“Nàí leq yv̀ng lú:ngò, nà kv́mnø:tní nà svng dèzǿm bǿì,” a:loe.
Luka 18:35-43
Vpǿì we vnvm vchvng maq tálún bǿshà we Gvray mòngkà taq kv́mnøt vjǿng kèní Kàngpè yv́ng svng èrøt shìwe ínìnø dàlv́m dø íwe jejú rì àngí shèmv́:naì we dang tálúnì we íe.
Vneí mvyàngò we vsvng tiqgǿ ò lvpat svng èyv̀ngvt nò dvgvp gvzàni dvshá za lv́m shvrà vl longe. Vneí mvyv̀ngò we írvt àngshvnvng rv̀m nvng rvmchvng rì gø mv-vl, bv̀nlì àngdang dang taq gø vdǿn kelv́m tvrà rì nvng shìwvt vhǿmò we íe. Wedø íwe àngò lvpat tvrà taq kadvng shì nøt dvshà lv́m rì vhǿm bǿà we svng nøngmaq í shá mvlúnì. Dèni ò Gvray mòngkà taq neí mvyv̀ngò we vsv̀ng wegǿ taq àng vne í yv́ng mvlúnò we ínì gø kv́m nøt vnà nø vtang kèní gwaqwe ínø̀ Kàngpè Yesuí wàò we bv̀nlì rì shvngbe svng àngí tálúnò we írvt àng kv́mwe íe. Àngò kv́mnøt nø Kàngpè Yesu taqkèní wàò we bv̀nlìrì shvngbe svng vneí yv́nglúnò we vsvngrì shvngbe mvdàm té tewe svng yv́nglún shìwe íe.
We vneí mvyv̀:ngò we vsv̀ng taqkèní cvnshì shvla we laqyà shvlá rì gvzà vlwe svng yv́nglún shìe. 1. Vneí mvyv̀:ngò we írvt dvshá mvré v́l vdu we ínìgø nøt mvdat nø røtvm we bv̀nlì kèní lvpat svng dvkúm shì ráì. Kadangshì yvklv́m shìwvt rì vhǿmò we ínìgø àngò lvpat svng vcǿm mvzí shì lvpat tvrà taq dvzaq dvkáng shì ráì we svng yv́nglún shìwe íe. Nøngmaq ò lvpat tvrà taq wedø íwe shìwvt rì vhǿmì we mv-vl, vneí yv́nglúnìe, røtv́m mvrà nø lvpat cúnshì lúnìe. Gvray yv́ngkèní shvmv́n jejúrì àngpv̀npv̀n vtoshì lúnìe. We shvmv́n jejú rì nvng Gvray àng nvng tiqdø lvpat cúnshì lv́m wàì.
2. Vneí mvyv̀:ngò we ínìgø àngò kv́mnøt vne lòngí yv́nglúnò we írvt, Kàngpè Yesu shvmv́n jejú kèní vne svng shvzǿmā nø vnéí vrá yv́nglúnò we jejú svng vtoshì lúnòe. Bartimaeus nø àngí tálúnò we Kàngpè Yesu ò bv̀nlì tvrà rì svng kv́m we tiqgǿ íe. Àngò nøt mvsø̀n taq Kàngpè Yesu nvng vhøm lúnwe ínìnø àngò vne lòng gø zǿmvm nø yv́nglún lv́m íe wanø kám gǿ gø íe. Wervt Yesu dìráì we tvrà taq “Dawi pvlí pvlaq pèé, ngà svng dvshá èzangà é”. wanø vkiqe. Wervt Yesu nvng vhøm nø Vne zǿmlún we dàlv́m jejú svng vtoshì lúnò we íe. Nøngmaq gø Bartimaeus dø kámnøt ngàn døngwe vsv̀ngrì bǿnlún lv́m dvzaq shàì. Kàngpè kaq kv́m vsv̀ng kagø taqkèní ínìgø ìshøt jejú vtoshì lún we íe.
Nøngmaq tiqgǿ vrv̀m gø Bartimaeus dø ni dvshà mvhøt we shìwvtrì dvhø̀ taqkèní Kàngpè Yesu vdòng kv́m vlǿm shàì wetaq àngnvng tiqdø vzø̀mì weyv́ng kèní lutshì laqlúnì.
