Rvtø̀ nø Gvray ò kàshaq íwe
Rvtø̀ wawe nø Gvray ò kà shaq tiqlòng dø íe wae. Rvtø̀ walòng nø døngmvn tvrà svng tóngā we tiqpv̀n íe wawe. Rvtø̀ walòng nø døngmvn tvrà svng vshøpā we zá tiqlòng ku íe. Àng rvtø̀ ni mǿí nø rvtø̀ shi mvtu høqshaq welòng svng kadøgø tv́n mvlúnshì nø ngàng døng we zá tilòng gø íe.
Shǿngtø̀ng tiqtø̀ng svng tiq dvshaqí teradø kagǿ ígø wá mvlúnshì. Ínìgø we shǿngtø̀ng svng shvladø cúnshì laqlún dø vti, nv̀mpønrì zíā shvla longe. Ínìgø àng télv́m wawe nø rvtø̀ íni tvnùng lú:ngò we íe. Rvtø lòng àngí vdu we rvtø̀ dvjà svng zíbǿò weí ni tvnùng lúngò we íe.
Kadø íwe mònggv̀n paqzí rì vháng we ínìgø rvtø̀ wawe shvrà svng kapà ígø tvle wá mvlún shìwe íe. Kadvngshì ngór dvgùng vhángwe vsv̀ng ígø rvtø̀ walòng svng líng, dvzv́r mvlúnò. Vsv̀ng tiqgǿò lvpat tvrà rvtø̀ walòng gø wedøni íe. Rvtø̀ àngnǿngrì kadvngte íráì wawe svng wa shǿn vtàn lúnìe. Vsv̀ng tiqgǿ taqkèní wálúnwe zìdang mvdàm rvtø̀ lòng nø vháng we íe.
“Àng rvtø̀ tuqlongwe kvt sháshì longe, rvtø̀ lòngí vtàn lú:ngòe” wanø kadvgvp gø shǿn sháìe. Welòng nø àng mvtú tiqlònglòng svng àng rvtø̀ lòngí vchv̀ng lú:ngòe, mashìwe døngmvn tvrà mvtú tiqlòng svng tiq rvtø̀ taqnø vtán longe, rvtø̀ tuqrawe kvt rvtø̀ longí vtàn lú:ngòe wawe àng lvjøm ni íe.
Rvtø̀ walòng nø Gvray àngò kàshaq tv́n tiqpv̀n gø íe wae. Gvray nø rvtø̀ dvjà kèní kàshø̀npè íe. Bvnglay tìnúng kadvngshì gwaqwe ínìgø vdàm rvgaq walòngí kwā:ng lú:ngò nø, Vsv̀ng tiqgǿò lvpat tø̀we yvngwe walòng svng gø rvtø̀ walòngí zø̀:mòwe íe. We rvtø̀ walòngí tvnùng we tvrà svng nøngmaq shvngbe nø vyuqì sórí cúnshàìe. Gvray àng tiqgǿ wa rvtø̀ wawe lòngò vtanglvp ripnø øpkáng we íe.
Wervt Gvray àngò dvgá kàshaq tiqlòng íwe rvtø̀ svng kadvgvp gø tálv́m wáshàì. Vdèò lvpat tvrà mvhøt lv́m shìwvt rvmèrì dvhø̀ rvtø̀ walòngí tvrà èshøl longwe høqshaq nøt shvyvng shìnø caràwe gø vl longe. Vdèò lvpat taq àngwa wa bøne wawe kadvgvp gø mv-vl shvngbe nø àng mvtú tiqdvng dvng kèní bø̀n bungwe dvjà rì wani ílonge. Vdè yv́ngsvng tuq rawe pv̀n vrv̀m nø àng mvtú tiqdvng dvng kèní tuq rawe íe.
Wervt Gvray àng kà tanø̀ nøt shvngyvng shìlv́m, lvpat tvrà taq bø̀n bung rawe àng mvtú dvjà rì svng vdu vbóng dø vto lúnlv́m, dvzaq shàì. Lvpat tvrà wawe taq yvkwe shìwvt rì nø da vkǿn longni, rvzì mè rì ngang rànø̀ saqgàng tvrà rì dø íwe dvjà rì taq gálòng nvng tiqdø we zaqlè tvrà svng ngang lúnlv́m wáshàì. Àngdè shóngshì dø mvhøt mvhè wáshì we yv́ngkèní mvhøt lv́m tvrà svng vjá sháò we íe. Gvray àng kà tawe rvtø̀ svng vpǿò we shvlá vtang we lvpat laqyà zaqlè tvrà ílonge.
