Pán vshat caò we dvzømshú
Luka 12:36-38
“Angkàng pè tuq rā kvt pán vshat nø ca dáò we svng yv̀ng bǿò nìnø, vshuq werìí nø ìshøt ìgv̀n lú:nòe.”
Nøngmaq tiqgǿ vrv̀m nø vdè ò chø̀m vsv̀ng mø̀í ni rvnvng rvmchvng rì kèní tiqgǿ gǿ shìvm wekvt nøt dvyól shàì we vsvng rì wa íshàe.
Vránø nøng maq dvgv̀m shvnvng nvng dí nàdu long dvgvp nøt taq tiqshíng íwe nøt yòl nøt, svre nøt, mvréza nøt, mvchyaq nøt rì bø̀nbung rawe gø íe. Vdè nvng tvpní shàì we vsvng rì vlevm wekvt rvyù rvyóng we, vdèò rvmnvng shvlá nvng vsvr vduvm we nøt yòl nøt rì, vlǿm shìrà vmvngvm we dø íwe yòl nøt mvsø̀n rì kèní shø̀ngran shàìe.
Kadvngshì shø̀ngran kéì nø mvchyaq nøt kèní yòl we ínìgø vlevm gø nø vlevm we wa íe. Kadøgø vtv́ng mvlún shì. Wedø íwe dvjà àngpv̀n pv̀n rì nø rvgaq mvdàm taq rvtø̀ vrv̀m vhǿ:mì we svng yv̀:ngì nø vdèò lvpat tvrà taq dvcøp dvgǿ shìlv́m tvrà rì gvzà vlwe svng shvdǿm wegø íe.
Rvtø̀ vmø ke pvlàcè dvpvt, Gvray àngò móngdàn dvpvt tvlú dvgǿ shì lúnlv́m shvdǿm we íe. Vdè ò lvpat nø kani, kayaq, ka rvtø̀ taq vlevm we kagø ígø shá mvlúnì. Wervt vdè ò lvpat cúnshàì we rvtø̀ vdèò pvlàcè, shagóng dvpvt gø, tiqdv́ng vsvngrì kaq vjú zílún we vsvng tiqgǿ kugø cúnshì lúnlv́m dvzaqshì ràwe dang shvdǿm we íe.
Mvdàm kaq tálún bǿshàwe vlevm we vsvng rì, rvtø̀ rì svng yv̀:ngì nø nøt vwáng shì lúnlv́m nvng rvtø̀ svng caì we vsvngrì mvwá shìlv́m, rvtø̀ vrv̀m, nari, second vrvm nø Gvray àng dvpvt dvlú íhøq dvgǿ shì lúnlv́m dvzaq shàì.
Shvngbe mvdàm Gvray shvmv́n dvgǿngwe jejú laqtuq daq!