Vmav́ngám we vyv̀ngcè kàshvbóng
Mati 18:12-14
“Vsvng tiqgǿ nø vyv̀ng tiqyá go vdá we, tiq go vmànvm nìnø, a:ngí dvgø̀cé dvgø̀ go svng shìgùng rvgaqø la:ngò dá:ngí, vmàná:mì go svng lá nvng divm we mø̀í ma?”
Shóngshø̀ngwe pè, mè, vnvm vchvng maq vsvng tiqmaq nø àngpè, àngmè maqò shóngnøt mvkok we shømløm tvrà vtoshì mvlúnò, rv̀mnvng rvmchvng rìí rvwìngwe, pàti mvlvng we dang rì vhǿ:mò nø nøt dvt nøt vtvng lv́mdø íwe vhǿ:mò vsvngrì yv́nglún shìe.
Welòng mvdàm téwa àngpmè, àngmè maq taqkèní àngcǿ, àngcè rì kaq àngcè wawe kèní gu:rò we gø gvzà ni vl we íe. Tiqmaq taqkèní nø shvngkà rì yv́ngkèní vrìngò nø móngdøng tv́ng vhúvm dø dvshvngò we ku àngcǿ, àngcè rì kaq svng gurò we gvzà yv́nglún shìwe íe.
Wedø wáshì we nø kadangshì nøt yòl lv́m tvrà íwe svng síngshá shìwe gø íe. Ínìgø kadøgø nøt cv̀m lv́m tvrà mv-vl. Gvray yv́ng svng kúrshì lv́m shvrà vlwe íe. Vsvng shvdaq daq kadø vgur kéì we ínìgø Gvrayí nø nøngmaq kaqsvng kadvgvp gø mègu:rì we svng shádǿm ràwe svng dèniò Gvray mòngkà taq yv́nglún shìwe íe.
Tvrà vmv̀n we vsv̀ngrì kaq svng tvrà shvlá taq tuqlún lv́m, mvrà dǿng taq vlwe vsv̀ngrì kaq shvlut lv́m kadvgvp gø mvkok we Gvray íe. Gvrayí nø nøngmaq tiqgǿ vrv̀m kaq svng mvrà dǿng svng mvtuq lv́m roqgvr ā we íe. Shvngbe svng shvlut shú chutcháng shú íe.
Wervt nøngmaq shvngbe gø Gvray àng nvng kadvgvp gø vzø̀m lv́m tvrà kèní cún shì ràìe. Nøngmaq shvdaq daq tvsvng gø tvrà vmv̀n we vnvm vchvngrì kaq svng tvrà shvdøng ā we, tasvng tubum mvkok ā kewe nvng nonggun vzí ké ràìe.
Vdè tiqgǿ rvt tiqdv́ng vsv̀ng mvrà dǿng svng màjá lv́m, tvrà vmv́n dvzv́r we dø mvwáshì lv́m svdiq shì ràìe. Ni vrv̀m ò lvpat tvrà taq Gvray yv́ng svng tvpní shì lv́m dvzaq dvkáng shàì. Gvray ang mv́r dv̀ng taq nøt cip shàì nø døngmvn we, shèr we nøt mvsø̀n kèní v́l lún lv́m dvzaq shàì.
Gvray ò shvmv́n jejú nø nøng maq tiqgǿ vrv̀m mvdàm dàlv́m dø kø̀mzøp dø shvmv́nā lú:ngì we svng kv́mlv́m wàì.