3rd Sunday of Advent
Vpø’ íwe pèmè vnvmchvngmaq, yalvban nø Mongzøl we Hkristmas bóy svng góng lúnlvm dvpvt dvgø’shì we “Advent” Nár (3) lvban wà lvban svng gòng bø’shà. Rø v-du we Gvray móngkà ciqrì nø;
Zefania 3:14-18
Pilipi 4:4-7
Luka 3:10-18
10 Vsvng loksokrìí ang svng, “I nìnø nøngmaq kadø wáshì ràì ma?” wa rø:tnò rvt, 11 A:ngí vtà:ngò nø, “Belaq vní dùng vdá gǿí nø màdá gǿ svng laq vwv́naò. V́mlv́m vdá gǿí gø màdá gǿ svng laq shvá:mò,” a:lòe. 12 Kùyà gúnrì gø tiløp løpshilv́m dì ráì nø, “Svra pèá, nøngmaq kadø wáshì ráì ma?” wa rø:tnòe. 13 Yohaní angmaq svng, “Gúnlv́m dvdūshaq mvdv̀m vché dø mègúnnøngni,” a:lòe. 14 Cìlcè rìí gø ang svng, “Nøngmaq nà; kadø wáshì ráì ma?” a:lòe. Yohaní werì svng, “Kagǿ yv́ng kèní gø mvhø̀ mvhut gv̀msùng mèlùv́m nøngni; cé gø mècéshìnøngni. Namaqí èlúnnøng we zìbè taq nøt èshø̀mnø̀ng,” a:lòe.
Yesu didaq lòng Yohaní dvtáò we
15 Bashà rì nø Kristu di daq we svng vlǿmshi nø caò we í rvtnø, Yohan nø Kristu we pè dv́ng mø̀í, wa nø dvdáshi rvtnø, e 16 Yohaní angmaq shvngbe svng a:lò we nø, “Ngàí nø namaq svng tì taq wā tìløp løpmaìe. Ngà mvdv̀m té rīng we tiq pè nø, ngà mèpvng di daqe. Ang híshvnam svnhǿng pǿnālv́m vshuq bv̀nlì wàlv́m gø ngà nø màpǿng. A:ngí nø, Shànshér Pvlàcè taq gø, svmi taq gø, namaq svng èløpmvtnønge. f 17 Ang wur taq làwøt lá:ngò nø làkòn tø̀m lānglāngwa dvshèr lú:ngòe. Zong nø Ang vzá taq rvdāò nø v̄mpv́l nø maq mvdv́ngshi we svmi taq wv́r bǿòe,” a:lòe. 18 Yohaní nø Dvbùshv̀ngkà dvshā:ngò we nvng līnkà dvgá dø mvmēí bashà rì svng shvngø:tnòe.
……………………….
Vpø’ íwe pèmè vnvmchvngmaq, Dèni dvbùshvng mongkà taq, vsvng pvn dvci vrvm nø Tìløp lòng svng zi we Yohan kaq dìe, wàe. Àng mvdò nvng mvdò, Kùyà gúnvm rì, cìl dvp taqø bvnlì wà rì gø vbáe. Pàrvt àngí nø àngmaq kaq svng wèdv’ngtē shøl līnlúnòe mà?
Dvdvmlvm (4) mvtú kèní dvshat mvyø’ we taq;
(1) Tìløp zíshú Yohan svng vsvng mvmè í nø Toni kèní dìngman nø mvngsher gø’, wā yv’nglúnò rvt íē. Àngí dvshā:ngò móngkà svng àngíni Cvndvgøm
nø cvnòe. Mati í Vrùo we móngkà taq, Yohan nø, golawu mø̄l bèlaq gwashi nø, ang juq taq nø shacē juqnv́m nv́mshie. Ang v́mlv́m nø cóngkut nvng zømwàng kwátì íe.wā( Mati 3:4 ) wàe. Vkvtdø vsvngrì kaq svng A:ngí vtà:ngò nø, “Belaq vní dùng vdá gǿí nø màdá gǿ svng laq vwv́naò. V́mlv́m vdá gǿí gø màdá gǿ svng laq shvá:mò,”( Luka 3:10-11 ) wā shøn dvgvp àng vdè íni shø’nò dø wàò lòng svng vsvng mvmè í shá lúnòe. Àng nø vnvtshì nø àngyv’ng vl lòng tiqdvng vsvng nvng tiqdø mv-ngúá:m nø vl pè íe.
(2) Tìløp zíshú Yohan nø Cipshì Nønt dvnzøng pè íe. Àngò Vmlvm aqlvm rì í gø yadang svng dvtanòe. Àng mèpvng cvn rì, àng vsvngrì gø wè døni Kv’mè, walòng íē. Àng mèpvng cvnrì gø Shòshòwa tønzv’n Nønt vl rì wā íē. Àngmaqí nø laqya màshvla dø yùmvm vsvng tiqgø’ kaq svng Nvmlat nvmpvng høq gùndvtøp yv’nglún rì íē. Tìløp zíshú Yohan svng Mesia Gvray ku dvdvmò we, cāò we vsvngrì vdòng taqø àngmaq gø vbá vdùe. Íni gø vkvtdø Tá lúnò dvgvp Yohan í nø shvlá vtv’ng cíngràl lúnhøq àng nø Mesia Gvray mø-í we dang shø’:nàòe. Shvkse wàshìe. Àngò bvnlì nø Mesia Gvrayò tvrà svng mvdú:ngà lvm rvt tuqlúngì dang shvkse wáshì nø àngmaq svng bø’ná, shønòe.
Yadang svng dvdvm vjáng nø Dènila Gvray gvsang bvnlì wà we Gvray dvzømshú Svra, gvba rì taqkèní gø Dìngman we Cúnshì we Gvray gvsangò mongkà, Vkangpè Yesuò Dvrá Mongkà rì, dvkv’m Kà Talen rì svng mayà:pmshì dø Dìngman dø rvzvngcerì kaq svng dvbùshang mongkà dvshér lúnlvm, dvshā:ngà nø Shvkse wáshì lúnlvm nø gvzà vchvk ngè, walòng svng gø dvdvm lúnshìe.
(3) Yohanò dvbùshvng mongkà nø cíngràl lúnlvm yòr nø cvndvgøm lúnlvm dvpvt gø yorè. ” Àngde yv’ng vché lòng svng tiqdvng vsvng kaq ezíò…. Vsvngrì nvng v-toq v-tìp we taq dìngman ràe…. Vsvng mvngpòng mvdò yv’ng Na taqkèní wálún we vmìng vkang tiqmaq la dv’ng vl nìnø Kagø’ svng gø shvrè dvkut we, shvnìp shvnar we wá mvdaq. Shø’n mvdaq. Wa kà íē.
(4) Tìløp zíshú Yohan nø vsvngrì kaq svng dì nø vsvngrì nvng tiqdø vshúshì vl taqsórí mongzøl dø vlē. Yalòng nø vsvngrì kaq vnvpshìlún we taq mvdøng mø-í nø, Àng taqkèní Nyan Byinyā shvlá lòng svng mvng røtní:mshì lúnlvm wàwe taq mvdøng yv’nglún shìe. Tìløp zíshú Yohan mèpvng cvn we Coqcvnrì vl lòng svng nøngmaqí shálún shìe. Tìløp zíshú Yohan àngtaq vlē we Kvmnønt, kūnga vzàm, Vzaqshì Nønt taqkèní vchàngò nø dvshā:ngò pàdø, shvkse wáshì dvtánò pàdø nøngmaq taqkèní gø Vkangpè Yesu dìlvm tvrà svng mvdú:ngì taqsórí tuqdaq we Mesia Chvngkangpè shøq yangà we Hkristmas bóy svng mongzøl dø pàmvràce góng laqlúni. Vjúrøt tvleshì nø Vtōshì laqlúni. Pvlàcè kvmnønt jór nònggùn kūnga lùshì laqlúnì wvng dvshat nø nònggùn zí mvyøngè. Shvngbe svng oqā.
