Chømyo vjø’ng Maria angchøm pè Yosep svng dvgùng shvring we bóy
Chømyo vjø’ng Maria angchøm pè Yosep svng dvgùng shvring we bóy angni gø íe.
Rø v-du we Gvray móngkà
Mati 1:16,18-21,24.
Yakuí nø Maria ang chø̀mpè Yosep svng shvzat yà:ngà we; Kristu* wa, tǿò pè Yesu nø, Marií gv̀l yà:ngà. Yesu Kristu gv̀l yà:ngà dāng nø yadø íe. Angmè Mari nø Yosep svng dv́nshi bǿì mèpvng, angní shini màshvzøngshì dvgvp, ang nø Shànshér Pvlàcè taqkèní góngshvng mø̀í we svng dǿm bǿà. Ang chø̀mpè Yosep nø døngman vsvng í nø, ang svng shvraq chaq màmvyǿ rvt, mvyø̀:ní ang svng gurlv́m dvdv̄m lú:ngà. Wedø ínìgø a:ngí yarì dāng dvda:mò ke, kū, Vkàngpè Ang dvzv́r tiq gǿ nø yøpnv́ng taq ang svng dvtánshì nø yadø a:lòe. “Dawi pvlí pvlaq Yosepmé, nà svng vdv́nshishaq mè Mari nø nvchø̀mmè washìlv́m lòng dang mèdètiqshìni. Pàwálv́m wani ang góng taq cv̀mré ríò lòng nø, Shànshér Pvlàcè taqkèní íe. A:ngí nø angcè tiq pè gv̀l daqòe. Ang bø̀ng nø nàí Yesu, wa tǿ ràe. Kadø íe wani Ang dvcì cèrì svng angmaq mvrà kèní chutchv́nglv́m pè nø Ang íe,” a:lòe. Yosep nø yøp yv́ng kèní vshat ráì kvt, Vkàngpè Ang dvzá:rí ang svng dvká:mò dø tiqdvchá cà:nò nø, wemè svng ang chø̀mmè washìlv́m lūshì yà:ngì.
Vpø’ íwe pèmè vnvmchvngmaq,
Dènio Mati Dvbùshang móngkà taq, Chømyo vjø’ng Maria angchøm pè í we St. Yosep kaq Gvray gvsangí Gōò tvrà svng yv’nglúnshìe. Gvray gvsangí nø chømyo vjø’ng Maria svng roqgar lvm rvt yøpnv’ng taqø røtnímshì lòng svng yv’nglúnshìe wèmvdvm Cìpshì Nønt taqkèní vtoshì nø, Kristu nvng Angmè Marianí kaq svng roqgar yangà tvrà svng yv’nglúnshìe. Wè mvdvmø St. Yosep kaq svng Døngman pè wā Mongkà taq vrù yangà tvrà svng gø vkvtdø yv’nglúnshìe.
Døngman vsvng wā shø’nshì we taq, Gvray kaq gø, angdè nvng nitvp gø’ kaq svng shóngshì nø vpø’ gø, àngmaqò dvgùng svng gø vpø’a gø’ íe. St. Yosep ínø chømyo vjø’ng Gvray Angmè Maria ò dvgùng svng gø vpø’ò rvt angdèo Kà tiqkàce í Dvdvm v-tiq, Nønt dvshá mà dvzvr lòng svng yv’nglúnshìe. Nøngmaqò lvpat rì taq gø Gvray gvsang shvrúng lòng svng yv’ng lún gø’ dvnúng gø’ wáshì lúnlvm rvt àngde nvng nitvp rì kaq svng vpø’ shvring sórí angmaqò dvgùng rì svng gø roqgā:rà wè í Gvray gvsangí zi we Talen Go lòng svng vtoshì nø, Kristu svng Mònggvn Dø’ngtáng kaq dvtit tvle gø’, dvsher nø zílún gø wáshì laqlúni! wvng dvshat nø nònggùn zí mvyøngè.
