Røt nø lún we
Luka 11:9
“Ngàí rá namaq svng vla:tnìni, røt èrøtnøng wekvt namaq svng èzí daqnø̀nge. Lá èmvnnøng wekvt lá èlún daqnø̀nge. Bvngkà vkoq èmvnnøng wekvt namaq svng ètána daqnø̀nge.”
Kv́mnøt vjøngí èrøtnò wekvt lúnshì e. Vjúrøt shìwe nø Gvray nvng tvpní shìwe tvrà tiqlòng íe. Vdèò lvpat tvrà taq Gvray nvng tiqdø vl vdu we, Gvrayí nøngmaq kaq svng jø̀ng jǿng shóngshì we tvrà svng síngshá lúnlv́m, Gvray nø jø̀ng jǿng ni cúnshì we Gvray íwe dang síngshá lúnlv́m vjúrøt shì ràì we íe.
Vjúrøt shìe wawe taq àngyv́ng svng røtshàì we kàciq rì shvnvp ràwe mø̀í, Cv̀mré tiqgǿ nø àngpè yv́ng svng dinø̀ àng lún mvyǿ we, àng shóngwám shì tvrà shvrúng nøt rì vchv̀ng vtnò dø røtshì shvla we íe. Vjúrøt shìe wawe nø nøngmaq mvsø̀n nvrø̀m rì svng Gvray yv́ng ap shàì wewa ni íe wanø St. John Damasyn taqkèní vtàn yv̀ngà.
Nøngmaq tiqgǿ vrv̀m nø Gvray àngnvng vhøm nø mvngu shàì we, Gvray àngnvng kà dvmvnì we rvtø̀ rì gvlshì ràì we íe. Vjurøt shàì we taqkèní Gvrayí nø nøngmaq dvpvt shvngbe kø̀mzøp dø dègǿā lú:ngì we nø mǿí. Gvray àngnvng tiqdø vzø̀mì nø wá dvzaq shì ràì e. Luka 18:1-7 taq gø Yesu kristuí Vjú røt we kàshvbóng rì kèní vtànò nø dvtú ráà wegø íe.
Dvzv́r Polo taqkèní gø rvtø vrv̀m vjú røt shì ràwe dang dèkv́m ráshà we íe. Gvray shvmv́n jejú shvngbeí vtoshì leqlún nøng.