2 Peter 1:1-2
Yesu Kristu ang vshuq nvng dvzv́r ǿngà pè Simon Piter ngàí, nøngmaq Gvray nvng chv́ng kàngpè Yesu ang døngman long taqkèní nøngmaq døni, dvcháchá vpǿ we kv́mnøt riprà èlún bǿshàrì namaq svng shvrikàru vrongvtnòe. Gvray nvng nøngmaq vkàngpè Yesu svng èshánøng we taqkèní jejú nvng mòngzø̀l lòng nø namaq svng luqtv̀m dø leq zí daqnø̀ng”
Wanø Yesu Kristu nø àngò dòng nøt mvsø̀n rì svng dvzv́rrì kaq zángā lv́m dvpvt yvk we ínìgø làngdø̀m taq shv̀nshér pvlàcè jejú kèní shvngø̀mré ò shølshú vgo íwe dvzv́r Simon Piter ngà wanø̀ vtàn ráà we dang yv́nglún shìe.
Àngò vyv̀ngré rì íwe shvngø̀mré vsvng rvcáng cèrì kaq svng àng døni nøt mvsø̀n gv́lshì lv́m ègòì we dang 1 Piter 5.5 taq “Namaq sholaqrérìé, shaqré rìí øp we lv̀ngpvng ècv̀nnøng. Vrá tāsv̀ng tàle dàzø̄mke we taq namaq nø cipshì lù:ngí juqnv́m env́mshìnøng. Kadø íe wani kàru taq, “Gvrayí nø dvshv́ngshì rì kaq vtùò nø cipshì rì kaq jejú zí daqòe.” wa vru shaq íe.
Rvcángcè, Shvngø̀mré rì svng øp shøl we kv́m vsvng rì nø Servant of servant wawe dvzv́rrì ò dvzv̀r íwe rvt we vdèò kv́m vsvng rì kaq kupgvr we, shvngøt dvtú we ínø̀ we vdèò shvngø̀mré kv́m vsvngrì ò kà svng tá ràwe døngjá svng rí ràwe íe.
Dèniò mòngkà taq nøngmaq nø dvzv́r, vshuq rìò nøt mvsø̀n záng shìràwe dang ku mǿí nø nøngmaq dvhø̀ tiqgǿ nvng tiqgǿ nø cipshìwe nøt mvsø̀n kèní mvkok kérà we dang shvdǿm we íe. Tiqgǿ nvng tiqgǿ dvsháza shóng nøt kèní dvbangā ké ràwe dang íe. Dvzv́r rì ò nøt mvsø̀n záng shìwe tiqgǿ taq vsvk lvpat tewe, cv̀mwe ínìgø dang vrv̀m taq shup wacè bv̀nlì rí sháò we íe.
Shóngnøt dv̀n zø̀ngwe vsv̀ng tiqgǿ dvpvt tasvng tubúm dvbangā kèwe bv̀nlì kadvgvp gø vtvng we mv-vl. Shóngnøt vshøp we tiqgǿ dvpvt nø tiqdv́ng vsv̀ng rìò vjú dvpvt yv̀ngnø dvzøm shìwe gø íe. St. Francis Desel shø̀n yv̀ngì we taq dvgùng gùngshv̀ng tēe wawe nø kadvngshì tēe wawe mǿí. Shóngnøt tewe nøt mvsø̀n wáshì vsv̀ng mv̀ngnø Gvray àngmv́r taq dvgùng té dvzv́r we íe wanø̀ vtàn yv̀:ngà.
Rvcángcè, kv́m vsvng tiqgǿ taq gv́lshì nø cv́n dvgøm dvzaq shìrà we dang rì taq
1. Tiqdv́ng vsvng kaq yv́ng mvtv̀vm we, mvnyam kélv́m wawe nøt mvsø̀n nø vsvng kaq vháng we zìdang svng tuqlún lv́m mv-vl.
2. Dvgoq nøt zv́ng shìnø bv̀nlì wawe tvrà wáshì mvdaq we.
3. Nøt mvsø̀n mùngwe, shiqshv̀n we nø vdè góng vdè svng vpǿ shvring shìwe íe.
4. Gvray àngí dvtú we, àng shóngwám shìwe tvrà rì svng rvcang shàì nø cúnshì ràì e.
5. Yesu Kristu nø shóngnøt kèní àng nøt mvsø̀n, tiqgóng høqshaq zíshì we íe. Vdèí vtoshì èlúnò we jejú ìshøt rì svng gø tiqdv́ng vsv̀ng rì kaq vwánā lún lv́m gø laqni vchvk we íe.