe nøt mvsø̀n, shóngnøt vnà taqkèní táā lúnwe nvng kà svdiq døngā lúnwe nø vchvk mvdø̀ng ni ílonge.
Vsvng tiqmaq taq àngmaq ò lvpat tvrà, kv́mshì we nøt mvsø̀n rì svng àngmaq lvpat rì nvng tvle shìlv́m kvmshì we høqshaq vtànò we vsvng rìgø vl longe. Tiqdv́ng vsvng rìí la shábǿò we ínìnø lvpat tìn lv́m høqshaq vchvk we tvrà rì svng shǿn vchv̀ng lú:ngò we vsvng rì gø ni da-vl dvrni.
Vsvng wawe nø àngmaq yv́ngø vmíng, āna, dvgùng vl longwe rvtø̀ rì taq àngmaq shóngshì dø wáshì sháò we laqyà rì vl longwe gø íe. Wedøni vsvng tiqgǿí dvgá tiqgǿ svng àngò vchvk we lvpat tvrà rì svng shǿn vtàn bǿò wenø vdèò dòngnøt svng tiqdv́ng vsv̀ng kaq góng dvzv́r nø bv́ngkà tv́nāò we nvng gø vbóngvm we ie.
Vsvng rìò kàsvng shóngnøt vnà kèní táā lúnwe vsvng, tiqdv́ng vsvngí kv́mvm vrvmwe vsvng tiqgǿ bǿnlún we vsvng nø shóngnøt wawe ò nv̀mlat hí gán gø íe wae. Shóngnøt wawe lòng nø tasvng kv́mvm kewe kèní bø̀n bung rawe íe. Dèni vbat taq nøngmaq shvngbe nø tiqdv́ng vsvng dvpvt vjú zílún we tiqdang dang cètaq nø rip lún høq nøngmaq shòlaq lvpat taq dvzaq shì ràì wegø íe.
