Coqcv́n rì svng Vkangpè Yesu dvtánshì we
Shvngbe mvdvm Gvray mongzøl lòng laqtuqdaq! Dèni nø Vkangpè Yesu Zun á:mì we Nár lvban vbí ni svng gòng bø’shà. Dèni tashì lúnlvm Gvray Mongkà nø Luka 24:35-48 vdòng taqkèní íe.
Coqcv́n rì svng Vkangpè Yesu dvtánshì we
Kristu vdòng taq Vpø’ íwe pèmè vnvmchvngmaq, Mongkà taq “Nga svng nakòqsha Nga øngàe walòng svng namaqí ni èyangnøng.” wā Vkangpè Yesu shøn Kà svng Dènio Gvray Dvbùshang móngkà taq tálúnshìe.
Emmaus rvwá kèní coqcvn v-ní pè í tvrà rāmø yvng bø’à Zuná:mì we Vkangpè Yesu Kristu tvrà svng dvzvr vgo pè nvng dvzvrì, àngmaq tāsvng tālè dvmvn nø vrùng dvgvp Vkangpè Yesu nø àngmaq shvngbe mvrdvng yv’ngø dvtanshì daqì. Àngmaq mvrdvng yv’ngø Vkangpè Yesu í nø Kadøku àng tiqgóng svng vkoq dvzvrè mà? Dvzá:rì angmaqò Nønt mvsøn vdòng taqø Vkangpè Yesu nø shì bø’ì, Pàgø shønlvm mà-vl a:mì, vdv’ngá:mì wā dvdvmòe, Nønt yòr e. Íni gø, Vkangpè Yesu nø àngmaq taqø dvtut gømlā rì svng dvtanshìe. Íni gø angmaq taq dvdvm Nønt rì, Nønt mvsøn vdòng, Nønt dvt Nønt yòr lvm vhø’m bø’à rì shvngbe svng vrá vdv’ngshì lúnlvm rvt, mvyòr gvzà rvzaqè. Àngmaq taqø Vkangpè Yesu dvpvt Nønt dvt Nønt yòr lvm rì mv-be, Vkangpè Yesu svng Cang minlā ku dvdut we gø vhø’m yangà.
Vkvtdø íwe gømlā rì svng dvtan we taq, Vkangpè Yesu svng Cang wā dvdutnòe.
Vkvtdø dālvm gømlā mvshvl rì taqkèní gø dvtanòe. Íni gø àngmaq Nønt mvsøn vdòng taq Dìngman lòng svng lá mvlunò. Vkangpè Yesu nø shì yv’ngkèní vrá Zuná:mì, jór pòngbang lòng svng dvtanòe.
Vrá nø Àngmaq kaq Vkangpè Yesuò tiqgóng svng zø’m dvzvròe. Shú:pm dvzvròe. Àngmaq Vzvngø jø’ngjøngni Dìngman lòng nø Vkangpè Yesu Kristu àng tiqgø’ wā íe. Àngmaq yv’ngkèní vmlvm aqlvm røtvm taqsórí zànglvm Jang svng gø røt nø Vm-aqè.
Vrá nø, Vkangpè Yesuí àngmaqo Nønt mvsøn bvngka rì svng tá:nà lúnlvm rvt Mongkà rì svng pø’nàòe. Vkangpè Yesu nvng singdø bø’n bø’ì we mvbøn tvrà rì svng síngràl lúnlvm rvt Mongkà nø mà-vl mvdaq í a:mi. Àngmaqí síngràl lúnò chàng, Móng Dø’ngtáng svng dì nø Kristuò dvbùshang Mongkà svng dvshvngòe, Vkangpè bøng taqkèní Nønt vwángshì lúnlvm rvt, Mvra vdòng taqkèní lutshì nø Gvray mongzøl lòng vtoshì lúnlvm dvpvt dvshvng bø’à.
Kristu vdòng taq Vpø’ íwe pèmè vnvmchvngmaq yalòng nø Àngmaqo Nønt mvsøn nvrøm svng vdv’ngshì dvzvr we gø ínø, Yerusalem Myoq wama kèní Dvbùshang bvnlì àngshvr svng wà bø’à lòng gø íe. Wè dø tiqdvchá dèni nøngmaq gø’ vrvm svng gø Vkangpè Yesuí nø shóngnøntní ego íe. Nøngmaq lvpat taq tálúnì rì, yv’nglúnì rì, dvtøp lúnì rì, nøngmaq svng síngràl dvzvr we Nyan Bvnya kūnga vzàm svng Shànshér Pvlàcè kūnga taqkèní è zí íē, walòng svng vkvtdø yv’nglúnshìe.
Wervt vpø’ íwe pèmè vnvmchvngmaq, Vkangpè Yesuò Dìngman lòng svng dvzvrì í Kvmnøntní vjàngò nø angmaq tiq lvpat kèní dvshvngò taqsórí Shvkse wáshì yangì pàdø, nøngmaq lvpat taqkèní gø Vkangpè Yesuò Dìngman we Kvmnønt tvrà svng Kvmnøntní gùndvtøp vjáng nø Nønt mvsøn tiqgóng Kvmnønt Pvlàcè nònggùn kūnga lùshì laqlúni, wvng dvshat nø nònggùn zí mvyø’è. Shvngbeí Vkangpè Mongzøl lòng vtōshì laqlúnì. Shvngbe svng oqā.
