Mvjàn rvt Jerusalem wawà taqø Palm Sunday tvyø rvcángcèrì wamà vriq lv́m lvmang svng cat vdu bǿì
Mònggv̀n nv̀msvr, rvwè dung taq bø̀nwe mvjàn rìrvt Latin Patriarchate of Jerusalem taq àngwà nǿng rì taq wáshì we Zvnlún shìgùng kèní Jerusalem svng rvcángcèrì támshì nø̀ diwe Palm Sunday tvyø svng cat bǿà we svng shálún shìe. We tvyø tvle vjúrøt mvngushì we tvyø svng wáshì lv́m íwe dang shálún shìe.
Chrism Mass shv̀shér we lvbán 5 ni taq wáshì lv́m íwe shv̀nshér we só shvmv́n bóy tvyø svng zunbóy (Ester) lvngcha vdòng tiqni ni wá vdu long we svng gø dvtú bǿà we íe. We dø rvcángcè shvngø̀mré vsvngrì àngwà nǿng rì dø támshì nø diwe tvyø svng cat bǿà we ínìgø Noqngø̀mchø̀m rì mv̀ng nø rvtø̀ vrv̀m vtán shaq wáshì lv́m íwe svng gø vrìng bǿà we íe.
We dø mvhøt we móng lvmvng rì vdòng taq zunbóy svng àngwà nǿngrì dø wá mvlún bǿà we nø mvjàn vdòngø shìwvt vhǿ:mò móng vsvngrì dvpvt téwa vtøp lv́m tvrà ílv́m lòng svng vgám we ku kèní dvgá tvyørì ku vjúrøt dvzaq shì lv́m Cardinal taqkèní gø dvkám bǿà we íe.
Shvnshér we shvrà vrv̀m taq ya zunbóy ni la vdòng vjúrøt tvyø lvmvngrì yv̀ng màdat vl longwe nvng Jerusalem taq vlwe Franciscan shvrúngshú rìnø shv̀nshér we dvgv̀m (Holy Sepulchre) shvrà rì taqø pv̀nyv̀n vjúrøt tvyø rì wàlv́m íwe dang vrìng bǿà we íe.
