Mati 15:29-37
“Vsvng loksok yari svng ngàí mvréngòe, pàwálv́m wani angmaq nø ngà nvng vl we vshø̀m ni í ráì rvtnø, angmaq v́mlv́m béaá:mà. Ngàí angmaq svng màv́m shvlongò kvtnø tvrà ramø angmaq svrí bangvm we màshá,” wae. (Mati 15:32)
Gvray nø mvré nøngmaq kaq mvréza we Gvray íe walòng svng mvsø̀n vdòng kèní vto shì lúnìe. Kàngpè Yesuí vtàn ráà wetaq àng shóngshì wenø mònggv̀n dvrè rì taq mǿí, mvréza shóngnøt íe wae.
Nøngmaq Bashà rì taq vdá mvgàm we vsvng rìnø téwa vdá mvgàm lv́m tvrà taq dvzaq shìe. Vdè yv́ng vlwe zìdang kèní rà vchvk we vsv̀ngrì kaq vwánā we tasvng shóngnøtí vzí kéì we mvwá shàì. Mvréza nøt dvshàìe.
Dvshà vsv̀ng kaq mv̀ng yv́ng mvtv̀má;mì we wáshàìe. Dvshà mvhøt lv́m àngpv̀npv̀n rì, mvjàn shìwvt, tòniò mvhøt rapv̀n íwe vtì tø̀ngwe shìwvt dǿng rì taq dvshà mvhøt we vsv̀ng rì kaq dvsháza bv̀nlì wàlv́m vtiq shàìe. Yadø íwe laqyà, bv̀nlì rìnø Yesu Kristu àngí shvngøt dvtú we dvrá, tvrà nvng vsháy we tvrà íe.
Yesu Kristuí nø á:m-aq lv́m dvshàwe vsv̀ngrì, ne mv̀nrì, hí, wur dvciq vsv̀ngrì kaq vsv̀ng kèní dvsháza shóngnøt gv́lshìwe nvng àngmaq kaq svng dvzøm dvbangā we íe. Nøngmaq Yesu mèpvng cv̄nì we vsv̀ngrì taqkèní gø wedø íwe yadø íwe bv̀nlì rì pàwá wá mvlún lv́m ímá?
Yesu Kristuí àngyv́ng svng tuqráì we vsv̀ng loksok rì svrí shì lv́m long svng àng mvshóngshì, àngmaq lovm we tvrà rvmø svrí shìvm we svng gø àng mvshóngshì wervt zidòng mok (7) chv̀ng nvng nga tiqgolacèí we vsv̀ng loksok kaq shv-vmò no nø shvloò we svng yv́nglún shìwe íe.
Nøngmaq lvpat tvrà taqø gø vdèò shvnvng yv́ngø dvshá zalv́m vsvngrì tuqlong dvgvp àngmaq svng dvsháza tubúm dvbangshì lv́m, dvzøm dvbangā lv́m shvdǿm we íe. Tiqdv́ng vsv̀ngrì mvdàm dvsháza nøt gv́lshì lúnlv́m àng shóngshìe. Vsvngrì ò mvsø̀n nvrø̀m dóng svng yv́nglúnò we Gvrayí nøngmaq dvpvt jejú ìshøtrì luqpø̀n dø shèmv́nā lú:ngì we svng kv́:mì.
