Vkangpè Yesuí lvmboqrì mvdvmø, Nøt shvlǿmshú dv́nāò we
Shóngshø’ng we pèmè vnvmchvngmaq Ya lvban Vkangpè angni nø Zun Bóy Rvtø Nár (6) lvban wà lvban svng gòng bø’shà.
Kristu vdòng taq Shóngshø’ng we pèmè vnvmchvngmaq, Gvray í kùpgar we jèjú vdòng taq Rvtø vrvm Mongzøl døcè Cúnshì lúnìe. Wè mvdvm, Gvray móngkà svng dvdvm vjáng taqsórí Pvlàcè nònggùn lùshì lvm rvtø shvlá tiqlòng vtoshì lúnì rvt gø Gvray jèjú svng gvzà oqā wàlvm ra íe.
Ya lvban taq nø, Vkangpè Yesuí lvmboqrì mvdvmø, Nøt shvlǿmshú dv́nāò we, cvnào we Nár, Kangpè angni gø íe.
Ya lvban taq rø v-du we Gvray móngkà jømciqrì nø;-
(1) Dvzvr 8:5-8,14-17.
(2) 1Piter 3:15-18.
(3) Yohan 14:15-21.
- Shóngshø’ng we pèmè vnvmchvngmaq, Samari mvring wama rvwa taq vl we vsvngrì nø Dvzvr Philip í dvshvngò we Gvray gvsang móngkà, Dvrá rì svng tāshì nø vtoshì taqsórí, gvzà Nøntshøm dvbù lúnòe.
(Dvzvr 8:5-8, 14-17). Vpø’ íwe pèmè vnvmchvngmaq, Nøngmaq lvpat taqkèní Cúnshì we Gvray gvsang Dvrá, móngkà rì svng tashì nø Pvlàcè Kvmnønt nònggùn kūnga, Gvray mongzøl lòng vtoshì lúnlvm shèdømìe. - Vpø’ íwe pèmè vnvmchvngmaq, Nøngmaq pàrvt Nønt vlømshàì lòng svng, vsvng tiqgø’ gø’ í, namaq svng èrøtvtnøng dvgvp, Àng lvjøm svng shø’nà lvm, bø’n na lvm rvt tvlú í ràe, wā dvkv’mè.(1Piter 3:15-18).
Nøngmaqò Kvmnønt nø Vsvng í shvzøngò we Kvmnønt tvrà i mà? mø-í ni, Vkangpè Yesu Kristuí shvzøngò we shvngømré àng lvmboqrì taqkèní dvtut shøl we vdòng taq shvzøng shàì mà? vlømshì ra svng vtoshì lún bø’shà mà? dvdvm vjang nø nònggùn lùshì ra íe.
Yohan 14:15-21….
Lvmboqrì svng Vkangpè Yesuí dvkv’m Kà, Kà shvdiq zíò we taq;- Dìngman lòng svng síngràl we Pvlàcè, Nønt shvlømshú dvgá tiqgø’, Ngàí Namaq yv’ng svng dvzvra daqìe, wàe.
Vrá nø, Vkangpè Yesuí Zi we Kà shvdiq
Vkangpè Yesu nø, Àng lvmboqrì nvng vkang lvm rvtø rì níshì ráì rvt, àngmaq svng Nønt shvløm nø Nønt mvsøn nònggùn kūnga zíòe. Angò Mongkà taq vbá we mvtú rì nø, lvngpvng taq dvtánshì dø tiqdvchá íe. Nvmlat
(1) Ngà svng namaqí èshòngshà nìnø, Ngà dvkv́m kàrì namaqí ècv̀n lóngnønge. (Yh 14:15)
(2) “Ngàí namaq svng dvrvtcè dø màme ráì; namaq yv́ng svng vrá Ngà dø̄ng daknge.”
(Yh 14:18)
(3) Vpèí nøt shvlǿmshú shø̀ngshang tiq gǿ namaq svng zílv́m rvt Ngàí Ang svng røtnalv́m íe. (Yh 14:16)
(4) ” Ngà cúnshø̀ng rvtnø namaq gø ècúnshì lóngnønge.”
(Yh 14:19). Mongkà ciqrì taq vkvtdø dvkv’mè.
Vrá nø, Nønt shvlømshú tiqgø’ svng dvzvrà daqìe.
Vkangpè Yesu shøn we móngkà taq, Nønt shvlømshú tiqgø’ svng dvzvrà daqìe wā Kà svng tálúnìe. Àng taqkèní gø, Nvmlat taq Nga nø Nønt shvlømshú pè øngàe wàe. Vrá nø, Àng tiqgóng taqkèní gø lvmboqrì, dvzvrì dvpvt Vpè Gvray kaq vjúrøt dvbvngòe. Lvmboqrì, dvzvrì nvng vcar a:mì nigø, àngmaq svng dvrvtcè dø màme lvm dvkv’m yangà. Nønt shvlømshú dvzá:rà lvm pè nø Shànshér Pvlàcè taqkèní, Vkangpè Yesu nvng lvmboqrì shini mv-ngúshì nø vhø’m lúnlvm lòng svng dvkv’m we tvrà íē.
Vpø’ íwe pèmè vnvmchvngmaq,
(PARACLETE)
Nønt shvlømshú dvzvrà lvm Shànshér Pvlàcè svng vtá:nà we taq, Advocate nvng Paraclete wàwe Kà me vní chàng svng lv’ngò lòng yv’nglúnshìe. Yalòng nø, Vsvng gø’ dvpvt tùbùm shø’n dvbvng we lvjøm nvng (advocate) wàwe tvrà íe. Greek kà chang (paraclete) svng Latin Kà taqkèní (paracletus) wā a:lòe. Dvbvng pè (helper) wàwe àng lvjøm vlē. Vkangpè Yesu Kristu nø Vpè Gvray gvsang mèpvng vrá lo lvm íe, Shànshér Pvlàcè mvng nø lvmboqrì nvng dvtut vzøm vzap nø vl lvm íe. Shànshér Pvlàcè taqkèní wā, Dvzvrì ínø, Vpè Gvray nvng Angce pè nvng tiqdø vzøm vzap vl lúnlvm Jór Pòngbang lòng svng síngràl lúnòe.
Mongkà (1)&(2)ciq taq
— Samari mvring wama vsvngrì nø, Dvzvr Philip í dvshvngò we móngkà rì svng tāshì nø vtoshì taqsórí gvzà Nøntshøm dvbù lún yangà. Vrá nø, Dvzvr Philip í dvtánò we Lvmik gømlā svng yv’ng lúnò dvgvp vsvng loksokrì í nø tiqnønt tiqmvyung wáshì we í Mongkà svng tāshìe. Shànshér Pvlàcè svng vtoshì lúnlvm dvpvt, Yerusalem yv’ngø vl we lvmboqrì ínø, Piter nvng Yohan svng àngmaq yv’ng dí dvzvròe. Dvzvr Piter nvng Yohaní nø àngmaq mvdvmø Wur hapshi vjúrøtnò jang, Shànshér Pvlàcè jór kūnga svng vtoshì lúnòe. Shóngshø’ng we pèmè vnvmchvngmaq Yadang svng dvdvmì nø, Vkangpè Yesuò Power vmíng vkvng lúnò rì yv’ngkèní Shvmv’n dvgø’ng vjúrøt dvbvng we taq Shànshér Pvlàcè kūnga shaq nøngmaq ígø vtoshì lúnlvm vlē walòng svng shvdømè.
Vrá nø, Dvzvr Piter shø’n we taq,
- Kristu vdòng taq pàrvt nø Nøngmaq nø Nønt vlømshàì lòng svng, Vsvng dvgá tiqgø’ gø’ í røt ra dvgvp, àng lvjøm svng shø’nà lvm, bø’n na lvm rvt, rvtø vrvm tvlú dvgø’shì ràe. Dvzvr Piter í dvtut shvngøt dvtú nø dvkv’m we taq, Nàmaq Nønt mvsøn rì svng shangshang wacè èwáshìnøng nø bvnlì ídv’ngte svng èwànøng; wè kvt Namaq ècvnnøng we, èká:mnøng we Kristuò Cúnshì we lvpat svng vsvng Shvngbeí shá lúngòe, wā dvkv’mè.
Shóngshø’ng we pèmè vnvmchvngmaq, Lvngdøm taq.. Vkangpè Yesu shø’nè.
” Vpè vdòng taq nø Ngà vl we, Ngà vdòng taq nø namaq èv̀lnøng we, namaq vdòng taq nø Ngà vl we svng namaqí èshá lóngnønge,”wàe.(Yh 14:20).
” Ngà dvkv́mkà svng vtoò nø̀ cv̀n gǿ nø, Ngà svng èshòng gǿ íe.” (Yh 14:21a).
Vpø’ íwe pèmè vnvmchvngmaq, Vkangpè Yesuí dvkv’m nø dvgø’ráà dø tiqdvchá, shvngømré shølshú vgo rì í shøl we vdòng Mongzøl dø cvndvgøm nø Pvlàcè kvmnønt nònggùn kūnga lùshì laqlúnì shvngbe svng oqā.
