Mv́ngshèr we tvrà wawe nø vsv̀ng tiq mvzuqcè dvpvt wa mǿí
Pope Leo XIV taqkèní dvtú mòngkà taq mv́ngshèr we tvrà wawe nø vsv̀ng tiq mvzupcè dvpvt wa rvcàng nø vko vkáng lú:nò we mǿí tìløp kv́mshì bøwe rvcángcèrì shvngbe dvpvt lún vkáng vlwe jejú ìshøt tiqlòng íwe nvng dvsháza shóngnøt kèní ìshøt zø̀ngwe tvrà dvpvt dvzaqshì lv́m rà vchvk we ínø̀ Gvray nvng vsvngrì dvhø̀ taq shóngnøt kèní vzø̀m we tvrà íwe dang vtàn bǿà we íe.
Vatican Council ò “Lumen Gentium” dvtú kàru taq Svrabín koqkv́mpè taqkèní “vsvng tiqgǿ vrv̀m nø mv́ngshèr we tvrà svng egoì we” rvcángcèrì tiqgǿ vrv̀m nø Gvray àng jejú vdòng taqø lvpat cúnshàì nø̀ Kristu ò lvpat tvrà svng cv́n dvgøm lv́m íwe dang dvtú bǿà we íe.
Kristu dvpvt svkse wáshàì we nø kámnøt tvrà nvng dvsháza shóngnøt tvràò vháng vtang we gømla tiqlòng ínø̀ dèni dèyaq høqshaq cv́n dvgøm dvzaq shàì we tvrà tiqlòng íwe dø tiqdvchá we kámnøt tvrà kèní cúnshàì we íe. Rvcángcèrì tiqgǿ vrv̀m nø vdèò lvpat tvrà kámnøt tvrà svng svkse wáshì lv́m rvtø̀ vrv̀m dvgǿshì ràwe íe.
Shv̀nshér we lvpat tvrà svng diwe tvrà dvpvt Sacramento nø pvlàcè dvpvt kù:ngà tiqlòng íwe dang dvtú bǿà we íe. Welòng nø Kristu yv́ngkèní vtoshì lúnì we jejú gømpaq tiqlòng gø ínø̀ we jejú rì dvpvt àng svng vrá oqà wanø dvgùng shvring rà longe. Shvngø̀mré tiqlòng taq kømzøp we tvrà wawe nø vl long we mǿí, ínìgø we shvngø̀mré vdòng taq vbáì we rvcángcèrì tiqgǿ vrv̀m nø we shvngø̀mré walòng svng ìshøt jejú kèní kø̀mzøp lv́m dvpvt shvngbe taq døngjá vl we íe.
Mv́ngshèr we tvrà svng tuqlún lv́m dvpvt vdè lvpat tvrà svng mvdø̀ng vlíng vpo lúnlv́m rà vchk we íe. We tvrà nø vdè dè ò jàng laqyà tiqlòng ku mǿí nø̀ rvtø̀ vrv̀m taq Gvray yv́ng svng vwáng shàì we Gvrayò jejú vdòng vdè lvpat tvrà svng Gvray kaq apnúng shàì we tvrà íe.
Gvray àng tiqgǿ taqkèní chutcháng mvlún we tvrà mv-vl Kristu àngò wurgáng tvrà taq køqzøl shàì nø àngò chutcháng we tvrà svng nøngmaqí yv́nglún shálúnì wewa íe. Mònggv̀nò dvshà mvhøt we tvrà svng Kristu àng nvng tiqdø vzø̀:mì nø dìì we ínìnø mv́ngshèr we tvrà svng tuqlún lú;ngì we íe. Gvray àvng nvng vhøm lú:nì we ìshøt jejú nø Gvray àngò dvsháza shóngnøt rvt ni íe wanø̀ dvtú mòngkà vrìng bǿà we íe.
