“Shì lòng nvng Zun lòng mvdvmø yv’ng lúnshì we vzàm”
22 March 26 Sunday Homily (5)
RVA rvwang Shvngkà tvyø svng ètashìnøng we shóngshø’ng we pèmè vnvmchvngmaq shvngbe svng Pamvra! Ya lvban nø, Vmpà màv’m vm-aq vnatshi rvtø, lvban (5) lvban wà lvban svng gòng bø’shà.
Ya lvban taq rø v-du we Gvray móngkà ciqrì nø;-
Ezekela 37;12-14
Roma 8:8-11
Yohan 11:3-7,17,20-27,33-45.
Vpø’ íwe pèmè vnvmchvngmaq,
Ezekela 37:12-14 ……. Vkàngpè Gvray yadø wae, Eyv̀ngnøng, Ngà bashàrìé, nàmaq dvgv̀mrì svng Ngàí tá:naì nø, weyv́ng kèní nàmaq svng kūngshì dvzv́rlv́m íe. Wedá:ngí Israel móng kaq Ngàí nàmaq svng dvtv̀nglv́m íe, wàe .
Roma 8:8-11 ….. Gvray gvsangò Shànshér Pvlàcè nø Namaq mvdvm taqø vl rvt, Gvray Shànshér Pvlàcèí øp kv’ng we jèjú vdòng taq lè namaq èv̀lnønge, wā dvkv’mè.
Yohan 11:3-7.17,20-30,33-45….
Vkangpè Yesuí nø shìvmì we Lazaru svng dvzúnò tvrà yv’nglúnshìe.
Vrá, Zuná:mì we nvng Gønshaq Cúnshì we Tvrà
Vpø’ íwe pèmè vnvmchvngmaq,
Dvzvr Yohan í vrùo we móngkà taq, yadø wàe.” Vrá Zun lòng nvng Gønshaq cúnshì lòng” tvrà svng mvdøng mvdaq dvkv’m nø shvngøt dvtúè. Bethani mvring kèní, Lazaru nø zā yv’ng gvba vhø’mòe. Ang taqø angnvm vní gø’ íwe Martha nvng Maria vlē. Angnøngnvm vshøm gø’ nø Yesuò jinghku angnvm angchvng rì íē. Lazaru zā yv’ng vhø’mò we Shvngkà svng Yesu kaq dvtáòe. Íwe Yesu nø vní ni vlé á:mì mèpvng wā àngmaq yv’ng svng tuq ráì. Wekvt jinghku angnvm angchvng íwe Lazaru nø shì nø kø’mvmà. Dvgv’m vdòng yv’ng vl we vbí ni í a:mì. Àngmaq Nønt dvt Nønt yòr lòng svng Yesuí yvngò dvgvp, Yesu Nønt yòr we í nēci vlàòe. Vkangpè Yesuí gø kadv’ngte Nønt yór vhø’mò lòng svng yv’nglúnshìe. Yesu nø Lazaru svng kø’mvmà we dvgv’m yv’ng svng dì nø,” Lazaru èkúngshìdaq ” wā gōòe. Wekvt chàng, Lazaru nø shì yv’ngkèní Zun nø kungshì lúngì. Yv’ng lúnò rì shvngbe nø Dádvng wa á:mì.
Yalòng nø, “Shì lòng nvng Zun lòng mvdvmø yv’ng lúnshì we vzàm” íe.
Lazaru svng dvzun bø’à lòng nø, Yesu nø shì lòng nvng Zun lòng mvdvm jór lún we nònggùn Kūnga vzàm vl lòng svng dvtáò lòng gø íe. Dvzvr Polo shø’n we móngkà taq, Kristu svng dvzúnò we Pvlàcè ínø, Namaq shvngbe svng gø gønshaq àngshvr taq Cúnshì dèzvr daknøngè, wā shø’n yangì. Namaq nø Tìløp lòng taq Kristu nvng tiqdø Shì bø’shà. Kristu Zuná:mì lòng taq vrá lúm lún bø’sha lòng svng vlømshàìe, wā dvzvr Polo í shvngøt dvtúè.
Vrá nø,”Na èkám ni Gvray gvsangò jór pòngbang svng yv’ng lúnlvm vlē,” wàkà íe.
Ya Kà nø, Yesu í Martha kaq svng shø’nò ‘Kà’ íe. ” Martha nvng Maria nvng tiqdø, Yesu nø Zun lòng nvng gønshaq cúnshì Tvrà í lòng svng dòng Nønt mvsøn kèní dvdvm vjáng sórí Kv’m ra íe.
Vrá nø,” Yesu nø Yerusalem mvring svng tuq lúngì ” tvrà
Yuda shaqré shaqtang rì nø, Lazaru vrá Zun lúngì rvt, Yesu mvdvmø mvwámshì we Nønt, shvngōshì we Nønt rì dvnzøng lúngì. We rvtø taq, Yesu gø Yerusalem mvring yv’ng svng tuq bø’ì. Shiwa vsvngrì í nø, Yesu svng Nà Messiah è í mà? mè í mà? Shangshangwa shø’nà lvm rvt a:lòe. Yesu ínø angí wà bø’à we dālvm lvmik gømlā rì svng èyvng nøng nø shá nàpv’nøng a:lòe. Wè dālvm gømlā rì nø, Àng nø Gvray yv’ngkèní dì lúngì lòng svng Shvkse wáshì we íe.
Vsvng mvmè nø Yesu kaq mvká:m rvt , Yesu svng vbø’nshì lúngì, Wervt lúngí wàp nø shvtlvm dvgø’shì tvrà svng yv’nglúnshìe.
Vrá nø, “Yesu Zun lvm Shøngmang” dvtánò we
Lazaru kaq svng dvzúnò lòng nø, Yesu Zun lvm lòngò dvbùlvm gømlā íe. Yesu nø, Yuda Du gamzø shaqré rì nvng, dvdvm Nønt màbóng lúngì. Vkangpè Yesu nø Vpè Gvray gvsang kaq dàq vtu Kv’m sórí cvndvgøm nø vlē. Lazaru kaq svng vkvtdø dvzúnò lòng nø, Shì lòng nvng Zun lòng mvdvm taqø Angò jór nònggùn kūnga vzàm nø kadv’ngte vlē walòng svng, dvtánò tvrà gø íē. Vrá nø, Tìløp jèjú gømlā zi lòng svng vtoshàì lòng nø, Vkangpè Yesu Kristu nvng vzøm lúnì lòng íe. Shiwvt mvra taq shì bø’ì nø, Vkangpè Yesu Kristu nø, shì lòng nvng Zun lòng svng jór a:mì rvt, Vkangpè Yesu àng taq Kv’m vsvngrì nø ‘ dvciq lvpat Gønshaq ‘ svng vtoshì lúnlvm vlē. Nøngmaq gø Martha nvng Maria ní dø, Zun á:mì dang nvng Gønshaq angkang pè Yesu Kristu kaq svng Kv’mnøntní vtoshì nø Pvlàcè nònggùn kūnga lùshì laqlúnì!
“ Maria svng Nønt shvløm we Yuda vsvngrì mvme, Vkangpè Yesuí wàò we bvnlìrì svng yvngò chàng, Àng svng Kv’m bø’ì.” (11:45).
