Vkangpè Yesu Kristu Shì yv’ngkèní Zun ámì mèpvng (2) lvban

Kayv’ng mayv’ng evlnøng we, pèmè vnvmchvngmaq shvngbe svng Pamvra! Shvngbe mvdvm Zun á:mì we Vkangpè Yesu Kristu Gvray mongzøl lòng laqtuqdaq!

Ya lvban nø Vkangpè Yesu Kristu Shì yv’ngkèní Zun ámì mèpvng (2) lvban wà lvban svng gòng bø’shà.

Ya lvban taq rø v-du we Mongkà ciqrì:-
Dvzvr 2:42-47
1Piter 1:3-9
Yohan 20:19-31

Vpø’ íwe pèmè vnvmchvngmaq Ya lvban taq nø, Vkangpè Yesu jór pòngbang taqkèní Zun á:mì Dvzvrì yv’ngø dvtánshì nø, Dvzvr Toma kaq svng Kv’mnønt àngshvr í cúnshì lúnlvm rvt kvmnønt shvdø’ng shvngvng we, shvngøt dvtú we lvban gø íe. Vrá nø Vkvtdø shvngøt dvtú we taq, Pvlàcè taqkèní wā mø-í nø, àng tiqgóng shvngbe gømlā dvtánshì nø shvngøt dvtú dang gø íē. Yadang svng dvdvm nø;–
Shvre lòng yv’ngkèní Kvmnønt, Kvmnønt yv’ngkèní Shvkse wáshì lòng svng yv’nglúnshìe.

Kristu vdòng taq Vpø’ íwe pèmè vnvmchvngmaq,
Dèni tálúnì we Gvray móngkà jømciqrì nø, Nøngmaq svng Dari Gvray kaq Kv’m we shvngømré rvzvngcerìo Nønt mvsøn nvng rvzvngcerìo lvpat svng mvdøng dvtan nø shølè, dvtúè. Shvre lòng yv’ngkèní Kvmnønt tvrà svng, Kvmnønt lòng yv’ngkèní dvbù weí shvkse wáshì lòng svng vlíng vpō á:mì tvrà mvbø’n svng nøngmaqí vkvtdø yv’nglúnshìe. Yadang svng (3) mvtú taqkèní dvdvm vjáng nø dvshat mvyø’è.

Mvtú:-
Shvre lòng yv’ngkèní mongzøl lòng:-
_ Vkangpè Yesu nø Nøngmaq kaq svng dì lúngì, (Yohan 21:19-31) vdòng taq Dvzvrì ínø bvngka cøtshì nø mv-ngúshìe. Àngmaq nø shvre nø vlē. Vkangpè Yesu Kristu nø Wurgang mvdvmø gønshaq dvbø’nshì nø shì bø’ì mèpvng angmaqò vløm ra mvnggá nø mà-vl a:mì, vdv’ng a:mì, nønt dvt Nønt yòrè. Íni gø Vkangpè Yesu nø àngmaq dvhø yv’ngø chvn vnvn zàngwà rìp ráì nø, ” Namaq taqø Mongzøl lòng laqvldaq” wā dvkv’mòe.

Ya Kà nø gvzàni vchvk we Kà íe.
Vkangpè Yesu ínø dvzvrì kaq svng nònggùn kūnga dvnzøng lúnhøq mvcāò, walòng svng yv’nglúnshìe. Àngmaq shvre nø vl we rvtø, angmaqò dvja vdòng kaq svng Vkangpè Yesu nø gòng lúngì, dì lúngì. Dèni nøngmaq taqgø wè pàdø íshàe.
(1) Vzv’ng lvp nøngmaqò lvpat tvrà rì svng shvre ì lòng
(2) Kvmnønt tvrà taq nònggùn kūnga vzàm vnø’nè, wā dvdvmshàì rvtø
(3) Mvra (mø-í ni) màlø’mvm we Nønt vlīshì rvtø taqø Vkangpè Yesu nø tuqlúngì.

Vpø’ íwe pèmè vnvmchvngmaq, Dvzvr Toma pàdø, nøngmaq gø “Ngà i mvyvngònøng nø Ngà mvkv’m” wàì nø shø’n shá íe. Íni gø Vkangpè Yesu ínø dvzvr Toma kaq rvweng we mà-vl. Àng tiqgóng taqkèní yvngò nø ká:m lvm rvt , vtoshì lúnlvm rvt shóngnøntní go yangà tvrà svng yv’nglúnshìe.

Dvdvm lvm:-
_ Na, Ngà lvpat taqgø vgámò we Vcøqshaq “bvngka” rì nø pàlong í mà? Shvre lòng í mà, mvká:mì lòng í mà (mø-í ni) Nønt dvt Nønt yòr lòng í mà?
Kristu nø wè bvngka chit yv’ngø rìp nø, Na, Ngà nøngmaq yv’ngø “Mongzøl lòng laqvldaq ” wā dvkv’mè.

Mvtú:-

2. Mvká:m we lvpat yv’ngkèní – Cúnshì we Kvmnønt tvrà – vløm ra taqø àngshvr tiqkvt shøqshì lòng dang,

1 Piter 1:3-9 vdòng taq nònggùn kūnga vl we Shvngkà tiqlòng svng nøngmaqí tálúnìe, wàe.
” Vkangpè Yesu Kristu Shì yv’ngkèní vrá Zun á:mì lòng í, nøngmaq nø Cúnshì we vlømshì ra lvpat svng tuq lún bø’shà nø àngshvr tiqkvt shøqshì lòng svng vtoshì lún bø’shà.” wàe.

Vrá nø, Kvmnønt wàwe nø ídv’ngte shvngbe kaq yv’nglúnshì lòng svng mvwà. Dvzvr Piter shø’n we taq, ” Namaq ínø Vkangpè svng yv’ng mèlú:nøngnì gø èshóngshìnøngè” wā shø’n yangì. Yalòng nø rvzvngce Kvmnønt tvrào vnvp we Dvrá íe.
_ Yalòng nø Nē í yv’ngshì lòng taq mvdøng dì we mø-í nø, Kvmnønt lòng taq le mvdøng dì lòng íe.
_ Vløtnòe, walòng nø sher lòng mø-í nø, Vløtnò lòng yv’ngkèní tiqdvtang døngman dø tvlíngà lòng íe.

Nøngmaq taqø Dvshà mvhøtnì rì, dvzaq dvkvngshàì rì nø maqhúng mø-í. Wè rì shvngbe nø Svmi yv’ng Vzínshaq Vshé Ja pàdø, nøngmaqò Kvmnønt svng téwa Døngman dvzvrè. Wervt Dvzvr Toma lvpat nø, nøngmaqò lvpat tvrà nvng vbóngè, nøngmaqò lvpat tvrà ni íe.
-Mvkv’m la Kv’m yv’ngkèní v-toq v-tip vhø’m we tvrà kaq dì nø,
-V-toq v-tip vhø’m mv-ngúshì yv’ngkèní Kvmnønt tvrà kaq dì lòng gø íe.

Vrá nø, Kvmnønt lòng yv’ngkèní ” Nøngmaq Vkangpè, Nøngmaq Gvray ” wā vchàngì tvrà íe.

Dvdvm lvm:
Nøngmaqò Kvmnønt nø Cúnshìe mà? Nøngmaqò Kvmnønt tvrà Døngmanè mà?(mø-í ni) Nyan Bønya Paqzi le i mà? Na,Ngà í mvsíng mvràlò rvtø rì taq Vkangpè svng vlømshøngè mà? dvdvm ra íe.

Mvtú:-

3. Lvngdøm taq, Dvzvr 2:42-47 vdòng taq nø,.. Zun á:mì lòngò Kvmnønt angshí rì svng nøngmaqí yv’nglún bø’shà. Nvmlat, Gvray kaq Kv’m yangì we rvzvngcerì lvpat nø vnvp we Hang Dvla taqkèní vl yangì tvrà svng vkvtdø yv’nglúnshìe.
   (a)_ Dvzvrì í shvngøt dvtú we lvpat taq Nøntshøm dvbù nø cvnshìe.
   (b)_ Angdè taq vl lòng svng tāsvng mvngúòe.
   (c)_ Muk svng tiqnønt tiq mvyungí mvngúvmòe.
   (d)_ Dvbù Nøntní vjú røtshìe.
   Vkvtdø wáshì lòngí ” Chutchvng lòng svng tuq vsvngrì Gvray gvsang ínø rvtø vrvm shvngømré vdòng taq zv’ngòe.” vtōòe.

Vpø’ íwe pèmè vnvmchvngmaq, Yalòng nø, Kvmnønt tvrà taq mvdøng vchvk we mvtú gø íē. Kvmnønt lòng nø angdè tiqgø’ dvpvt wā mø-í nø, àng mvdò, mvngpòng svng shvbø’n lúnòe. Zun á:mì Vkangpè Yesu Kristu nvng Døngman dø vhø’m lún lòng ínø, vkvtdø íwe Tvrà rì, jèjú rì svng vtoshì lúnè.
(a)_ V-rvm vrá lòng
(b)_ V-toq V-tip vzàm vzap lòng
(c)_ Dvbù lvm lòng
(d)_ Tiqdvng vsvng kaq shvkse wáshì lòng yarì íe.
Vsvng nø dvshvngshì lòngí wā mø-í nø, Rvzvngce lvpat Cúnshàì lòng Dvla taqkèní le go we vtoshì lòng lúnìe.

Dvdvm lvm( nònggùn lùshì lvm ra):
Nøngmaq Cúnshàì we lvpat lòng ínø, Vkangpè Yesu kaq Tiqdvng vsvngrì go lúnìe mà? Nøngmaqí vsvng mvmè dvpvt vjú zí lúnìe mà? (mø-í ni) àngde nønt í lòng svng wā dvdvmìe mà? dvdvm shì shvlàe.

Dvdøpshì:-
Shóngshø’ng we pèmè vnvmchvngmaq, Dèni nø vnvp we Kvmnønt tvrà lvpat mvshøl tiqlòng svng yv’ng nø cvnshì lúnì we Nár ni gø íe.
_ Shvre lvm lòng yv’ngkèní Mongzøl lòng kaq svng dì lúnlvm Vkangpè Yesu nø Nøngmaq yv’ng svng tuq lúngì.
_ Mvkv’m la Kv’m yv’ngkèní Cúnshì we Kvmnønt tvrà svng,
_ Cúnshì we Kvmnønt tvrà yv’ngkèní Shvkse wáshì lún we dvbù lvm lvpat tvrà svng tuqlú:nì nø cúnshìlúnìe.

Wervt Kristu vdòng taq vpø’ íwe pèmè vnvmchvngmaq, ìshøt vl we jèjú rì svng Vkangpè kaq Kvmnøntní røtním tvleshì laqlúnì.
_ Vcø’shaq íwe nøngmaqò Nønt mvsøn bvngka rì svng tánshì laqlúnì.
_ Nøngmaqò Kvmnønt téwa vháng vlúnlvm rvt , Zun á:mì lòngò angkang, Shvkse wáshì rì í lúnlvm rvt Dvzvr Toma pàdø nøngmaqò lvpat taqkèní mvkøm mvzøp rì svng vjángì taqsórí Kømzøp we Pvlàcè Kvmnønt nònggùn kūnga lùshì laqlúnì wvng dvshat nø nònggùn zí mvyø’è.

Shvngbe í Vkangpè Gvray Mongzøl lòng vtoshì leqlúnøng, Shvngbe svng oqā.