Luka 19:1-10
“Pàwálv́m wani Vsvng Angcè pè nø vmvng rì svng lá nø chutchv́nglv́m dvpvt dì daqì,” a:lòe.”
Vpǿì we vnvm vchvngrì, dènìò mòngkà taq Zacchaeus nø Yesu Kristu Yerihko mvrìng svng dìráì we svng sháò wervt yv́ng mvyǿ we nøt vkǿn we íe. Zacchaeus nø góng tø̀we írvt Yesu Kristu svng vsv̀ng mv̀ngpòng dvhø̀ taq yv́ng mvlúnò. wervt nv̀mgwe shǿng tø̀ng mvdàmø rvlàng dá:ngí Yesu svng yv́nglún lv́m dvzaqshì we íe. Yesu tuq ráì wekvt “Zakiuá, bò èlāshì daq; pawá wani dèni Ngà nø nà chø̀mø̄ v́l rànge,” a:lòe.
Zakiu nø Kuya gún vsv̀ng íwervt vsv̀ng shvngbeí àngsvng mvrà vl vsv̀ng, mvshèr we vsvng wanø àngkaq vzel shìwe gø íe. Zakiu nø vdu we dvrá tvrà kèní gø, mà dvráwe tvrà ku kèní gø pø̀ vdá mvgàm we tiqgǿ íe. Ínìgø Yesu nø Zakiu àngchø̀m svng tùng dinø̀ àngnvng tiqdø á:m-aq we dvnmvn we wáshìe. ” Vsvng Angcè pè nø vmvng rì svng lá nø chutchv́nglv́m dvpvt dì daqì,” a:lòe”
Dèniò mòngkà taq Zakiu nø góng tø̀we vsv̀ng ínìgø Yesu Kristu svng yv́nglún lv́m dvpvt dvzaqshì we yv́ngkèní yv́nglúnò we íe. Nøngmaq lvpat taq gø Kàngpè Yesu nvng shvláwa vhøm lúnlv́m tvrà taq dvzaq shì ràì we íe. Zakiu nø Yesu Kristu nvng shi màhøm dvgvp vsv̀ng rì kaq mupvm we, kùya gúmvm we vsvng tiqgǿ ínìgø Yesu nvng vhøm bǿì mèpvng kaq nø àng nøt vwángshì nø kv́m vsv̀ng tiqgǿ bø̀n ráì wesvng yv́nglún shìwe íe. ” Zakiu nø zv̄ng rip dá:ngí Vkàngpè svng a:lò we nø, “Eyà:ngò, Vkàngpèá, ngà dvzø̄m dvzi vdáng rì nø, tiq kā høq mvshámhoq dvshà rì kaq ngàí zílv́m íe; vrá ngàí kagǿ svng pà tiq pv̀n vmupmv́m bǿngànøng nø, vbì dvtv̀ng tvlē vtv́ngāngòe,” a:lòe.”
Zakiu døni nøngmaq shvngbe gø Kàngpè vdòng taq nøt vwáng shàì nø døngmvn we tvrà taq riplún lv́m dvzaq dvkángshì ràì wegø íe. Kàngpè Yesuí nø nøngmaq shvngbe svng chutcháng lúnlv́m dvpvt tiqgǿ vrv̀m svng èláì we íe. Wervt Zakiu dø nøngmaq taqkèní Kàngpè kaqsvng yv́nglún, vhøm lúnlv́m dvzaqshì ràì we íe. Àngnvng vhøm lúnbǿì wekvt nøt mvsø̀n jàng laqyà rì shvngbe vwáng shàì nø cúnshì lúnlv́m dvzaq shàì.
