Bvdó-Kònglàngpǿ tvrà shøzaq weí rvgaq vdøl nø̀ gvyaq bǿì, móng vsvngrì dìlv́m tvrà vdǿn kebǿà
Bvdó-Kònglàngpǿ modo tvrà nø vle á:mì we lvbán kèní shømè zaqráì nø rvgaq gvzà vdøl we, dvzàrì vrø̀l we bø̀n bǿì wervt cvn cvn dvcøpā lv́m rà vchvk bǿì we svng móng vsvngrì taqkèní shúshì ráì.
Bvdó-Kònglàngpǿ di we modo tvrà nø ya March shvlá vdòng tiq lvbán rvzé shømè zaq ráì wervt tvrà, dvzà rì àngwà nǿngrì mvdàm téwa gvyaq shìbǿì wervt móng vsvngrì vdǿn kéò nø mvhøt lv́m vhǿm bǿà wesvng shálún shìe.
Vle á:mìwe 2025 nǿng mvyø̀ shødǿng vdòng taqgø wedø tvrà yv̀:nggùng rvgaq vdøl weí modo tvrà shøkéò wervt móng vsvngrì di we tvrà taq vdǿn kéò we nvng dvrè rì shvle we tvrà taq gvzà yak lv́m vhǿm bǿà wegø íe.
Móng vsúyaq lvp kèní nv̀mlat taq we tvrà svng tóngā ráà we ínìgø mvyø̀ shødǿng lòngí vrá gvyaq shì bǿì wae.
Wedø modo tvrà lòng gvyaq shìnø shø kebǿò we kvt we móngø vl we móng vsvngrìò wulaq tvrà nvng shiqshàn tvrà rì svng mvdø̀ng vtøp dvzv́r wervt we shìwvt tvrà rì svng móngøp shaqré shaqtang rì taqkèní cvn cvn dvcøp shvnvpā lv́m móng vsvngrì shóngshì nø shú ráà we svng shálún shìe.
