Dvgá kàshvbóng

Hkristu vdòng taq vpø’ íwe vnvmchvngmaq, Nøngmaq shvngbe nø gá lòng svng Shú:ngshàì rì íshà nø, dø lòng svng téwa mvwú:mshàì rì íshàe. dèniò Gvray Mongkà ( Mark 4:21-25 ) taq Gvray gvsangí nøngmaq gø’ vrvm taq vl we ” Gá lòng” svng vjú vl dø dvtan nø Shvkse wáshì lúnlvm rvt dvkv’mè. Nøngmaq gø’ vrvm taq vl we Gá lòng nø Dālvm ra, gømlā ìshøt kønpaq gø íe. Gá lòng wàwe nø dvshá zā ra vchvk gø’ kaq svng dvbvng we, Nønt mvsøn vdòng taq yòr vhø’mò rì kaq svng Nønt shvløm we.. yarì íē.

Gvray gvsangò dvshá zā shóngnøntní zì we Gá lòng svng nøngmaqò ni vrvm lvpat taqø gá nø, Shvr lún weí,. àngde nvng nítvp rì shvngbe mvdvmø Gvray gvsangò dvshá zā shóngnønt svng vtoshì lúnlvm dvpvt íē. Vrá nø, Gá lòng wàwe nø Gvray gvsangò Cúnshì we móngkà íe. Wè Mongkà svng tálúnshì lòngí nøngmaq vdòng yv’ngø Gá lòng Shvr ra we íē. Nøngmaq cúnshàì we, ni vrvmō lvpat nø Gá lòng wáshì lúnlvm gvzà vchvk nø, dø lòng nvng vhøm v-du ra dvgvp Shvr lúnlvm rvt dvzaq dvgvngshì ra we íē. Àngde nvng nítvp rì kaq svng gø Gá lòng ( shóngshì ra, vlømshì ra, dvbù ra ) svng Shvr lún gø’ í lúnlvm rvt Gvray gvsangò jèjú Kønpaq kèní dvzaq dvgvngshì ra we íē. Téwa nø Gvray gvsangò Gá lòng shóngnøntní àngde nvng nítvp vsvngrì kaq svng Gá lòng, dvshá zā shóngnønt, Dìngman lòng svng dvtan lúnlvm nø, mvdøng vchvk ngè walòng svng dvdvm sórí tvleshì laqlúni.