St. Slmeon
St. Slmeon nø Cleofes ò angcè íe. Yesu Kristu nvng àngnvm vdu pè gø íe. Mati karu, Luka karu rì taq St. Slmeon ò angme nø Yesu Kristu ò Angmè Mari ò àngnvm mè íwe dang vtán shaq íe. Yesu Coqcv́n rì íwe dvzv́r rì (72) gǿ kèní tiqgǿ gø íe.
Yesu Kristu muqlàng svng vbun bǿà we rvtø̀, Shv̀nshér pvlàcè Gvray tuqráì we rvtø̀ rì taq chvpdvp yv̀ng yv̀:ngà we tiqgǿ gø íe. Yesu shì yv́ng kèní zun bǿì mèpvng Emount tvrà rvmø Yesu nvng tiqdø rvmnvng tiqgǿ nvng tvrà di we taqgø St. Slmeon vbá we íe.
AD 62 nøng Paska bóy taq Jerusalem Svrado pè James kaq svng Jue vsvng rìí shvt yv̀ngà we íe. Àngnø St. Slmeon ò àngnvm pè gø íyv̀ngì. We mèpvng àngnvm pè James shvrà taq St. Slmeon vrá rúng yv̀ngì we íe.
Rvcángcèrì ò shvngø̀mré àngshv́r pv́ngshì we rvtø̀ íwe rvt kv́m nøt vgùcè íwe rvtø̀ taq íwe rvt shvngø̀mré svng vtùwe, Yesu Kristu nø Gvray íe walòng svng vtù gvsat we vsvng rì gvzà bung yv̀ngì.
AD 66 taq Gvrayí St. Slmeon svng Jerusalem nø vrø̀l vmwe svng kàdvtut yv̀ngà we íe. Jerusalem kèní 65 miles vrúm we Pela svng Svrado St. Slmeon vsél shì nø rúng yv̀ngì. 4 nǿng vle ráì wekvt weyv́ngø Ditious cel rì Yuda móng svng gòng ráì nø Yuda vsvng rì kaq gvsat ráà.
Jerusalem svng shi mà gvyaqò ke 5 shvlá dángte wangò nø vtì dvbatāò we, móng vsvng rì kaq Jerusalem kèní mà shvléò we, mà dvgùngò weí dvki ò nø móng vsvng rì nvng móng øp shú rì kaq vtì svrí dvshíò we nvng svrí dvshíò weí vsv̀ng rì dvshí yv̀ngà. AD 70 nǿng taq Jerusalem nø vrø̀l á:mì.
Ínìgø Yesu Kristu nvng dvzv́r rì lv̀ngdø̀m dørø̀m á:mpà v́m yv̀ngì we chø̀m mv̀ngnø gvyaq shìwe mv-vl yv̀ng. Wervt weshvrà taq mvjàn zø̀m á:mì mèpvng noqngø̀m tø̀ngnø ku v̀l ráì we tiq shvrà gø íe. We móng taq mvjàn rì zø̀mzv́mì mèpvng móng vsv̀ng kaya gø vtv́ng ráì we íe.
We rvtø̀ taq vrá Dawi dvcì rì svng vré shì nø shvtvtnà kvt St. Slmeon nø lutshì lún yv̀ngà we íe. AD 112 nǿng taq vrá Irajan nø kv́m vsvng rì kaq dvki vrèò nø gvsat ráà weí St. Slmeon svng gø tung taq záng yv̀ngà.
Weyv́ngø St. Slmeon svng mvme nǿng dvki vrèò wurgáng mvdàm shvt yv̀ngà. St. Slemon nø lvpat 120 dángte íe wanø mvshǿl rì taq vru yv̀ng ngà. Angnø dvzv́r rì shvngbe kèní lv̀ngdø̀m rvgaq mvdàmø cúnshì yv̀ngì pè gø íe. Ang shìbǿì mèpvng dvzv́r rìò vbat gø béyv̀ngì wanø̀ vhú yv̀ngì wegø íe. Pàwálv́m wani St. Slmeon nø Kàngpè Yesu nvng tiqdø bv̀nlì wàyv̀ngì pè gø írvt íe.
