Kristu nø wurgáng tvrà svng diwe rvtø̀ nøngmaq nø àngmè pvng cv́n dvzaqshì lv́m wáshàì.
Shóngshø̀ngwe vnvm vchvng maq Kristu nø wurgáng tvrà svng diwe rvtø̀ nøngmaq nø àngmè pvng cv́n dvzaqshì lv́m wáshàì. Kristu àng nvng tiqdø dìì we rvtø̀ taq vsvng dvcìrì shvngbe dvpvt dvshà mvhøt lòng svng rí yv̀:ngà nø vsvng dvcì rì shvngbe dvpvt dvsháza shóngnøt gømpaq ku àngò gønshaq svng zíshì yv̀:ngì lòng svng màná dø̀mrø tiqlòng ku dvdam shì ràì we íe.
Mvjàn shìwvtrì dvhø̀ taq mvhøt lv́m rìí vtøp kéì we ínìgø Kristu àng yv́ng svng vlǿm shàì. Kristu àngò dvsháza shóngnøt rì taqkèní svkse wáshì lv́m dvzaq shàì. Ngànshàrì taqkèní laknak rìí èkwang kéì we ínìgø Kristu nø we vsvngrì nvng nøngmaq shvngbe svng shóngnøt kèní èkup ègvrì we íe. Dølòngí mònggv̀n svng køp lú:ngà we høqshaq Gvray àngí nø gálòng svng èzí ráshà we íe.
Kristu àng svng shìlv́m dam zúshì bǿì we høqshaq àng taqkèní nø dvciq lvpat gønshaq lòng mvng ezí ráshà we íe.
Mòngzø̀l lòngò koqkv́m íwe Kristu àng shvrúng nøt nø nøngmaq kaq svng Gvray nvng nøng maq dvhø̀ taq ínìgø, tiqdv́ng vsvngrì nvng ínìgø vgám rawe vtøplv́m tvrà rì svng dèshérāì we íe (Epesus 2:14)
Meshia turáì wervt dvbùnøt lv́m tvrà svng kà dvtutshú rìí dvtut ráà we kà rì dvgøm lú:ngà Kristu nø Jerusalem svng Lòze zúnshìnø gòng ráì ” Zion zvmìcè mèé, vtvngkèní dèbù! Yerusalem zvmì mèá, èjòrá:mì rvt nàkiq! Eyà:ngò, nà koqkv́mpè nø nà yv́ng svng di daqe. A:ngí vdu vbóng dø rvwa:nò nø, gø̀nshaq shvlutnalv́m jórnònggùn gø Ang v̄le. Ang nø nøt cipshì nø lozèdvcheq taq zúnshìe. Lòzèdvcheqcè mvdv̀mø ni zúnshìe. f 10 Iwe Efraim rvp kèní cìlgàrìrì Ngàí dvdvtnò nø, Yerusalem wamà kèní gø̀mrangrì dvdvtlv́m íe. Cìl vshvtlv́m pv̀ndvn gø dvbélv́m íe. Wekvt wv́ngzà dvcìrì svng nø A:ngí vrv́m vrálv́m Mòngkà dvsha:ngò nø, A:ngí øpgø̄m lòng gø, nvmukdvra tiq mvtú kèní kūmvtú høq, Yufrat Rvmè kèní rvgaq vtv̄ng tong høq í longe. (Zekaria 9:9-10)
Kristu svng gvr lv́m shv̀mshe shì nø dvkáng shìwe dvzv́r Peter nø we cil gø svng vtuq lv́m dvkáng shì wekvt Kristuí vtàn ráàwe kà Mt 26:52 taq “Nà shv̀m ka nø dø̀nggàng taq rèdashì. Pàwálv́m wani shv̀m lá:ngò rì nø shv̀m taqni vmvngvme”. wanø̀ dvkám ráà we íe.
Kristu nø mvrø̀ we nøt mvsø̀n, vréshì we ngàshà nøt rì svng shvzǿmā we Gvray íwe svng svkse dvtan ráà wegø íe. Wedø mòngzø̀l lòngò koqkv́m íwe Kristu Gvray svng wurgáng mvdàm shvt bǿà we høqshaq àng gønshaq zíshì bǿì we Kristu, nøngmaqò Gvray svng mònggv̀n mòngzø̀l lv́m tvrà taq àng taqø wa mvdø̀ng vlǿm shì rà íwe svng síng shá ràì we íe.
Wurgáng mvdàmø àng gønshaq vle lv́m rvtø̀ taq shaqmèí vla ráà kàciq lòng nø nøngmaq bashàrì dvhø̀ taq yak lv́m shìwvt rì, zá vtøp ràrì mvhøt lv́m tvràrì shvngbe svng vtánā we tvrà gø íe. Gvray nø shóngnøt íe, dvsháza shóngnøt shvzvtā shú ínø̀ nøngmaq dvhø taq tiqgǿ nvng tiqgǿ gø tasvng shóngnøt rì vzíke ràwe svng svkse dvtanā we íe.
Kristu Gvray nvng nøngmaq dvhø̀ taq ìshøt jejúrì svng dvtit tvleā shú íwe àngmè Mari gø we zv̀ngø vlwe ínø̀ bashàrì dvpvt dvsháza shóngnøt kèní dvciq lvpat gønshaq tvrà taq nøngamq dvpvt dvbang shú tiqgǿ wáshì we ínø nøngmaq nø shìlòng svng kadøgø svre lv́m mv-vl. Mònggv̀nò kadø íwe mvhøt lv́m mvrù møt longwe ínì gø we tvrà nø tiq lvngcè dvpvt wa ílong nø mòngzø̀l lòng tvrà svng tuq lú:ngì we svng kadvgvp gø dòng nøt mvsø̀n taq vshøp shàì taqsórí nøngmaq dvhø̀ taq dvsháza shóngnøt rì shvzvt nìnø̀ tubúm dvbangā kèlv́m dvzaq shàì.
