Màshvla we dvcī svng yilshì ràwe
Dvcī wawe nø gvzàni kù:ngà vlwe tiqpv̀n íe. Àng taqkèní àngpv̀n pv̀n vpo lúnò we kù:ngà vle. Àng nvng nàshú bǿò we pv̀n vrv̀m svng vlíng vpo dvzv́r lúnò we kù:ngà àngyv́ngø vlwe íe. Wedø íwe dvcī svng v́:m aq dvrè rì àngpv̀n pv̀n, taqgø nø̀ dø íwe vrù rapv̀ng rì taqgø lá:ngshì we íe.
Dvcī walòng svng nàshú bǿò wekvt toniò àng gømla kèní dvgá tiqpv̀n svng vpo dvzv́r lúnò we rvt wedø kù:ngà vl we lòng svng dvcī wa tǿshì wegø íe. Dèni vbat taq màshvla we dvcī àngpv̀n pv̀n gvzàni vkǿn ráì we svng yv́nglún shìe.
Nøngmaq vdèò vtoshàì we tvrà rì, kv́mnøt tvràrì, manggá rì svng vtù nø gvyaq dvzv́r we nøt mvsø̀n, laqyà àngpv̀n pv̀n rì nø Virous tiqlòng dø vzìng nø vkǿn we íe. Werì taqkèní nøngmaq vdè ò dvpǿ rì, kv́m nøt tvrà rì kaqsvng vtøp dvzv́r we íe. Jò lòng tvrà svng mvjò ku, mvjò we tvrà svng jò dø lv́n nø yv́ng vlé dvzv́r we íe.
Tiqkvt kvt vtang kèní rvnaq we mvrà rì svng wá vlé shìwe tvrà rì svng høqshaq àngwà bø̀nwe dvjà tiqlòng kú yv́ng vlé dvzv́r we rì bǿn dvzv́r we íe. “We lòng nø dèni bat taq vsvng kaya ígø wàò we íwe nø dàlv́m tvrà mv-vl” wanø dvdam vlé dvzv́r we tvrà rì vl we íe.
Dèni vbat taq wá vdu we nvng wá màdu we bv̀nlì wawe nø mv-vl á:mì wanø vtit we, dvløt gvzàm we gvzà v̀l ráì. Wedø dvløt gvzv̀m we tvrà rì shvngbe nø mònggv̀nò màshvla we dvcī rì ni íe. Vsvng tiqgǿò lvpat kaq svng màshvla we lvpat tvrà kaq vlíng vpo dvzv́r long íe.
Dèni bat rvcángcè dø̀ngkurì vkang we gvzà ni luq ráì we svng yv́nglún shìe. Welòng nø vbat zìdang ò màshvla we laqyà nøt mvsø̀n wawe dvcī rìrvt wa bø̀n bungwe tvrà íe. Rvcángcè dø̀ngku tiqlòng wawe nø Gvray mv́r, vsv̀ng, shìwà mv́r taq tiq dvciq vzø̀m lv́m wawe kàciq rì gv́l shìshaq íwe svng vrǿl dvzv́r we høq shaq màshvla we dvcī rì taqkèní èmø kéráshà we svng yv́nglún shìwe íe.
Dèni bat shòlaqré rì taq yadø íwe màshvla we nøt mvsø̀n, laqyà rì, cun dvtøp we tvrà rì ku tuqra we dvcī svng vyá shìlv́m gvzani vchvk we íe. Wedø màshvla we dvcī àngpv̀n pv̀n nø ni vrv̀mò cúnshàì we lvpat tvrà taq yv́nglún, vhǿm lún tálún bǿì we taqkèní vdèò dòng nøt mvsø̀n taq vshøp vmnø̀ tiqni mvdàm tiqni témvn shì sháò we svng dǿm shá ràwe íe.
Tvrvng shí àngye cè tiqchv̀ng taqkèní tvrvng shǿng mè bǿn lúnò wedø màshvla we Idea tiqlòngcè yv́ng kèní telong kvt vdè lvpat tvrà svng gvyaq sháò we íe.
#Youth
By: Gregory
