Shiyat Bóy svng Yesu di we

Dèni rø v-du we Yohan Dvbùshang móngkà taq, Vkangpè Yesu Kristu dvshà mvhøt dvki vre vhø’m yangà Wurgang tvrà, Shì lòng nvng Zun lòng svng dvtánò we taq, Kristu nø shvre we mà-vl, vzaqshì Nøntní vpnóng tvleshì nø Chutchvng we Wurgang svng paqò tvrà yv’nglúnshìe. Dènio Gvray Dvbùshang móngkà taq, Vkangpè Yesu nø vzaqshì we í ” Ngà nø, ngà dang taqkèní døngdakngà we mø-í, Ngà svng dezvr daknga pè Àng yv’ngkèní døngdaknga we íe ” a:lòe.(Yh7:29).

Yuda vsvngrì ínø ya Kà svng tálúnbø’à kvt àngmaq Nønt mvsøn vdòng taq vl mv-nvm á:mì. Pàwálvm wàni Nøngmaq nø Gvray gvsang Àng íni, rezvng bø’shà we Dvci rì í shàe, wā vtoshì dø tiqdvchá Kristu ò Mongkà svng Kv’m lvm vtoshìlvm rvt gvzà rvzaq nø, Vkangpè svng tvplvm dvzaq dvkvngshìe. Vpø’ íwe pèmè vnvmchvngmaq, wè shvra taqø Vkangpè Yesu vzàqshì lòng, vtv’nshì lòng, Shìlvm lòng svng gø màshvre nø Døngman lòng svng vchàngò tvrà nø gvzà vpø’ nø shvring we dvbùlvm ra íe. Vkangpè Yesu mèpvng cvnì we Nøngmaq shvngbe gø Vkangpè Yesu Kristu kaq svng shóngnøntní vnvpshì, kúrshì,vzaqshì nø tvleshì laqlúnì. Wè mvdvm Gvray gvsang shvrúng we rvzvngcerì, Døngman lòng svng vchàng lún we rvzvngcerì , Gvray gvsang móngdàn dvpvt dvzaq dvkvngshì nø cúnshì lún we rvzvngcerì wáshì laqlúni, wvng dvshat nø nònggùn zí mvyøngè.

Mongkà taq;-
Shiyat Bóy svng Yesu di we

Yadv́ng pv̀n mèpvng Yesu nø Galili móng taq tvríshìá:mì. Yuda vsvng rìí Ang svng shvtlv́m wàò rvtnø, Ang nø Yuda móng dí mvneshi. Wedvgvp nø Yuda vsvng rì Shiyat Bóy tuq yùl ráì.Iwe angnv̄m rì bóy svng dìá:mì mèpvng, Ang gø mvyø̀n cèí ngāngá:mì. Wekvt Yerusalem rì tiqmaq nø, “Angmaqí shvtlv́m wàò pè nø, yapè ni mø̀í ma? Iwe èyv̀ngnø̀ng, Ang nø dèdè chaqdvp yv́ngø kà shø̀n nìgø, Ang svng angmaqí pàgø mva:lò. Yapè nø Kristu ni í we svng, dù rìí jø̀ngjǿng dǿ:mò we dv́ng mø̀í?

Inìgø yapè kayv́ng kèní í we nø nøngmaqí sháìe; Kristu di daq kvt nø, Ang kayv́ng kèní í we kagǿí gø mvshá lú:ngò,” wae. Yesuí nø Noqngø̀m Tø̀ngnø taq vkiq sórí mvshǿl shø̀:nò nø, “Ngà kagǿ ǿngà we nvng Ngà kayv́ng kèní ǿngà we svng namaqí jø̀ngjǿng èsháshà ma? Ngà nø Ngà nø:tní dø̀ng dakngà we mø̀í. Ngà svng dèzv́r dakngà pè nø dìng Pè í we namaqí Ang kaq mèshánøng. Ngà nø Ang yv́ng kèní dø̀ng dakngà rvtnø, Ngàí Ang svng shángòe; vrá A:ngí ni Ngà svng dèzv́r dakngà,” a:lòe. Wekvt angmaqí Ang svng tvplv́m wàòe. Wedø ínìgø Ang rvtø̀ shini mvhøqò rvtnø, kagǿ gø Ang svng wur zúshi màshvla.

Mongkà ètashìnøng we vnvmchvngrì Shvngbeí Gvray mongzøl lòng vtoshì leqlúnøng.