Shvnsher we Døngku boy angni
Hkristu vdòng taq Vpø’ íwe vnvmchvngmaq, shvngbe svng Pàmvrà.
Yalvban nø ( C ) nøng Hkristmas Bóy mèpvng Nár tiq lvban wà lvban gø ínø, Yà lvban nø Yesu Maria Yosep Gvray Døngku bóy àngni tiqni gø íe.
Rø v-du we Gvray móngkà ciqrì nø;
First reading
1 Samuel 1:20-22,24-28
Colossians 3:12-21 or
Colossians 3:12-17
Luke 2:41-52
Shvlē Bóy svng Yesu di we
41 Nǿng vrv̀m Yesu angpè angmèní nø Yerusalem Shvlē Bóy svng die. s 42 Ang bat tiqcé vní nǿng høqa:tnà nǿng gø, angwà bóy vtóng dø cà:nò nø, angmaq wedø bóy svng dìá:mì. 43 Bóy wá dv́ng bǿà rvt angmaq loá:mì ke, lvngà svré Yesu nø mèpv̄nglap Yerusalemø vlā ráà we angpè níí nø mvdǿ:mò. t
44 Ang nø rv̀mnvng cèrì nvng vleá:mì lá:nò nø tiq ni dí tvrà høq bǿà kē, ang rì angrvp rì nvng vshákē vsvngrì dvhø̀ø̄ láò nìgø, 45 Ang svng lá mvlún bǿà rvt, angní nø Yerusalem svng bat vtv́ng nø láá:mà. 46 Vshø̀m ni mèpvng wa, noqngø̀m Tø̀ngnø vdòngø Ang nø shvngøtshúrì dvhø̀ø̄ rūng nø, angmaq kà gø tá mā:nò nø, angmaq svng røt gø røt mā:nò nø v̄l dā we, angníí lá lún bǿà.
47 Ang kà táò rì shvngbe nø, Ang zitnøt rálnøt v̄l we nvng A:ngí vtà:ngò kàrì svng dàe. 48 Ang svng yv̀ng bǿà kvt angní vtiq á:mì. Wekvt angmèí Ang svng, “Vcèá, pàwálv́m ngàní svng yadø dvshá èwāshàe ma? Nvpè ó ngàní nø Nà rvtnø nøt dvshàshì sórí Nà svng lávtshà,” a:lòe.
49 A:ngí angní svng, “Pàwálv́m Ngà svng èláshàe? Ngà nø Vpè chø̀m taq v́l rà we* svng nàníí mèsháshò ma?” a:lòe. u 50 Iwe A:ngí a:lò kà svng angníí mvcí:ngò. 51 Wekvt Ang nø angní nvng tiqdø yøtshì nø Nazaret mvrìng svng loá:mì. Ang nø angníí ø:pmò we lv̀ngpvng kà tā nø v̄le. Angmèí mv̀ng nø ang nøt vdòngø kà yadv́ngte shvngbe mvsø̄:ngòe. v 52 Yesu nø zitnøt rálnøt tǿng mvnshì nø, Ang góng gø té lú:ngì taqsórí, Gvray mv́rdv̀ngø gø, vsvng mv́rdv̀ngø gø, zø̄a lún we luq mv̄nshì lú:ngì.w
………..
Hkristu vdòng taq Vpø’ íwe vnvmchvngmaq, shvngbe svng Pàmvrà.
Yalvban nø ( C ) nøng Hkristmas Bóy mèpvng Nár tiq lvban wà lvban gø ínø, Yà lvban nø Yesu Maria Yosep Shànshér we Gvray Døngku bóy àngni tiqni gø íe.
Rø v-du we Gvray móngkà ciqrì nø;
1 Samuel 1:20-22,24-28
Koloshi 3:12-21
Luka 2:41-52 yaciq rì íē.
Vpø’ íwe vnvmchvngmaq Dèni nø Hkristmas Bóy mèpvng Nár tiq lvban wà lvban svng gòng bø’shà. Dèni nø Catholic shvngømré me dvpvt Shànshér we Yesu, Maria, Yosep Gvray Døngku bóy àngni tiqni íe. Døngku wàwe nø Vsvng mvngpòng àng mvdò dvpvt rvzaq lvm vl nigø, Shvngømré dvpvt nø gvzà vchvk we íe. Wervt Catholic shvngømré me kèní nø Døngku dang nvng singdø kàdvgvp gø vná we mà-vl, Rvtø vrvm vpø’shì lòng, shvring shì lòng íe.
Vkangpè vdòng taq mà-vl bø’ì we St.John Paul (ll) ínø ” Shóngnønt wàwe nø Chøm kèní nvmlat tiq, pvngshì lòng íe, wā shøn nø dvkv’m yangì. Shø’n mvyø’ we taq, angpè angmè wàwe nø cvmrérìo nvmlat tiq Shvngøtshú Svrarì íe, wā dvtan mvyø’ lòng íe. Nvmlat tiq Shvngøtshú Svra gø’ò, shvlá vtv’ng shvngøt dvtú lòng ínø lvpatnò, Nvmlat mvpvng vrvngshì lòng svng dø’ngvng lúnè. Yadv’ng tē vchvk we, vpø’ we Døngku tvrà svng mv-sing rà dø vná dvpéshàì lòng nø àngnvm angchvng, àng mvdò vdòng, Ká:mì vlømshàì mvtúrì taq gvzà ni svrè dvké we íe. Pàwàlvm wàni Vsvng mvngpòng vdòng kaq shvla lòng, mongzøl lòng ríà we vsvngrì gø Døngku vdòng kèní shøq nø té lúngì rì wā íē.
Wè pàdø mvgvm màshvla, v-tù v-rè shú, chàng kvlvng wáshìrì vsvng gø Døngku tiqlòng lòng yv’ngkèní shøq nø té lúngì vsvngrì wā íē, walòng svng shálún shìe. yv’ng lúnshìe. Døngku vdòng taq Cvmrérì, cvmré dvgvp kèní Nønt mvsøn vjang laqya vnvp pàdø shòlaq gunchang lvpat svng gòng ra weò gø dvtut Kà ta nø Nønt mvsøn vjang laqyarì vnvp lvm, shvngøt dvtú shì lòng nø gvzà ni vchvk we døngja tiqlòng íe. Wervt Shvngømré Angmè íwe Catholic shvngømré sasvna nø shvbóng shvmvtshì rà, Angmè shvlá vtv’ng ku, angpè angmèmaqí àngdeò Cvmrérì kaq svng kadø wā dvcøp vdvngà nø shvngøt dvtú lvm ? Døngkuò døngja Talen svng kadø wā dvnúng lúnlvm kàru taqkèní gø dvkang we? Lìpong wáshì nø gø, vhø’m mv-ngushì nø gø dvtit tvle Paqzí zì we vlē.
Wervt, Døngku wàwe nø Sacramentu gømlā rì yv’ngkèní Gvray gvsangò jèjú rì kaq vtoshì taqsórí cúnshàì lòng íe. Shóngnønt vl we shvrà yv’ngø Gvray gvsang gø vlē. Gvray gvsang vl we shvrà yv’ngø mongzøl lòng vlē. Gvray gvsang vl we shvrà yv’ngø v-rvm v-rá lòng vlē.
Døngku shvzøngshì we Sacramentu svng vtoshì lòng nø vkang lvm rvt mø-í. Gvray dvkv’m Kà rì svng cvndvgøm nø dvnúng lúnlvm dvpvt le íē. Gvray gvsangò Pvlàcè kvmnønt tvrà mvshøl svng vrù lúnlvm dvpvt íē. Døngku shvzøngshì lòngí vshù dø, Dvre tiqlòng dø dvzá:r kélvm rvt, mø-í. Vsvngrì mvkøm mvzøp mi we lvpat svng tiqgø’ nø tiqgø’ tasvng tubùm kélvm, Gvray dvkv’m Kà vdòng taq v-zít v-zing lvm dvpvt nvng Døngku lvpat taq tasvng dvgùng shvring kélvm, vháng vlúnlvm, vpø’ shvring kélvm dvpvt íe.
Vrá nø, Døngku lvpat Dø’ngvng dø roqgar lúnlvm dvpvt ” Cì ” wàwe mà-vl. Dvla hang wā vlē. Dvla hang kadv’ngte vl íni gø àngde í cvndvgøm lún we taq , vlíng vpo lún we taq wā vtoshì lúnlvm vlē, walòng íē. Vrá nø, Pø, Ja Gvmsùng gvzà bē we tvmu bvnlìrì svng vsvng mvmè nø Nønt lúmè,Shvrúng íe. Mvjór ká:mshì nø wàshìe. Yor nø kūnga vzàm vl we Dvla hang paqzi kèní dvnùng nø wàshìlvm wàwe taq Nønt mv-lúmì. Kvmnønt shaqcvmìe.
Vpø’ íwe pèmè vnvmchvngmaq, Shànshér we Yesu , Maria, Yosep Gvray Døngkuò kvmnønt “Dvla” nø nøngmaq rvzvngcerì Døngku shvngbe dvpvt shvbóng shvmvtshì ra, è í āìe. Nøngmaqò síngràl Nyan Byinyā taqkèní dvdvm mvrø’:nì we dvja rì vhø’m v-du ra dvgvp, banchvk rì vhø’m v-du ra dvgvp, Yvklvm, shvrē lvm rì angpvnpvn vhø’m v-du ra dvgvp, Yesu Maria Yosep Shànshér we Gvray Døngkuò kvmnønt kūnga vzàm àng Dvla taqkèní Kvmnønt nònggùn kūnga lùshì ra íe.
Kvmnønt àng “Dvla”. lòng nø, Yor nø vnvp vtvng Kvmnønt nònggùn kūnga íē. Vkvtdø Sher nø vnvp vtvng Dvlaò mvpvng nø, Sher we Kvmnønt lòng íe. Wè Kvmnønt nònggùn kūnga vzàm vl lvm nø, Gvray gvsangò Dvrá Mongkà taqkèní shvngøt dvtú, dvkv’m Kà, lvpkà rì svng Dìngman dø cvndvgøm taqsórí rvtø vrvm Kvmnøntní Cúnshì ra lòng íe.
Luka 2:41-52, Mongkà taq Shànshér we Yesu, Maria,Yosep Døngku ínø Gvray vtóng vl dø, dvkv’m Kà lvpkà rì svng Cvndvgømō taqsórí Muqlang mvshøl, Pvlàcè kvmnønt tvrà mvshøl svng vrù yangà. Wè pàdø Longzapè Yesu Hkristu í èchvng bø’shà we nøngmaq rvzvngce Døngku v-rvm, gø’ v-rvm ígø Gvray gvsangò vtóng, Vkangpè Yesuò dvkv’m kà lvpkà, sacramentu, shvngømré vtóng Dvrá rì svng cvndvgøm nø Kvmnønt vl we rvzvngce, shvngømré rì wáshì laqlúni, Gvray dvgùng shvring shvta laqlúnì wvng dvshat sórí nònggùn zí mvyøngè.
Shvngbeí Shànshér we Yesu, Maria,Yosep Gvray Døngkuò kvmnønt mongzøl lòng vtoshì laqlúnì.Shvngbe oqā.
