Shvngbe mvdvm Vkangpè mongzøl lòng laqtuqdaq! Dèni Pvlàcè nònggùn lùshì lvm Gvray móngkà nø Yohan 21:1-14 vdòng taqkèní íē.
Vpø’ íwe pèmè vnvmchvngmaq, Dènio Gvray Dvbùshang Mongkà svng dvdvm vjáng taqsórí nònggùn zí nø dvshat mvyø’ we taq;-
Vjúrøtshìe, walòng nø pà i mà? Vjúrøtshìe walòng nø nøngmaq nvng Gvray gvsang dvhø taqø vzøm vzapmì lòng, v-toq v-tipmì lòng íe. Vrá nø, Rvmja vní gø’ bø’n lúnlvm rvt Rvtø rì svng lùshì ra pàdø, tāsvng tālè v-toq v-tip dvmvn lún ràe, táā ràe. Tiqkvt la kvt nø shø’mwace mongzøl dø vl ràe. Rvtø rì mvmè vlé dvshàshà vzø’m vzap lòng gø téwa wā vpø’ nø rvnaqe, ringè. Vrá nø, Nøngmaq nvng Gvray gvsang dvhø yv’ngø vzø’m vzap lòng téwa vháng lúnlvm rvt Gvray gvsang nvng V-toq V-tip Kà shøn rà ìe. Gvray gvsang shø’n Kà svng nøngmaqí tálún ràe. Tiqkvt la kvt shømwàce dvdvm vjáng nø gø vjúrøtshì ràe. Nønt mvsøn mv’ngsher we taqø Gvray gvsang nø nøngmaq kaq Kà shø’nè. Gvray gvsangí zì we Kūnga shaq svng tāshì lòng nø vjúrøt Kà ò nvmlat mvpv’ngnì íe.
Vrá nø, Yesu Kristu nø shì yv’ngkèní vrá Zun á:mì dvzvrì nvng vshøm baq vhø’m mv-ngúshì bø’ì. Dvzvr Piter gø vbá nø, Dvzvrì í tiqyaq poyaq Ngā vkweòe, íni gø tiqgō gø Ngā mvlúnò. Dvzvr Piter àngmaq mvdò nø Ngā vkwe we bvnlìrì taq gvzà vjàngshaq langlì rì wā íe. Kristu ínø kungshì vbàngpà kaq svng shømgún dvgup dvzvrò dvgvp àngmaq vtv’nshì shvlàe. Íni gø, àngmaqí Vkangpè Kà svng táāòe. Àngmaqí lúnò Ngā shvngbe nø (153) go íe. Àngmaq taqkèní Gvray gvsang móngkà svng cvndvgøm nø tashì lòng, àngmaqí cvndvgøm vtoshì lòng nø àngmaq vjúrøtshì lòngò nvmlat mvpv’ng í bø’ì, walòng svng shálúnshìe. Yv’nglúnshìe.
Yadang svng dvdvm nø, nøngmaq taqkèní gø Vkangpè dvkv’m Kà rì svng Kvmnøntní cvndvgøm nø tvleshàì nø shvkse wáshàì we taq Vkangpè Gvray Mongzøl lòng vtoshì lúnlvm vlē walòng svng shvdømè.
Dèni Pvlàcè nònggùn lùshì lvm Gvray móngkà Jømciq nø, Yohan 21:1_14.
Yesu dvtánshì we
Yadv́ng pv̀n mèpvng Yesu nø, Tiberia tìnúng yv́ng coqcv́nrì svng vrá tiq kvt dvtánshìe. Dvtánshì lòng nø yadø íe. 2 Simon Piter nvng Didimu tǿò pè Toma nvng Galili móng Kana rvwá pè Nataniel nvng Zebedi angcè pèní nvng Ang coqcv́n dvgá vní pè gø tiqdø v̄l ke, a 3 Simon Piterí angmaq svng, “Ngà nø ngā gøpkengvme,” a:lòe. Angmaqí ang svng, “Nøngmaq lvngà gø nà nvng dìlv́m íe,” a:lòe. Angmaq nø kùngshí taq zv́ngshìá:mì. Weyaq nø angmaqí pàgø gøp mvlú:nò. 4 Gá daqì dvgvp, Yesu nø tì vdàm pa ripme. Inìgø coqcv́nrìí nø Yesu í we màmvshá:lò. b 5 Wekvt Yesuí angmaq svng, “Cv̀mré rìé, ngā tvp mèlúnnøng ma?” a:lòe. Angmaqí, “Mvlú:ni,” wa vtá:nòe. c 6 Wekvt A:ngí angmaq svng, “Kùngshí vbàng pa svng shǿmgún dègupnø̀ng, wekvt ngā èlún daqnø̀nge,” a:lòe. Angmaqí shǿmgún dvgup bǿà nìnø, shv́l gø mvdá:ngò høq ngā gvzà lún bǿà.
Mongkà ètashìnøng we Shvngbeí Gvray mongzøl lòng vtoshì leqlúnøng Shvngbe svng oqā.
