“Svmaré vní mè tiqdø loklv̄ng jøkngv̄m dvgvp, tiq mè svng vbūn bǿò nø tiq mè svng nø làng ráòe.”
Luka 17:26-37
Mvrà rì svng yilshàì nø shvlawe bv̀nlì rì taq cv́n dvgøm dvzaq shàì we taqkèní Kàngpè àngí nøngmaq svng èlù ráì we rvtø̀ svng dvgǿ shàì taqsórí cúnshàì.
Vpǿì we vnvm vchvng maq dèni tashì bǿshà we Gvray àngmòngkà taq Yesu Kristu í nøngmaq kaq svng vrá èluvtnì we rvtø̀ dvpvt kadvgvp gø dvgǿshì lv́m shvdǿm we íe. Nøngmaq tiqgǿ vrv̀m nø Gvray àng vdòng taq svng lo ràì we vsv̀ngrì wa íshàe. Nøngmaq shvngbe nø tiqni rvtø̀ taq shì lòng svng tuqá:mì we vsvng rì wani íshàe ínìgø we rvtø̀, shvrà, àngni rì svng mvsháì. Wervtnø̀ we dø tuqrawe àngni svng canø̀ tvlú dvgǿ shì ràì wegø íe.
Nøngmaq tiqgǿ vrv̀m nø pø̀, gv̀msùng rì, mònggv̀n ò dvrè rì svng lá vshøp shàì we bv̀nlì taqwa nøngmaq ò rvtø̀ àngni rì, nonggùn kùngàrì, nyan paqzí rì záng shàì nø dvzaq shàìe. Ínìgø nøngmaq ò pvlàcè shv̀nshér lúnlv́m dvpvt nvng mèpvng lvpat dvpvt we dv́ngte kùngà mvzáng shàì. Mònggv̀n zaqshøp rì taqwa vlín nø muqlàng zaqshøp lá mvwáshì we dang svng Luka 12:20 taq “Íwe Gvrayí àng svng, Sv̀ngdálé, nà gø̀nshaq nø dèyaq vtv̀ng bǿngòe. Wekvt nàí dvkømshaq rì nø kagǿ la vpvt dvrni? a:lòe.”
Mònggv̀n zaqshøp dvrè rì nvng paqzí paqrvt rì svng mvlāshì lv́m shǿm mvyǿ we mǿí. Nøngmaq bashà rì wawe nø mònggv̀n yàchvng mvdàm taq v̀:lì nø muqlàng móngdàn taqøgø bø̀ng zá:ngì we vní móngdàn dvpvt v̀:lì we svng síngshá shìrà we gø íe. Wervtnø̀ mònggv̀n zaqshøp rì svng lá vshøpshì ràì wedøni muqlàng zaqshøp rì svng gø lá vshøp shì ràì we íe.
Wervtnø̀ vpǿì we vnvm vchvng rì nøngmaq nø ya rvgaq mvdàm lvpat nvng mèpvng muqlàng móngdàn dvpvt wawe tvrà taq vdu vbóng dø cúnshì ràì wegø íe. Rvgaq mvdàm cúnshàì we rvtø̀ taq vlé shì we mvrà bv̀nlì rì svng yøl shàì nø døngmvn we tvrà ku Kàngpè Yesu àng shóngshì we tvrà ku cún shàì. Wekvt nøng maq svng kadvgvp ègovt niwe rvtø̀ svng mvsháì we ínìgø tvlú dvgǿ shàì we vsv̀ng rì bø̀n lú:ngì we íe.
