Noqshi bøng wa ríò rì

Mati 7:21, 24-27

https://youtu.be/EhhWHjFEZLo

“Nga svng ‘Kàngpèá, Kangpèá, wa go vsvng shvngbeí muqlàng móngdàn góng lún lú:ngò we mø̀í. Muqlàng taqlap yv́ngò Vpè ang nøt cà:nò rìí wa góng lún lú:ngòe.’

Àngpè àngmè ka cv̀n we àngcǿ àngcè rì nø ka ta we, shvla we vsv̀ngrì íe. shvla we tvrà gø íe. Shvngøt shú svra rìò ka ta we zùng mv̀ng rì nø lèga paqzí shálúnò e. Ínìgø we dø àngpè àngmè, shvngøt shú svra rìò kà rì svng tiqsv̀ng mvtvng tá lv́m, cv́m dvgøm lúnlv́m wawe gø yvk we íe.

Kadvngshì Kà ta e wawe vsvng tiqgǿ taqkèní ínìgø shvngbe nø tá nø cvn dvgøm lúnlv́m mø̀í long. Vdèò shvrúng nøt bǿn mvyǿ we tvrà rì svng gø cv́n ràlong we rvtø̀ vl long we íe. Kadø ínìgø vdè dvpvt nvng tiqdv́ng vsvngrì dvpvt shvla we tvrà taq cv̀nnø cúnshì lv́m nø vchvk mvdø̀ng ni íe.

Wedø vdè tiqgǿò dvpvt nvng tiqdv́ng vsv̀ngrì dvpvt shvla we tvrà svng cv́n lúnlv́m waweò vchvk mvdø̀ng nø Gvray mòngkà nvng pvlàcè shølshú rìò shvngøt dvtú we tvrà svng cv́n dvgøm we tvrà kèní vdè lvpat tvrà taq vrang shìlv́m gvzàni vchvk longe. Gvray mòngkà svng ta nø cv́n dvgøm lúnlv́m wawe nø Gvray kaq jø̀ng jǿng ni shóngshì we nøt mvsø̀n kèní kv́mnøt v́l rà longe.

Mòngkà tashàì we vnvm vchvng maq taqkèní gø mvdàm kaq tálúnì we tvrà svng síngshá bǿì kvt kèní nø shvla we dvrá tvrà svng wálún, cv́n dvgøm lúnlv́m ílonge. Wedø Gvray dvrá svng cv́n dvgøm we vsvng tiqgǿ dvpvt muqlàng móngdàn wawe gø àng dvpvt ni íā lú:ngò we íe wanø Yesu Christuí vtàn ráà wegø íe.

Vdèò lvpat tvrà taq Kàngpè Yesuí dvtú ráà we dvrá tvrà kèní cúnshì lv́m, vránø tiqdv́ng vsv̀ngrì kaq gø dvtit tvle vwánā we tvrà kèní cúnshàì we ínìnø Mati 7:24 “Wervtnø̀ ngà kà yari táò nø cv́n dø̄ng vsvng kagǿ ínìgø, lóngtv́ng mvdv̀m taq chøm vrv̄ngshì we, zitnøt v̄l vsvng nvng vbónge.” wanø Yesu Kristu taqkèní dvkv́m ráshà we íe.

Wervt Gvrayò àngmóngdàn svng góng lúnlv́m wawe nø rvcángcè íe wawe kèní wagø mø̀í, Gvray mòngkà cv̀nshì we kèní wagø mø̀í long, mòngkà shølshú rìò dvtú we tvrà kèní wagø mø̀í Gvray àng shóngshì we, àngí dvtú we tvrà ku cúnshì we tvrà kèní wa gónglún tuqlún lv́m ílonge wanø Kàngpè Yesuí dèkv́m ráshà we íe.