Cáng vtv́ng ra we svng vyáshì rà we
Luka 11:26
“Wekvt ang vtv́ngvm nø, ang mvdv̀mø té mvgvm we cáng dvgá shvngøt lòng shøla:tnà nø weri shvngbe tòng nø weyv́ngø vlvme. Wekvt vsvng wegǿ mèpvng vl long we laqyà nø, vzv̀ng mvdv̀mø té mvgvm we ívme,” a:lòe.
Svmaré chø̀myo mè nø tiq lvbán naq høq mòngkà mvngu vjú røt shì bǿì mèpvng tiqnv̀m shá vlíng vpo we tiqlòng svng angí vtoshì lúnòe. Ang wedø mòngkà mvngu vjú røt shì we lv̀ngdø̀m angni taq angò shølshú pè svng røt kà tiqkà røtnòe.
“Vkvt kèní ngàí kapà wá vdue má? ngà taq pvlàcè dang kèní àngwà laqyà rì, nøt mvsø̀n rì nø rvmnvng rì yv́ng svng vtv́n lv́m nøt mvwáng shø̀ngv́mà. Ya lòng svng nga taqkèní kadø wá vdue má?” wanø røtnò e.
Wedøni nøng maq lvpat tvrà taq gø tiqlòng lòng svng ègur bǿò wekvt tiqlòng lòng nø tvle v́l ràlong we rvtø̀ rì vhǿmìe. Paqká aqwe tiqgǿí paqká aqlv́m láng vduvm wekvt welòng tvle tìshu aq longe. Nøt mvsø̀n kù:ngà vnǿn rawe rvtø̀ rì taq vsv̀ng wa we nø tòniò àngwa tvrà svng vrá tuqvm we bǿn sháò we íe.
Tiqmaq taq tokèní zìdang mvdàm téwa dvchiqvm we gø vlwe svng yv́nglún shìwe íe. Kà shvbóng vru rapv̀n, gani dø íwe ya tiqgǿ svng lvpat àngshv́r shvlutā we shvrà tiqlòng lòng svng ègv̀l bǿò nø shvlá:mì wanø̀ shèlo bǿò mè pvng ang shvrà yv́ng svng tuqvm dvgvp to vzv̀ng kaq mvdàm té wa sùngvm we vsv̀ng rì nøng maq gùr gùr taq gvzà yv́ng lúnì we íe.
Vlé shìbøwe mvrà svng nøt èlíngshì bø mèpvng welòng svng kadø wa zv̀n dvtut cv́n dvgøm lv́m ímá? Ngànshàpè svng gvsat mvngan lún we kù:ngà, Màshvla we tvrà svng gvsat lúnwe kù:ngà vdèí lún bǿ:ngà wanø èkv́m shìbø we kvt kèní nø kadø íwe dvløt gvzv̀m ra pv̀n taq ínìgø vle lún shì we íe.
Vle bǿì we 2024 nøng taq shv̀ngkà dvp tiqlòng taqkèní Pope Francis kaq svng røt kà tiqlòng røtnòe. Wekà nø “American President rvcvng lv́m bóy taq Svmare shøl shú nvng lvngà ré shølshú vní gǿ kèní kadø svng nà taqkèní nàtoòe wa røt nòe.” Wekvt Pope Francis taqkení “àngní shòní gø svng ngàí vto lv́m mv-vl Pàwálv́m wani Donald trump nø mònggv̀n yv̀mbv̀n vsv̀ngrì kaq shvlum lv́m bv̀nlì wawe ínø̀, Camela Heris nø cv̀mré góng dvjá lv́m bv̀nlì svng vgo tiqgǿ ku wáshì we íe. Rvcángcè rìò lvpat tvrà wawe nø vsvng lvpat rì svng rvgaq mvdàm kèní vtǿl dvzv́r lv́m kadvgvp gø vto lv́m mv-vl. Vdè tiqgóng svng ngànshà cáng mvwá shì lv́m nvng cángpè ò wur shvnvm mvwá shìlv́m vyáshìràe.” wanø̀ vtàn bǿà we íe.