“Dvgá mvshǿl angpvnpvn”
Shóngshø’ng we pèmè vnvmchvng, shvngømré rvzvngcerì shvngbe mvdvm Vkangpè Gvray mongzøl lòng laqtuqdaq!.. shvngbe svng Pamvra.
Dèni nø September shvlá Nár Bunga ni svng gòng bø’shà. Dèni vrá, tashì lvm dvdvm vjáng nø nònggùn lùshì lvm Gvray móngkà nø Lk 6:39-42 vdòng taqkèní íē.
Mongkà tiqciq vzàng røshì lvm wàì. “Dvgá mvshǿl angpvnpvn”
39 A:ngí kàshvbóng kèní rá angmaq svng a:lòe. “Nemaní nø nēmànrì svng tvrà shø̄l ngu:tnòe ma? Wedø shø̄:lò nìnø vní gǿgǿ dv̀ngkø̀r taq màjav̄m ni ma? a:lòe.
Vpø’ íwe pèmè vnvmchvngmaq, Dènio Gvray dvbùshang Mongkà taqkèní nøngmaqí dvdvm vjáng lvm mvtú rì mvmè vlē. Nøngmaq shvngbe nø Mvra v-li we nēmàn vsvngrì í shàe. Nēmàn nvng vbóng íe. Nvmlat angdèo Mvra rì svng dvdvm yv’nglúnshì lòng nø, Tiqdvng vsvng kaq gø síngà lún nø, Kà rvt we wàlvm mø-í. Angdèo Mvra rì svng Gvray gvsangí dvshá zā chutnà lvm lòng svng èshóngshì nìnø, tiqdvng vsvngò Mvra rì svng gø Chutnà lún ra íe. Vrá nø, Nøngmaq nø Dvrá vji wáshì mvyø’ íe.
Kaciq rvt we Dvrá vji nø Kristu tiqpè wā íe. Kristu í wa Nøngmaq svng Dvrá dvràlvm Kàrvt lvm vmíng vkvng vlē. Vkangpè Yesu Kristu àng tiqgø’ í wa nøngmaqò Mvra rì svng èshvlà bø’shà, àng shvwi í èchvng bø’shà rvt angí wā Chutnà lvm nvng Kàrvt lvm vmíng vkvng vlē. Nøngmaq Mvra v-li we, shaqcvmì we vsvngrì mvng nø, Gvray gvsangò dvshá zā mvkok dvdí shóngnønt svng ring dø vtoshì lúnvm lvm rvt mvng dvzaq dvkvngshì ra íe.
Wervt vpø’ íwe pèmè vnvmchvngmaq, Vkangpè Yesu Kristu í cvnà we dvkv’m Kà Dvrá rì vdòng taqø Cúnshì nø cvndvgøm laqlúnì wvng nònggùn zí mvyøngè. Shvngbe svng Pamvra.
