Penàmcvp kungla Shvmv’n bóy

Palm Sunday Homily

Shvngbe mvdvm Palm Sunday kungla, Penàmcvp shvmv’n bóyò Gvray mongzøl lòng laqtuqdaq!

Shóngshø’ng we pèmè vnvmchvngmaqe, Ya lvban nø Vkangpè Yesu Yerusalem mvring svng jór lòng í gòng lúngì we Palm Sunday bóy àngni íē. Ya lvban taq
Rø v-du we Gvray gvsang móngkà jømciqrì nø;-

(1) Esaya 50:4-7
(2) Filipip 2:6-11
(3) Mati 26:14_27:66.

Ya lvban nø Vkangpè Yesu Kristu Sanlun pung taq (40) ni Vmpà màv’m vm-aq vnatshi, vjúrøtshì yv’ngkèní jór lòngí Yerusalem mvring kaq svng gòng lúngì we taq Hebru vsvngrì í Vkangpè Yesu dìlvm tvrà yv’ngyv’ng shøng dvgv’ng Penàmcvp rì bvlūò nø vtō yangà we lvban ni gø íe. Wè ni svng vrá dvdvm vjáng nø wáshì we bóy gø íe. Dènio Mongkà Nvmlat wál taq;-
( I )
Kungla, Penàmcvp shvmv’n bóy ò àngbøng mvdøng nø,”PALM SUNDAY” wā tø’shìe. Nøngmaq móngdàn rvgaq taq yō we Kungla cvp, Penàmcvpí Vkangpè Yesu svng vtoshì lòng íe. Wèni taqø, Kungla,Penàmcvp Shvmv’n shì we nvng Penàmcvp shø’ng dvgv’ng lvngshì taqsórí támshì nø (procession) dì dvgvp, Shøn we Rø shì we Gvray móngkà jømciqrì:-

Mati 21:1-11.. Vkangpè Yesu nø Yerusalem mvring svng tùq lúngì dvgvp, Shiwa vsvng mvngpòngrì í Penàmcvp vwvtnò nø ,” Hosanna ” wā vkiq sórí vtōò nø shø’n we tvrà svng yv’nglúnshìe.

Yesu nø Jór Pòngbang nvng Yerusalem svng gòng lú:ngì we Tvrà

Kristu vdòng taq Vpø’ íwe pèmè vnvmchvngmaq, Kungla Penàmcvp Shvmv’n we Nár ni taq,.. Vkangpè Yesu nø jór pòngbang taqkèní Yerusalem mvring svng gòng lúngì tvrà svng dvdvm màná mvsvtshì nø wáshì tvrà íe. Vkangpè Yesu vrá Zun á:mì we Paska Zun bóy ( Easter) ò vzàng Nár ni gø íe. Vrá nø, Shànshér we Nár svng nvmlat pvngshì angni gø íe. Shvngømréò lvpat mvshøl svng èyvng lúngò dvgvp, (4)vbí yámvzøq bé lúngì lvp kèní, yalòng Palm Sunday wàwe kungla penàmcvp Shvmv’n we bóy angni svng Yerusalem yv’ng Nvmlat wá pvngyangà tvrà svng shálúnshìe.

Penàmcvp ( mø-í ni) kungla cvp

Penàmcvp (Palm) mø-í ni, kungla cvp Wur taq lv’ng taqsórí Vkangpè Yesu kaq svng vtōshìe. Àng kaq shvgùn shvring shìe. Yalòng tóng laqya nø wè vzàng kaq Greek dvcirì í gønzøp shvre langlì rì kaq svng Vpø’ shvringò we, cilwang Mvzv’n jo:rvm dvgvp cil du rì svng shvgùn shvring dvgùng møqwe Tong laqya taqkèní íē. Penàmcvp (Palm )pvn mvmè pvn vl lòng svng gø shálúnshìe. Wervt nøngmaq rvgaq taq penàmcvp mvdøng lòng íwe gvzà mvyō. Wè penàmcvp pvn íwe kungla cvp svng mvng le mvdøng lv’ngshì lúngì tvrà íe.

Vháng we shvra yv’ng ‘Hosanna ‘laq i daq!

Vkangpè Yesu nø Yerusalem mvring svng gòng lúngì kvt, Shi wa vsvng mvngpòng rì nø penàmcvp rì nvng laqtun belaq rì Yesu dì lvm Tvrà yv’nggùng gùng pvlūàòe. Yalòng nø Vpø’ò sórí Vkangpè Yesu svng vtōò we àng lvjøm íe. Wè shø’ngcvp.dvgv’ng rì svng gø vwvtnòe. Nònggùn kūnga taqkèní ” Hosana” laq i daq! wā vkiq nø shø’nè. Vkangpè Yesu nø Lòzè mvdvm zunshìe. Lòzèce mvdvmø zunshì we àng lvjøm gømlā nø, Mongzøl lòngò àng lvjøm íe. Yalòng ” Hosana” wàwe Kà àng lvjøm nø, ìshøt ìgvn vle, Chut èchvng daqshà, Vkangpèa, wā røtnímshì we” “Pray, save us.” àng lvjøm íe.

Kàgvp Nóngpà Shvrúngà we Rvtø

Esaia 50:4-7.… Gvray dvzømshú nø, Dinggvng dø rip lungè. Àng nø vtu vre we kadv’ngte vhø’mò nigø, Dø’ngvng dø rip lungè, wàe.

Hpilipi 2:6-11 …… Vkangpè Yesu nø Wurgang mvdvm gønshaq dvbø’nshì nø shì ni høqshaq, Vpè Gvray gvsangò dvkv’m Kà svng cvndvgøm nø Kà tāè. Wervt Vpè Gvray gvsangí nø Àng svng shvgùn shvringò we í dvzún bø’à, wā dvzvr Polo taqkèní gø shvdømè.

Mahte 26:11- 54 …. Yesu Kristu nø dvshá mvhøt vtv’ng chutchvng we tvrà taq vhø’m yangà dang yv’nglúnshìe.

“Yuda Iskarutní Vkangpè Yesu svng vp tvleò we”

Dvzvrì yv’ngkèní Yuda Iskarut lv’nshì pè ínø Vkangpè Yesu svng ngvnsha rì wur kaq tvleò nø nvmá:mòe. Roma mungji pè Pilatu ínø, Yesu svng shvtlvm Kàciq rvt bø’à. Yuda Du Vji shaqré mvdò (Sanhedrin council) kèní, bvnlì yalòng svng bø’n høqshaq wà bø’à. Dvzvr Piter ínø Vkangpè svng mā bø’à. Vrá nø, Yesu lvmboqrì ígø àng kaq svng lang ráà. Vkangpè Yesu svng Wurgang mvdvmø shvt bø’à mèpvng, Angò vnang svng dvgv’m yv’ng gvl bø’à, kø’m bø’à. Vkangpè Yesu nø Mònggvn yachang mvdvm taq v-li rì shvngbe dvpvt, gønshaq dvbø’nshì vpnóngshì nø shì bø’ì.
Yalòng nø Adam nvng Ewa níí vléò we Shiwvt mvra dongjøm kèní chut èchvng bø’shà we Vkangpè Yesuò rvnaq shóngnønt íe.

(KUNGLA) Penàmcvp Nøngmaqí dvtánì we àng lvjøm gømlā

Penàmcvp nø Nøngmaq taqkèní dvtánì we shóngnønt gømlā íe. Wè gømlā nø, nøngmaq gø Vkangpè Yesu nvng tiqdø, dìlvm shvrúngì lòng íe, Mongzøl nø Jór lúnì we rvtø taq íni gø, dvshà mvhøt yvklvm vhø’mshì rvtø taq íni gø, Vkangpè Yesu kaq vlømshì nø dvgøqshàìe, wàì we àng lvjøm dvtánshì tvrà gø íe.

“Yuda Iskarut svng mvgvm màshvla pè wā shø’nie”

Nøngmaq gø’ vrvm gø Yuda Iskarut nvng vbóng sháìe. Ja gvmsung lún mvyø’ íwe ma:pnønt rì, angdèo Døngman we Kvmnønt svng vm-lvm aq-lvm ja gvmsungrì taqkèní tvlevm mvyø’ we nønt rì, nøngmaqò Nønt mvsøn vdòng kèní sher dø vyáshì lúnlvm gvzà rvzaqè. Vkangpè Yesu svng vp tvle bø’à rì, àngde vl lúnshìlvm nvng dvgùng gùngshang lvm lòng svng wā Nvmlat taq gvl sháìe. Dvrá rin vrá vlún vkvng svng wā, téwa shvrúng sháìe. Gønshaq vpnóngshì nø shóngnønt, Kvmnøntní dvnúng lvm tvle, Nyan Paqzi gvsvt vjø’n nø, yílshì lvm dvzaq sháìe. Tiqdvng vsvng kaq shø’nvm we taq téwa Nønt lú:m vshòìe. Vkvtdø íwe laqya rì svng, dvshér lúnlvm rvt, krvtzø’m bø’ì we tvrà rì yv’ngkèní vrá Chutchvng lvm, shvlut lúnlvm dvpvt, Vkangpè Yesu Kristu nø Nøngmaqò Mònggvn rvgaq yv’ng svng tuq lúngì, dì lúngì lòng íe.

“Vkangpè Yesuí cvndvgømò we”

Vpè Gvray gvsangò dvkv’m Kà svng àngnønt í lòng svng, kømgø’m cvndvgømò rvt, dvshá mvhøt vtv’ng vhø’m yangà. Yuda Vsvngrìo “Shvlebóy”
(Passover) wàwe vchvk we bóy dvpvt dvgø’shì lvm, Àng dvzvr vní gø’ svng dvzvr bø’à. Yesu nø, Tsanlun kùrwang yv’ngø vjúrøt shì dvgvp, mvhøtlvm lòng àng yv’ngkèní shvlēa lvm rvt, Vpè Gvray gvsang kaq (3) baq vjúrøtshì yangì. Íni gø, baq vrvm Vpè Gvray Na nønt í dø tiqdvchá laq i daq, wā shø’n taqsórí ‘Cvndvgømò’ lòng svng dvtánòe (Mt 26:39-44). Dvzvr Mati ínø, Yesu svng Kàgvp anglíò mvhøtlvm yvklvm lòng svng vtōò we dvzømshúce (suffering servant) í lòng svng dvtánò nø shø’n yangà.

“Kà shvdiq mvdøng vtu pè “

Yuda Iskarut Shì yangì, àng lvpat mvshøl tvrà angdùng svng Mati dvbùshang móngkà taq yv’nglúnshìe. Dvrá Kàciq rvt we shvra yv’ngø Pilatu rung dvgvp, Angò Døngku me í àng svng coqcvn rì dvzvrò nø, wè Døngman pè svng Pàgø mewàni, wā dvkv’mòe. Lvngdøm taq, Pilatu i vtì luò nø, shiwa vsvngrì mvrdvng yv’ngø, Wurcìqshì sórí shø’n we taq, ya pè Døngman pèo shvwi svng Mvra màdá shórshì dvzvrì lòng nø, Ngà Mvra laq mø-í. Namaqí ni yalòng bvnlì døngja svng nàtōnøng, a:lòe. Vrá nø, Mati dvbùshang móngkà taq shø’n we nø, Yesu Wurgang mvdvm shaqdvt dvgvp, Muqlang rvgaq gø vnanshì nø, lónggá rì gø dē lúngè; dvgvm rì gø vtán ra nø, Shànshér we Vsvngrìo shì vnangrì mvmè Zun lungè, wàe. Yalòng nø, Vkangpè Yesu Kristu mèpvng cvn, Kvmnønt vl rvzvngcerì shvngbe gø lvngdøm angni taq dvzún we í, dvciq lvpat Gønshaq, Gvray gvsangí dvgøò we